اپاتقا ەكيپاج مۇشەلەرى كىنالى سياقتى
بۇقارالىق اقپارات قۇرالدارى اپاتقا ۇشىراعان وڭتۇستىككورەيالىق «سەۆول» پارومىنىڭ ەكيپاج مۇشەلەرى مەن جاعالاۋ كۇزەتى قىزمەتى اراسىندا بولعان راديوكەلىسسوزدەردىڭ نۇسقاسىن جاريالادى.
جاريالانعان اقپاراتتار بويىنشا, اپات كەزىندە كەمەدە دۇربەلەڭ ورىن العان, ال ەكيپاج مۇشەلەرى توتەنشە جاعدايدا ناقتى شەشىم قابىلداۋدا قابىلەتسىزدىك تانىتقان. اپات جونىندە دابىل قاعىلعاننان كەيىن 29 مينۋت وتكەندە, جاعالاۋ كۇزەتى ەكيپاج مۇشەلەرىنەن جولاۋشىلاردىڭ بارلىعى قۇتقارۋ كوكىرەكشەسىن كيۋ قاجەتتىگىن وتىنگەن. ال ەكيپاج مۇشەلەرىنىڭ ءبىرى بۇعان جاۋاپ رەتىندە ەۆاكۋاتسيا جاعدايىندا جاعالاۋ كۇزەتىنىڭ ادامداردى قۇتقارۋعا مۇمكىندىگى بار ما, دەپ ەكى رەت سۇراعان كورىنەدى. پوليتسيا كەمەنىڭ اپاتقا ۇشىراعان كەزىندە جولاۋشىلاردىڭ تۋىستارىمەن تەلەفون ارقىلى سويلەسكەن سوزدەرىنە دە تالداۋ جۇرگىزىپ جاتىر. «سەۆول» پارومى سەيسەنبىدەن سارسەنبىگە قاراعان ءتۇنى اپاتقا ۇشىراعان بولاتىن.
ۇشاق شاسسيىندەگى «جولاۋشى»
ون التى جاستاعى امەريكالىق ءجاسوسپىرىم ۇشاق شاسسيىندە وتىرىپ, تىنىق مۇحيتىنىڭ جارتىسىن باسىپ وتكەن. بۇل جونىندە «اسسوشەيتەد پرەسس» اگەنتتىگى حابارلادى.
ءجاسوسپىرىم قورشاۋ ارقىلى سان-حوسە (كاليفورنيا شتاتى) اۋەجايى اۋماعىنا اسىپ ءتۇسىپ, ۇشاق شاسسيىنە بارىپ جاسىرىنعان. سوندا وتىرىپ ول سان-حوسەدەن گاۆايداعى ماۋي اۋەجايىنا دەيىنگى قاشىقتىقتى «ۇشىپ» ءوتىپتى. ۇشاق وتتەگى جەتىسپەۋشىلىگى قاتتى سەزىلەتىن 11 شاقىرىمداي بيىكتىكتە ۇشسا دا, الگى بوزبالا ءتىرى قالعان. «جولاۋشىنى» اۋە كەمەسى كەلىپ قونعان ماۋي اۋەجايىنىڭ قىزمەتكەرلەرى تاۋىپ الىپ, ءتيىستى مەكەمەگە تاپسىرعان. ال ءجاسوسپىرىم بۇل ارەكەتكە ۇيىنەن قاشىپ شىققان سوڭ بارعان كورىنەدى.
ءبىر كوشەنى ءپۋتيننىڭ اتىنا بەرمەك
بىشكەك تۇرعىنى ورتالىق كوشەلەردىڭ ءبىرىن رەسەي پرەزيدەنتى ۆلاديمير ءپۋتيننىڭ اتىنا اۋىستىرۋدى ۇسىندى. بۇل باستامانىڭ يەسى قىرعىزستاننىڭ رەجيسسەرى نۇرلان ابدىكادىروۆ.
