ەلورداداعى ۇلتتىق مۋزەيدە قازاقستان سۋرەتشىلەر وداعىنىڭ مۇشەسى, بەلگىلى قىلقالام شەبەرى مۇحتار بايبوسىننىڭ XIX-XX عاسىردا ءومىر ءسۇرىپ, قازاق ونەرىنىڭ مەرەيىن اسىرعان ايتۋلى تۇلعالارعا ارنالعان «اسىل مۇرا» اتتى جەكە كورمەسى اشىلدى.
مازمۇندى ءىس-شارانىڭ اشىلۋىندا ۇلتتىق مۋزەيدىڭ عىلىمي حاتشىسى سايالبەك گيززاتوۆ كورمەنىڭ ماڭىزىنا توقتالدى.
«مۇحتار قايرات ۇلى – حالقىمىزدىڭ ءداستۇرلى مادەنيەتىن بەينەلەۋ ونەرى ارقىلى تانىستىرىپ كەلەدى. ونىڭ ۇلاعاتتى ۇستاز رەتىندە ونەرلى جاستاردىڭ بيىككە سامعاۋىنا اتسالىسىپ جۇرگەن ەڭبەگى دە ەرەن. بۇگىنگى كورمەدە سۋرەتشى قازاقتىڭ ءبىرتۋار اقىندارى مەن داۋلەسكەر كۇيشىلەرىنىڭ بەينەلىك وبرازدارى مەن سيۋجەتتىك اڭگىمەلەرىن قامتىعان پورترەتتىك كومپوزيتسيالارىن ۇسىنىپ وتىر. سوندىقتان اتالعان ونەر تۋىندىلارى تالعامپاز كورەرمەننىڭ جۇرەگىنەن ورىن الاتىنىنا سەنىمدىمىن», دەدى ول.
كورمەگە قىلقالام شەبەرىنىڭ ۇلتتىق ونەرىمىزدىڭ تاريحىندا ەسىمدەرى ماڭگىلىك قالعان اقان سەرى, ءبىرجان سال, ەستاي بەركىمباەۆ, جاياۋ مۇسا, مۇحيت مەرالى ۇلى, اسەت نايمانباي ۇلى, ۇكىلى ىبىراي, دينا نۇرپەيىسوۆا, كەنەن ازىرباەۆ, نارتاي بەكەجانوۆ, مايرا ۋاليقىزى سەكىلدى بىرەگەي ونەر يەلەرىنىڭ پورترەتتىك كومپوزيتسيالارى قويىلدى. بۇل كارتينالاردىڭ ءبارى كەسكىندەمە جانە گرافيكالىق ۇلگىدە سالىنعان. سۋرەتشى ءار جۇمىسىندا دەتالعا ەرەكشە ءمان بەرىپ, تۇلعالاردى كوركەم بەينەلەگەن. ونداعى بوياۋلاردىڭ ءتۇسى عانا ەمەس, شىنايىلىعى دا كوز تارتادى.
سونداي-اق ءىس-شارا اياسىندا كورنەكتى ءانشى, مەملەكەتتىك سىيلىقتىڭ لاۋرەاتى قايرات بايبوسىنوۆ كورمەگە ۇسىنىلعان تالانتتار ومىرىنەن مازمۇندى اڭگىمە ايتىپ, سۋرەتشىنىڭ ەڭبەگىنە جوعارى باعا بەردى. باسقا دا ءسوز العان ازاماتتار قىلقالام شەبەرىنىڭ شىعارماشىلىعى جايىندا پاراساتتى وي ءوربىتتى.
كورمە سوڭىندا مۇحتار بايبوسىن: «ونەر ادامىنىڭ سىنشىسى – حالىق. ونەرىمدى باعالاپ كەلگەندەرىڭىز مەن ءۇشىن ۇلكەن مارتەبە, زور قۋانىش. سوندىقتان بارىڭىزگە دە العىسىمدى ايتامىن», دەپ جينالعاندارعا ريزاشىلىعىن ءبىلدىردى.
ەركەناز قورداباي,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 2-كۋرس ستۋدەنتى