بارشا وتانداستارىمىز ءۇشىن ورتاق مەرەكە

مەملەكەت باسشىسى نۇرسۇلتان نازارباەۆ الماتىداعى كيەلى ۆوزنەسەنيە كافەدرالى سوبورىنا باردى, دەپ حابارلادى پرەزيدەنتتىڭ ءباسپاسوز قىزمەتى. شىركەۋدى ارالاۋ بارىسىندا مەملەكەت باسشىسى ءدىندارلار قاۋىمى الدىندا ءسوز سويلەپ, ولاردى پاسحا مەرەكەسىمەن قۇت­تىقتادى. – بيىلعى مەرەكە پراۆوسلاۆيەلىكتەر مەن كاتوليكتەردىڭ ونى ءبىر كۇندە اتاپ وتۋىمەن ەرەكشە. بۇل – بارشا قازاق­ستان­دىقتار ءۇشىن ورتاق مەرەكە, ويتكەنى, ەلىمىزدە بارلىق ءدىننىڭ تەڭدىگى قامتاماسىز ەتىلگەن. ءبىزدىڭ حالقىمىز پاسحا مەن روج­دەستۆونى, ناۋرىز بەن قۇربان ايتتى بىرگە اتاپ وتەدى, بۇل بۇگىندە داستۇرگە اي­نال­دى. دىندەردىڭ وزگەشەلىگى بارشا قا­زاق­ستان حالقىن بىرىكتىرۋشى فاكتور بو­لىپ سانالادى, كوپتىڭ كوڭىلىنە سەنىم­دىلىك, تىنىشتىق, تاتۋلىق پەن كەلىسىم ۇيا­لاتادى. ءدال وسى ارقىلى ءبىز ەلدى دامى­تىپ, ازاماتتارىمىزدىڭ ءال-اۋقاتىن جاق­سار­تىپ, بالالارىمىزدى وسىرەمىز جانە بولاشاعىمىزعا سەنىممەن قاراي الامىز, – دەدى قازاقستان پرەزيدەنتى. نۇرسۇلتان نازارباەۆ قازاقستاندىقتار تولەرانتتىلىق پەن ءبىر-بىرىنە دەگەن ءوزارا سىي­لاستىقتى قىلاۋسىز ساقتاۋى ءتيىس ەكەنىن اتاپ ءوتتى. – پاسحانى مەرەكەلەۋ ۇلكەن ۇمىتپەن ۇشتاس. مەن ءبىزدىڭ ورتاق ءۇمىتىمىز بار­شا­مىزدىڭ الاڭسىز ەڭبەك ەتىپ, بالالاردى تاربيەلەي الۋىمىز ءۇشىن ەلىمىزدە ءبارىنىڭ تۇراقتى بولۋىنا سايادى دەپ ويلايمىن, – دەدى قازاقستان پرەزيدەنتى. ءسوزىنىڭ سوڭىندا مەملەكەت باسشىسى حريستياندارعا جانە بارشا قازاقستان حالقىنا مول يگىلىك, زور دەنساۋلىق, ءار شاڭىراققا باق-بەرەكە تىلەدى. ءوز كەزەگىندە استانا جانە قازاقستان ءميتروپوليتى الەكساندر سوبورعا كەلىپ, پراۆوسلاۆيە حريستياندارىن پاس­حا­مەن قۇتتىقتاعانى ءۇشىن نۇرسۇلتان نا­زارباەۆقا العىس ايتتى. – ءسىز دانالىقپەن ايتقانداي, بۇل – بارشا قازاقستاندىقتاردىڭ مەرەكەسى, ويتكەنى, ءسىز بىرلىك, تاتۋلىق جانە كەلىسىم ساياساتىن جۇرگىزىپ كەلەسىز. قازاقستان تۇرعىندارى ءسىزدىڭ بۇكىل حالىقتىڭ يگىلىگى ءۇشىن ەتكەن ەڭبەگىڭىزدى وتە جوعارى باعالايدى, – دەدى ميتروپوليت. ءداستۇر بويىنشا ميتروپوليت مەم­لەكەت باسشىسىنا پاسحا مەرەكەسىنە ارنايى ازىرلەنگەن جۇمىرتقانى ۇسىندى. ----------------------------------------- سۋرەتتەردى تۇسىرگەندەر س.بوندارەنكو, ب.وتارباەۆ.