قر ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ سايلاۋ ۋچاسكەسىنە داۋىس بەرۋگە كەلدى, دەپ حابارلايدى Egemen.kz.
اكادەميك م. جۇرىنوۆتىڭ بايانداۋىنشا, تاۋەلسىزدىك تاريحىندا تۇڭعىش رەت رەفەرەندۋم ارقىلى كونستيتۋتسياعا وزگەرىستەر ەنىپ, حالىقتىڭ قالاۋىنا مۇمكىندىك بەرىلىپ وتىر. رەفەرەندۋم ناتيجەسى بويىنشا قولدانىستاعى زاڭدار وزگەرىپ, 200-دەن استام زاڭ كۇشى قۇجاتتارعا قول قويىلادى. بۇل وزگەرىستەر جاڭا قازاقستاننىڭ نەگىزىن قالايدى.
«بۇگىن مەن سايلاۋ ۋچاسكەسىنە ەلىمىزدىڭ بولاشاعى ءۇشىن داۋىس بەرۋگە كەلدىم. ءبىز سىبايلاس جەمقورلىق پەن جۇمىسسىزدىقپەن كۇرەسۋگە, حالقىمىزدىڭ ءال-اۋقاتىن نىعايتۋعا ءتيىسپىز. ەندى شەگىنەرگە جول جوق. حالىقتىڭ كوزى اشىلدى. بۇرىنعى سۇرلەۋدى قابىلدامايتىنىن كورىپ وتىرمىز. رەفەرەندۋم جارقىن بولاشاققا جاڭا جول اشادى. ءاربىر قازاقستاندىقتىڭ بۇل ناۋقاننان شەت قالماي, داۋىس بەرۋىن قالايمىن. رەفەرەندۋم ناتيجەسى مەملەكەت باسشىسى قاسىم-جومارت توقاەۆتىڭ قولىنداعى ماندات. وسىنى ءتۇسىنۋىمىز كەرەك», دەدى مۇرات جۇرىنوۆ.
اكادەميك م.جۇرىنوۆ ايتىپ وتكەندەي, رەفەرەندۋم, ەڭ الدىمەن جاستارعا كەرەك ەكەنىن ايتتى. بولاشاق قازاقستاننىڭ ارحيتەكتۋراسى رەفەرەندۋم ناتيجەسىنە قاراپ ايقىندالادى. داۋىس بەرۋ ءاربىر جاستىڭ, ءاربىر قازاقستاندىقتىڭ قاسيەتى بورىشى. «مەن ەلدىڭ بولاشاعى ءۇشىن داۋىس بەردىم» دەپ ءسوزىن تۇيىندەدى اكادەميك.
عالىم № 17 مەكتەپ-ينتەرناتتا ورنالاسقان № 537 سايلاۋ ۋچاسكەسىندە داۋىس بەردى.