مەملەكەتتىك حاتشى ەرلان قارين رەفەرەندۋمدا ءوز تاڭداۋىن جاسادى, دەپ حابارلايدى Egemen.kz.
مەملەكەتتىك حاتشى ەلورداداعى №111 رەفەرەندۋم ۋچاسكەسىندە داۋىس بەردى.
«رەفەرەندۋمعا قاتىسۋىم - جەكە تاڭداۋىم. ءار ازامات ەل ومىرىنە قاتىستى ماڭىزدى شارالارعا بەلسەنە قاتىسقانى ءجون. 1995 جىلعى رەفەرەندۋم ءالى ەسىمدە. مەن ول كەزدە ستۋدەنتپىن. رەفەرەندۋم بويىنشا باستاماشى توپتىڭ قۇرامىندا بولىپ, ۇيلەردى ارالاپ, حالىققا كونستيتۋتسيانىڭ ماڭىزدىلىعىنا قاتىستى ءتۇسىندىرۋ جۇمىسىمەن اينالىستىق. بۇگىن وتباسىممەن كەلدىم. رەفەرەندۋمعا دەيىن وتباسىمدا ونىڭ ءمانى مەن ماڭىزدىلىعى, قالاي وتەتىندىگى تۋرالى اڭگىمە قۇردىق. بالالارىممەن رەفەرەندۋم تۋرالى ديسكۋسسيا وتكىزدىك, ولاردىڭ بۇل شارادان حابارى بارى قۋانتتى», دەدى ەرلان قارين باق وكىلدەرىنىڭ سۇراعىنا جاۋاپ بەرە تۇرىپ.
مەملەكەتتىك حاتشىنىڭ مالىمەتىنشە, رەفەرەندۋمدا جاستار اسا بەلسەندىلىك تانىتۋدا.
«قازىر جاستار بەلسەندى. ولاردىڭ ەلدىڭ ساياسي, ەكونوميكالىق, الەۋمەتتىك دامۋ جاعدايىنا قاتىستى سۇراعى كوپ. جالپى بۇگىنگى شاراعا قازاقستاندىقتار بەلسەنە قاتىسىپ, ءوز تاڭداۋىن جاسايدى دەگەن سەنىمدەمىن. رەفەرەندۋمعا دايىندىق بارىسىندا ەلىمىزدىڭ ءبىراز وڭىرىندە بولدىم. ءتۇسىندىرۋ جۇمىستارى كەزىندە ازاماتتاردىڭ بەلسەندىلىگى بايقالدى. كونستيتۋتسياعا ەنگىزىلەتىن وزگەرىستەر قىزۋ تالقىعا سالىندى. سول سياقتى دەمالىس كۇندەرى وتباسىممەن, بالالارىممەن قىدىرىپ جۇرگەندە كوشەدە كورىپ, تانىعان ازاماتتار توقتاپ, رەفەرەندۋمعا قاتىستى سۇراقتارىن قويىپ جاتتى. بۇل دا قىزىعۋشىلىقتىڭ بەلگىسى», دەيدى ول.