بۇل تۋرالى سەناتتىڭ جالپى وتىرىسىندا 2021 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتى قاراۋ كەزىندە پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ ءمالىم ەتتى, دەپ حابارلايدى Egemen.kz.
«2021 جىلى رەسپۋبليكالىق بيۋدجەتتىڭ اتقارىلۋى كوروناۆيرۋس پاندەمياسىنىڭ اسەرى جاعدايىندا جۇزەگە استى. دەگەنمەن, 2020 جىلمەن سالىستىرعاندا ىسكەرلىك بەلسەندىلىكتىڭ جاندانۋى بايقالدى. ىشكى جالپى ءونىمنىڭ ءوسىمى 4 پايىزدى قۇرادى. ەكونوميكانىڭ بارلىق نەگىزگى سالالارىندا وڭ ناتيجەگە قول جەتكىزىلدى. ماسەلەن, ونەركاسىپتىك ءوندىرىس كولەمى 3,8 پايىزعا, قۇرىلىس سالاسى 7,6 پايىزعا, كولىك 3,6 پايىزعا, ساۋدا 9,2 پايىزعا ءوستى. نەگىزگى كاپيتالعا سالىنعان ينۆەستيتسيالار كولەمى 3,5 پايىزعا ۇلعايدى», دەدى ە.جاماۋباەۆ.
سونىمەن قاتار ول ينفلياتسيا دەڭگەيى 8,4 پايىزدى قۇراعانىن ەسكە سالدى.
«جۇمىسسىزدىق 4,9 پايىز دەڭگەيىندە ساقتالدى. قالىپتاسقان احۋالدا رەسپۋبليكالىق بيۋدجەتتىڭ اتقارىلۋى كەلەسىدەي كورسەتكىشتەرمەن سيپاتتالادى. تۇسىمدەر 100,8 پايىزعا اتقارىلىپ, 12,7 ترلن تەڭگەنى قۇرادى. بيۋدجەت تاپشىلىعى ىشكى جالپى ونىمگە شاققاندا 3,1 پايىزدى قۇرادى. شىعىستار 99,2 پايىزعا يگەرىلدى جانە 15,2 ترلن تەڭگەنى قۇرادى. الەۋمەتتىك شىعىستار 2020 جىلمەن سالىستىرعاندا 910 ملرد تەڭگەگە ۇلعايىپ, 7,5 ترلن تەڭگەنى قۇرادى. بۇل – رەسپۋبليكالىق بيۋدجەتتىڭ جالپى كولەمىنىڭ 50 پايىزى», دەدى مينيستر.