«التاۋ الا بولسا, اۋىزداعى كەتەدى. تورتەۋ تۇگەل بولسا, توبەدەگى كەلەدى» دەگەن دانالىق ءسوزدى قازاق حالقى ايتقان. مۇنداي ءسوزدى تاتۋلىقتىڭ تامىرىن تەرەڭ تۇسىنەتىن, بىرلىكتىڭ پارقىن وزگەدەن جاقسى بىلەتىن, تۇتاستىقتىڭ پايداسىن ۇعىناتىن ەل عانا ايتا الادى. ال قازاق حالقى – ەجەلدەن تۇراقتىلىق پەن تاتۋلىقتى تۋ ەتكەن ەل. ولاي بولماعان جاعدايدا, بۇگىندە قازاقستاندى مەكەن ەتكەن وزگە ۇلت پەن ۇلىستىڭ وكىلدەرى بۇل جەردە تۇراقتاپ قالماس ەدى. وسىنداي دوستىق پەيىلدىڭ ارقاسىندا وزگە ەتنوس وكىلدەرى قازاقستاندى تۋعان وتانى سانايدى.
وتكەن اپتانىڭ سوڭىندا قازاقستان حالقى اسسامبلەياسىنىڭ ءححى سەسسياسى ءوتتى. ەلباسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆ بايانداما جاسادى. پرەزيدەنت ءسوزىن اسا ۇلكەن ىنتامەن تىڭدادىق.
نۇرسۇلتان ءابىش ۇلى ەلىمىزدە قالىپتاسقان تۇراقتىلىق پەن تىنىشتىقتى ساقتاۋ ءۇشىن جەتى ءتۇرلى قۇندىلىقتى باسشىلىققا الۋ كەرەكتىگىن كولدەنەڭ تارتتى. ال وسى قۇندىلىقتاردىڭ ىشىندەگى ەڭ ماڭىزدىسى رەتىندە حالقىمىزدىڭ ءبىرلىگىن اتادى. «ەتنوستىق, تىلدىك, ءدىني جانە الەۋمەتتىك ايىرماشىلىعىنا قاراماستان, بۇكىل قازاقستاندىقتار تەڭ قۇقىلى. بىزدە قىسىم جاساۋدىڭ كەز كەلگەن تۇرىنە, بەيبىتشىلىك پەن كەلىسىمگە قولسۇعۋشىلىقتىڭ كەز كەلگەنىنە مەيلىنشە جول جوق جانە ول زاڭمەن قاتاڭ قۋدالانادى», دەدى ەلباسى. ءوز باسىم مەملەكەت باسشىسىنىڭ وسى ءسوزىن بارشا قازاقستاندىقتاردىڭ بەيبىت ءومىر ءسۇرۋى ءۇشىن جاسالعان كەپىلدىك رەتىندە قابىلدادىم.
– قازاقستاندا مەملەكەتتىك ءتىلدىڭ ءرولى, ورىس ءتىلىنىڭ رەسمي مارتەبەسى جانە بارلىق ەتنوستار مەن ولاردىڭ مادەنيەتتەرىنىڭ تەڭ جاعدايدا دامۋى تۋرالى ماسەلە شەشىمىن تاپقان. بيىل بىزدەگى تىلدەر تۋرالى العاشقى زاڭعا 25 جىل تولادى. بولاشاقتا بۇكىل ازاماتتاردىڭ مەملەكەتتىك ءتىلدى ءبىلۋى ءبىزدى بۇرىنعىدان بەتەر تەڭدەستىرىپ, بىرلىكتى نىعايتا تۇسەدى. مىنە, شيرەك عاسىردان بەرى ءبىز ءتىل ساياساتىندا ايقىن باعىتپەن كەلەمىز – مەملەكەتتىك ءتىلدى ءبىرتىندەپ دامىتۋدامىز جانە بۇكىل ەتنوستار تىلدەرىنىڭ دامۋى ءۇشىن جاعدايلار جاساۋدامىز. بۇگىندە تۇرعىندارىنىڭ كوپشىلىگى كەم دەگەندە ەكى تىلدە سويلەيتىن جانە ويلايتىن ەلدەر كوپ ەمەس,– دەدى نۇرسۇلتان نازارباەۆ. بۇل قازاقستاندا ءتىل مەن دىنگە قاتىستى, سالت پەن داستۇرگە بايلانىستى, ءاربىر ۇلت پەن ۇلىستىڭ مادەني-رۋحاني ومىرىنە وراي ەشقانداي الاۋىزدىقتىڭ جوقتىعىن ايقىندايدى. بارىنە بىردەي جاعداي جاسالعان. ال مەملەكەتتىك ءتىلىمىزدىڭ وركەندەۋىنە ءوزگە ەتنوستاردىڭ بارلىعى مۇددەلى بولۋى كەرەك. ويتكەنى, ول – ءبىزدىڭ مەملەكەتىمىزدىڭ ءتىلى.
سونىمەن قاتار, پرەزيدەنت تۇراقتىلىق پەن كەلىسىم ءاربىر اكىمنىڭ كۇندەلىكتى جۇمىسىنىڭ ەڭ باستى باعدارى بولۋى كەرەك دەپ اتاپ كورسەتتى. سايىپ كەلگەندە, پرەزيدەنتتىڭ ەڭ باستى ماقساتى ەلىمىزدەگى تىنىشتىق پەن تۇراقتىلىقتى مىزعىماستاي ساقتاۋ ەكەندىگى كورىنىپ تۇردى. اسسامبلەيا مۇشەلەرىنىڭ ءبارى دە وسى ىسكە قولدارىنان كەلگەن كومەگىن جاساپ, پرەزيدەنتتىڭ كومەكشىلەرى بولۋى كەرەك دەپ ويلايمىن. سونى ءاربىر اسسامبلەيا مۇشەسى تۇسىنۋگە ءتيىس.
ليۋدميلا لي,
وبلىستىق «Lev ami» ەۆرەي قوعامدىق-مادەني
بىرلەستىگىنىڭ جەتەكشىسى.
قىزىلوردا.