رەجيسسەر ءوزىنىڭ اشىق حاتىندا ۆ.ءپۋتيندى «ءححى عاسىردىڭ كورنەكتى ساياسي كوشباسشىسى» دەپ اتاعان. سونداي-اق, ول رەسەي قىرعىز ەلىنىڭ ەكونوميكاسىن دامىتۋعا ىقپال ەتەتىندىگىن دە ايتقان. رەجيسسەر اشىق حاتىن قىرعىزستان پرەزيدەنتى ا.اتامباەۆتىڭ اتىنا ارناپتى. بۇل باستاماعا رەسپۋبليكا باسشىلارى قالاي قارايتىنى قازىرگە بەلگىسىز.
قىرىق ەكى ادام مەرت بولدى
«فرانس-پرەسس» اگەنتتىگىنىڭ حابارلاۋىنشا, پاكىستاننىڭ وڭتۇستىگىندەگى سيند پروۆينتسياسىندا بولعان جول-كولىك وقيعاسى سالدارىنان كەمىندە 42 ادام مەرت بولدى.
اپاتتىق جاعداي پانو-اكيل قالاسىنىڭ ماڭىنداعى كۇرەجولدىڭ شەتىندە تۇرعان جۇك كولىگىنە جولاۋشىلار اۆتوبۋسىنىڭ سوعىلۋىنان ورىن العان. قۇربان بولعانداردىڭ كوپشىلىگى ايەلدەر مەن بالالار ەكەن. جەرگىلىكتى پوليتسيانىڭ اقپاراتتارىنا قاراعاندا, 20-دان استام ادام ءتۇرلى جاراقاتتارمەن اۋرۋحاناعا جاتقىزىلعان. اپاتقا نەگىزىنەن اۆتوكولىك جولىنىڭ ءبىر جولاعىنا جوندەۋ جۇرگىزۋ ءۇشىن ۋاقىتشا جابىلعاندىعى سەبەپ بولسا كەرەك. بۇل ەلدە اۆتوكولىك جولدارىنىڭ ساپاسىزدىعىنان جول-كولىك وقيعالارى ءجيى بولىپ تۇرادى.
جيرينوۆسكي جۋرناليستەردەن كەشىرىم سۇرادى
لدپر جەتەكشىسى ۆلاديمير جيرينوۆسكي جەكسەنبى كۇنى «روسسيا-1» تەلەارناسىنىڭ «ۆلاديمير سولوۆەۆپەن جەكسەنبىلىك كەش» باعدارلاماسى بارىسىندا ءتىل تيگىزىپ, بالاعاتتاعان «روسسيا سەگودنيا» حالىقارالىق اقپارات اگەنتتىگىنىڭ تىلشىسىنەن كەشىرىم سۇرادى.
«جۇما كۇنى دۋمادا باق وكىلدەرىنىڭ سۇراقتارىنا جاۋاپ بەرۋ كەزىندە, ءبىر قىزدىڭ قويعان سۇراعىنا ورەسكەلدەۋ جاۋاپ قايتاردىم, – دەدى ۆ.جيرينوۆسكي. – العاشىندا ونى بايقامادىم, سويتسەم, ونىڭ اياعى اۋىر ەكەن. مەن ودان, سونداي-اق ءوزىم رەنجىتكەن ادامداردىڭ بارلىعىنان كەشىرىم سۇرايمىن». لدپر جەتەكشىسى 18 ءساۋىر كۇنى مەمدۋمانىڭ عيماراتىندا جۋرناليستەر الدىنا شىعىپ, ولاردىڭ سۇراقتارىنا جاۋاپ قايتارۋ كەزىندە, الدىمەن «روسسيا سەگودنيا» اگەنتتىگىنىڭ تىلشىسىنە, ودان كەيىن ارىپتەسىنە بولىسقان «ينتەرفاكس» اگەنتتىگىنىڭ جۋرناليسىنە دورەكى سوزدەر ايتقان ەدى. وسىعان بايلانىستى پارلامەنتتىك جۋرناليستەر مەمدۋما سپيكەرى س.نارىشكينگە جيرينوۆسكيدىڭ ارەكەتىنە باعا بەرۋ جونىندە ۇندەۋ جولداعان بولاتىن.
