كەشە قاسىم-جومارت توقاەۆتىڭ توراعالىق ەتۋىمەن پارلامەنت سەناتىنىڭ بيۋرو وتىرىسى بولدى, دەپ حابارلادى سەناتتىڭ ءباسپاسوز قىزمەتى.
بيۋرو مۇشەلەرى الداعى 24 ءساۋىر كۇنى بولاتىن سەنات وتىرىسىنىڭ كۇن ءتارتىبىن قارادى. پالاتا وتىرىسىنا ءتورت ماسەلەنى شىعارۋ جوسپارلانىپ وتىر. اتاپ ايتقاندا, سەناتورلار «رۇقساتتار جانە حابارلامالار تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رۇقسات بەرۋ جۇيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ء(بىرىنشى وقىلىم) زاڭ جوبالارىن قارايدى. بۇل زاڭ جوبالارىن مەملەكەت باسشىسى ن.نازارباەۆ شۇعىل قاراۋ قاجەتتىگى تۋرالى ايتقان بولاتىن.
ودان باسقا, سەنات جالپى وتىرىستا قازاقستان مەن ءوزبەكستان اراسىنداعى ستراتەگيالىق ارىپتەستىك تۋرالى شارتتى راتيفيكاتسيالاۋ تۋرالى جانە ەۋرازيا ەكونوميكالىق قوعامداستىعىنا مۇشە مەملەكەتتەردىڭ ەكسپورتتىق باقىلاۋىنىڭ بىرىڭعاي ءتارتىبى تۋرالى كەلىسىمنىڭ كۇشىن جويۋ تۋرالى زاڭ جوبالارىن قارايدى.
باس كوميتەتتەردىڭ توراعالارى پالاتا وتىرىسىندا زاڭ جوبالارىن قاراۋعا ازىرلىك بارىسى تۋرالى حاباردار ەتتى.
سەنات بيۋروسىندا, سونداي-اق, ماجىلىستە ماقۇلدانعان بىرقاتار زاڭ جوبالارى ءبولىندى.
سەناتتاعى «ءوڭىر» دەپۋتاتتىق توبىنىڭ ۇسىنۋى بويىنشا بيۋرو وڭتۇستىك قازاقستان وبلىسىنداعى قالالىق جانە اۋداندىق ءماسليحاتتاردىڭ بىرقاتار دەپۋتاتتارىن وتاندىق قۇقىقتىق جۇيەنى جەتىلدىرۋگە باعىتتالعان قىزمەتى ءۇشىن سەناتتىڭ قۇرمەت گراموتاسىمەن ماراپاتتاۋ تۋرالى قاۋلى ەتتى.
ودان باسقا, ق.توقاەۆ سەنات توراعاسىنىڭ ورىنباسارى قايرات يششانوۆقا جانە سەنات اپپاراتىنىڭ باسشىسى الەكساندر سۋدينگە تمد پارلامەنتارالىق اسسامبلەياسىنىڭ اتىنان «دوستاستىق» وردەنىن تابىس ەتتى.
بيۋرو وتىرىسىنىڭ سوڭىندا سەنات توراعاسى جوعارعى پالاتانىڭ دەپۋتاتتارى 28 ءساۋىر مەن 5 مامىر ارالىعىندا ەلىمىزدىڭ ايماقتارىنا اتتاناتىنىن حابارلادى. سەناتورلار سايلاۋشىلارمەن كەزدەسىپ, الەۋمەتتىك سالا جانە ەكونوميكانىڭ ناقتى سەكتورىنىڭ كاسىپورىندارىندا بولادى جانە پارلامەنتتىڭ قازىرگى كەزدەگى زاڭ شىعارۋ قىزمەتى مەن مەملەكەت باسشىسىنىڭ جىل سايىنعى جولداۋىندا العا قويىلعان مىندەتتەردى ىسكە اسىرۋ بارىسى تۋرالى جۇرتشىلىقتى حاباردار ەتەدى دەپ جوسپارلانعان.