قازاقستان رەسپۋبليكاسى پرەزيدەنتىنىڭ 2014 جىلعى 21 ساۋىردەگى №807 جارلىعىمەن قازاقستان رەسپۋبليكاسى پرەزيدەنتىنىڭ كۇزەت قىزمەتى مەن قازاقستان رەسپۋبليكاسىنىڭ رەسپۋبليكالىق ۇلانى قوسۋ جولىمەن قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگان رەتىندە قازاقستان رەسپۋبليكاسى مەملەكەتتىك كۇزەت قىزمەتى بولىپ قايتا ۇيىمداستىرىلدى.
وسى جارلىقپەن قازاقستان رەسپۋبليكاسى ىشكى ىستەر مينيسترلىگىنىڭ ىشكى اسكەرلەرى قايتا قۇرۋ جولىمەن ىشكى ىستەر ورگاندارىنىڭ بىرەگەي جۇيەسىنە كىرەتىن قازاقستان رەسپۋبليكاسىنىڭ ۇلتتىق ۇلانى بولىپ قايتا ۇيىمداستىرىلدى.
قازاقستان رەسپۋبليكاسى پرەزيدەنتىنىڭ جارلىعى
ءا.ت. سادىقۇلوۆتى قازاقستان رەسپۋبليكاسى مەملەكەتتىك كۇزەت قىزمەتىنىڭ باستىعى قىزمەتىنە تاعايىنداۋ تۋرالى
ءانۋار تولەۋحان ۇلى سادىقۇلوۆ قازاقستان رەسپۋبليكاسى مەملەكەتتىك كۇزەت قىزمەتىنىڭ باستىعى بولىپ تاعايىندالسىن, ول بۇرىنعى اتقارعان قىزمەتىنەن بوساتىلسىن.
قازاقستان رەسپۋبليكاسىنىڭ پرەزيدەنتى
ن.نازارباەۆ.
استانا, اقوردا, 2014 جىلعى 21 ءساۋىر. № 810
حرونيكا
مەملەكەت باسشىسىنىڭ جارلىعىمەن مۇحتار اقات ۇلى ايۋباەۆ باسقا جۇمىسقا اۋىسۋىنا بايلانىستى قازاقستان رەسپۋبليكاسى رەسپۋبليكالىق ۇلانىنىڭ قولباسشىسى قىزمەتىنەن بوساتىلدى.
* * *
مەملەكەت باسشىسىنىڭ وكىمدەرىمەن:
ارداق اشىمبەك ۇلى قازاقستان رەسپۋبليكاسى مەملەكەتتىك كۇزەت قىزمەتى باستىعىنىڭ ورىنباسارى – قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ قاۋىپسىزدىگى قىزمەتىنىڭ باستىعى قىزمەتىنە تاعايىندالدى, ول بۇرىنعى اتقارعان قىزمەتىنەن بوساتىلدى;
مۇحتار اقات ۇلى ايۋباەۆ قازاقستان رەسپۋبليكاسى مەملەكەتتىك كۇزەت قىزمەتى باستىعىنىڭ ورىنباسارى قىزمەتىنە تاعايىندالدى;
قانات ورىنتاي ۇلى ورازقۇلوۆ قازاقستان رەسپۋبليكاسى مەملەكەتتىك كۇزەت قىزمەتى باستىعىنىڭ ورىنباسارى قىزمەتىنە تاعايىندالدى, ول بۇرىنعى اتقارعان قىزمەتىنەن بوساتىلدى;
ەرمەك ەلەۋحان ۇلى ۇكىباەۆ قازاقستان رەسپۋبليكاسى رەسپۋبليكالىق ۇلانى قولباسشىسىنىڭ ءبىرىنشى ورىنباسارى قىزمەتىنەن بوساتىلدى;
ايداربەك مۇستاجاپ ۇلى ابدۋلوۆ قازاقستان رەسپۋبليكاسى رەسپۋبليكالىق ۇلانى قولباسشىسىنىڭ ورىنباسارى قىزمەتىنەن بوساتىلدى.