ساياسي پارتيالار رەفەرەندۋم قورىتىندىسى بويىنشا مالىمدەمە جاسادى

«اق جول» دەموكراتيالىق پارتياسى رەسپۋبليكا كونستيتۋتسياسىنا وزگەرتۋلەر ەنگىزۋ بويىنشا وتكەن رەفەرەندۋم اشىق ءارى دەموكراتيالىق ۇردىستەردىڭ ساقتالۋىمەن ءوتتى دەپ ەسەپتەيدى.

«رەفەرەندۋم بارىسىندا ۋچاسكەلەردى باقىلاعان «اق جول» دەمپارتياسىنىڭ وكىلدەرى سايلاۋ زاڭناماسىنىڭ قاتاڭ بۇزىلۋىن تىركەمەدى. تەك داۋىس بەرۋ ناتيجەسىنە اسەر ەتپەيتىن تەحنيكالىق اقاۋلار مەن سايلاۋشىلار تىزىمىندەگى جەكەلەگەن سايكەسسىزدىكتەر بايقالدى. رەفەرەندۋم قورىتىندىسى تالاسسىز ءارى قازاقستان حالقىنىڭ مىقتى پرەزيدەنت, ىقپالدى پارلامەنت پەن ەسەپ بەرەتىن ۇكىمەتى بار مەملەكەتتى باسقاراۋدىڭ جاڭا مودەلىن قۇرۋ باعىتىن قولدايتىنىن ايعاقتايدى», دەپ  مالىمدەدى  پارتيا كوشباسشىسى ازات پەرۋاشەۆ.

«اۋىل» پارتياسىنىڭ توراعاسى ءالي بەكتاەۆتىڭ مالىمدەۋىنشە, رەفەرەندۋم تاعايىندالعان العاشقى كۇننەن باستاپ پارتيا مۇشەلەرى پرەزيدەنتتىڭ باستامالارىنا قولداۋ ءبىلدىرىپ, كونستيتۋتسيالىق وزگەرىستەردىڭ مازمۇنىن تالقىلاۋ ىسىنە بەلسەنە ارالاسقان.

ء«بىز ءۇشىن دامۋدىڭ جالعىز عانا جولى بار. ول – دەموكراتيالىق جول. تەك دەموكراتيالىق جۇيەدە عانا قوعامنىڭ ءاربىر مۇشەسى مەملەكەتتىك ساياساتتى قالىپتاستىرۋدا تەڭ قۇقىققا يە بولادى. كەشەگى رەفەرەندۋم ارقىلى بارشا قازاقستان حالقى وسى جولدى تاڭدادى دەپ بىلەمىن», دەدى «اۋىل» حالىقتىق-دەموكراتيالىق پاتريوتتىق پارتياسىنىڭ مۇشەلەرى.

رەفەرەندۋم قارساڭىنداعى ۇگىت-ناسيحات جۇمىستارىن  جۇرگىزۋگە قازاقستان حالىق پارتياسى دا بەلسەنە ارالاستى. پارتيا اتىنان مالىمدەمە جاساعان ساياسي ۇيىمنىڭ جاڭا توراعاسى ەرمۇحامەت ەرتىسباەۆ: ء«بىز ناتيجەگە ريزامىز جانە بۇل – بارلىق قازاقستاندىقتاردىڭ جەڭىسى دەپ سانايمىز! قازاقستاندىقتار ءىس جۇزىندە پرەزيدەنت قاسىم-جومارت توقاەۆقا زور سەنىم ءبىلدىردى», دەيدى. قازاقستان حالىق پارتياسى رەفەرەندۋمنان كەيىن قازاقستاندىقتاردىڭ الدىندا تۇرعان باستى مىندەت – كونستيتۋتسيانىڭ قابىلدانعان نورماسىن زاڭنامالىق جانە تاجىريبەلىك تۇرعىدا ىسكە اسىرۋ دەپ ەسەپتەيدى.

«بارلىق مەملەكەتتىك كومپانيالاردى, ءبىرىنشى كەزەكتە «سامۇرىق-قازىنا» قورىن شەنەۋنىكتەردىڭ قولىنان تىكەلەي جانە دەرەۋ حالىقتىڭ مەنشىگىنە بەرۋ قاجەت. ءبىز, قازاقستان حالىق پارتياسى «جەر جانە جەر قويناۋى حالىققا تيەسىلى» دەگەن كونستيتۋتسيالىق نورمانى ىسكە اسىرۋ جونىندەگى حالىق زاڭىن جاريا تۇردە ازىرلەۋدىڭ باستالعانىن مالىمدەيمىز», دەپ  جازىلعان پارتيانىڭ بۇقارالىق اقپارات قۇرالدارىنا تاراتقان مالىمدەمەسىندە.