باسشىسىنان وسىلاي «كەك» الدى
چيۋ سيان ەسىمدى قىتايلىق ءوزىنىڭ بۇرىنعى جۇمىس بەرۋشىسى حۋن بينگە سارى جانە قارا ءتۇستى 1130 ءتىرى ۇيرەك بالاپانىن جىبەرگەن. جەرگىلىكتى باسىلىمداردىڭ جازۋىنشا, ونىڭ بۇل ارەكەتى بۇرىنعى باسشىسىنىڭ ونىڭ ورىنداعان جۇمىسىنا تيەسىلى اقىسىن بەرمەگەندىگىنە كورسەتكەن قارسىلىعى بولسا كەرەك.
بالاپانداردى جونەلتپەس بۇرىن چيۋ سيان بۇرىنعى باسشىسىنىڭ كومپانياسىمەن حابارلاسىپ, ءوزىنىڭ ەسەبىنەن ءتىرى بالاپانداردى جەتكىزىپ بەرۋدى ءوتىنىپتى. بىراق, ول اكەلىنگەن بالاپاندار ءۇشىن ەسەپ ايىرىسۋدان باس تارتقان. پوليتسيا شاقىرتۋعا تۋرا كەلگەن. قۇقىق قورعاۋ ورگاندارىنىڭ وكىلدەرىمەن اڭگىمەلەسكەننەن سوڭ, سيان بالاپانداردى جەتكىزۋگە كەتكەن شىعىن اقىسىن عانا تولەپتى. ال سيان ءوزىنىڭ وسى ارەكەتىن ماجبۇرلىلىك قادام دەپ تۇسىندىرگەن.
قىسقا قايىرىپ ايتقاندا:
وگايو شتاتىندا 70 جىلعا جۋىق نەكەدە تۇرعان ەرلى-زايىپتىلار ءبىر تاۋلىكتە, ياعني شامامەن 15 ساعاتتاي ۋاقىت ارالىعىندا ومىردەن وزدى. 91 جانە 92 جاستاعى حەلەن مەن كەننەت فەلۋمليلەردىڭ جارىق دۇنيەدەن وتۋىنە قارتتىق سەبەپ بولعان.
ۇزاق جىلدان بەرى اۆستريا قۇقىق قورعاۋ ورگاندارىنىڭ ىزدەستىرۋىندە جۇرگەن كۇدىكتى زالتسبۋرگ قالاسىنداعى پوليتسيا بولىمشەسىنە كەلگەن كەزىندە قولعا ءتۇستى. 59 جاستاعى ول پوليتسيا بولىمشەسىنە ءوزىنىڭ تەرگەۋدە جۇرگەن-جۇرمەگەندىگىن ءبىلۋ ءۇشىن باسسۇقسا كەرەك.
بەلگورودتاعى «زاپادنىي» بانكىنىڭ بولىمشەسىن باسىپ العان قارۋلى ادام ونىڭ سالىمدارىن تولەۋگە كەپىلدىك بەرىلگەن سوڭ, ءوز ەركىمەن بەرىلدى. وسى بانكتە ونىڭ 23 ميلليون ءرۋبلدى قۇرايتىن ۆەكسەلى بار ەكەن. ول اتالعان بانك ليتسەنزياسىنىڭ كەرى شاقىرتىپ الىناتىنىن كۇنى بۇرىن بىلگەن كورىنەدى.
وڭتۇستىك سۋدانداعى بۇۇ بازاسىنا قارۋلى ادامداردىڭ شابۋىل جاساۋى سالدارىنان 48 ادام قۇربان بولىپ, 60-تان استام ادام زارداپ شەكتى. بۇۇ جانىنداعى اقش-تىڭ تۇراقتى وكىلى مۇنى «قارۋسىز ادامدارعا جاسالعان جاۋىزدىق» دەپ اتادى.
ينتەرنەت ماتەريالدارى نەگىزىندە ازىرلەندى.