قازاقستاندىق بالعىن سپورتشىلار فرانتسيانىڭ سولتۇستىگىندەگى نورمانديا وڭىرىندە ۇيىمداستىرىلعان 16-18 جاس ارالىعىنداعى مەكتەپ وقۋشىلارى اراسىنداعى گيمنازياداعا تۇڭعىش رەت قاتىسىپ, ەلىمىزگە تابىستى ورالدى. الەمنىڭ 64 مەملەكەتىنەن كەلگەن 4 مىڭعا جۋىق ءجاسوسپىرىم 17 سپورت تۇرىنەن جانە 3 پاراليمپيادا باعدارلاماسىندا سىنعا ءتۇستى. جەرلەستەرىمىز دۇنيەجۇزىلىك گيمنازيا ويىندارىنا العاش رەت قاتىسسا دا, جارىس قورىتىندىسىندا 85 مەدال (32 التىن, 32 كۇمىس, 21 قولا) جەڭىپ الدى. ءسويتىپ, جالپىكومانالىق ەسەپتە ۇزدىك ۇشتىككە ەندى.
دۇنيەجۇزىلىك مەكتەپ وقۋشىلارى اراسىنداعى گيمنازيادانىڭ تاريحىنا ۇڭىلەر بولساق, ەڭ العاشقى جارىستىڭ جالاۋى 1974 جىلى گەرمانيانىڭ ۆيسبادەن قالاسىندا جەلبىرەگەن. 1990 جىلى بريۋگگەدە (بەلگيا) ۇيىمداستىرىلعان دوداعا دەيىن اتالعان حالىقارالىق سپورتتىق جوبا ءار ەكى جىلدا ءبىر رەت ۇيىمداستىرىلسا, كەيىننەن اراسى 3-4 جىلعا ۇزاردى. XXI عاسىردا مۋلتي-جارىستى وتكىزۋدە ەۋروپا ەلدەرىنەن بولەك, وزگە دە قۇرلىقتىڭ مەملەكەتتەرى بەلسەندى بولا باستادى. مىسالى, بۇگىنگە دەيىن گيمنازيادانى ازيا قۇرلىعىنان – قاتار, وڭتۇستىك افريكادان – برازيليا, افريكا قۇرلىعىنان ماروككو وتكىزدى.
ال بيىلعى 16-18 جاس ارالىعىنداعى وقۋشىلارعا ارنالعان ءىرى حالىقارالىق جارىستى فرانتسيا وسىمەن 5-رەت وتكىزدى. گيمنازيادانى ۇيىمداستىرۋ جاعىنان ازىرشە فرانتسيانىڭ الدىنا تۇسەتىن ەل تابىلماي تۇر. بۇعان دەيىن فرانتسياداعى ءتورت دۇنيەجۇزىلىك گيمنازيادا ورلەان (1976), ليلل (1982), نيتستسا (1986) جانە كان (2002) قالالارىندا جالاۋى جەلبىرەگەن بولاتىن. ءسويتىپ, اراعا 20 جىل سالىپ بۇل قالالاردىڭ تىزىمىنە نورمانديا قوسىلدى.
رەتتىلىك بويىنشا 19-مارتە ۇيىمداستىرىلعان بيىلعى دۇنيەجۇزىلىك جازعى گيمنازيا ويىندارى 14-22 مامىر ارالىعىندا ءوتتى. قازاقستاندىق سپورتشى بالالار پاراليمپيادالىق سپورت تۇرلەرى مەن برەيك-دانستان باسقا 17 سپورت تۇرىنەن باق سىنادى. دەلەگاتسيانى فرانتسياعا ءبىلىم جانە عىلىم مينيسترلىگىنىڭ ۇلتتىق عىلىمي-پراكتيكالىق دەنە تاربيەسى ورتالىعى قازاقستاننىڭ مەكتەپ سپورت فەدەراتسياسىمەن بىرگە باستاپ باردى. جارىسقا قاتىسۋشىلار سانى بويىنشا ەل قۇراماسى فرانتسيا مەن برازيليادان كەيىنگى ءۇشىنشى ەل اتاندى. بىزدەن فرانتسياعا بارلىعى 296 ادام اتتاندى. ونىڭ ىشىندە: 234 سپورتشى, 49 جاتتىقتىرۋشى, 9 تورەشى, ءبىلىم جانە عىلىم مينيسترلىگى مەن مەكتەپ سپورت فەدەراتسياسىنىڭ 4 وكىلى بار.
ءبىر اپتاعا سوزىلعان دۇنيەجۇزىلىك دودادا جەرلەستەرىمىز سپورتتىڭ تاەكۆوندو, ءجۇزۋ, جەڭىل اتلەتيكا, دزيۋدو, ەركىن كۇرەس, سەمسەرلەسۋ, كوركەم گيمناستيكا, سپورتتىق گيمناستيكا, ساداق اتۋ, بوكس, گرەك-ريم كۇرەسى, ايەلدەر كۇرەسى جانە رەگبي سياقتى سپورت تۇرلەرىنەن 85 جۇلدە جەڭىپ الدى. ولاردىڭ قاتارىندا جازعى وليمپيا ويىندارىنىڭ چەمپيونى, جەڭىل اتلەت ولگا رىپاكوۆانىڭ دا قىزى بار. اناستاسيا رىپاكوۆا دا اناسى سياقتى جەڭىل اتلەتيكا سايىسىندا سىنعا ءتۇسىپ, فرانتسيادا كۇمىس مەدال يەلەندى. جەرلەستەرىمىز جالپىكوماندالىق ەسەپتە 3-ورىنعا جايعاستى. ءبىرىنشى ورىندى 114 مەدالى بار, ونىڭ ىشىندە 47 التىن جەڭىپ العان فرانتسيا سپورتشىلارى يەلەنسە, 45 التىن مەدال جەڭىپ العان برازيليا قۇراماسى ەكىنشى ورىنعا تابان تىرەدى. سونىمەن قاتار قازاقستان سپورتشىلارى التىن جانە كۇمىس مەدالداردىڭ سانى بويىنشا دا 3-ورىن السا, قولا مەدال بويىنشا 5-ورىنعا تۇراقتادى.
دۇنيەجۇزىلىك دودادان وسىنداي تابىسپەن ورالعان قازاقستاندىق وقۋشى سپورتشىلاردى ءبىلىم جانە عىلىم ءمينيسترى اسحات ايماعامبەتوۆ قۇتتىقتادى. «وقۋشىلارىمىزدى الەمدىك گيمنازياداداعى جەڭىستەرىمەن جانە جوعارى جەتىستىكتەرىمەن قۇتتىقتايمىن. ارينە, بۇل جۇلدەلەر – جاتتىعۋدىڭ, تاباندى ەڭبەكتىڭ, ءتارتىپ پەن تالپىنىستىڭ جەمىسى. سىزدەرگە ۇلكەن ءۇمىت ارتىپ, شىعارىپ سالعان ەدىك, سول ءۇمىتتى تولىعىمەن اقتاپ كەلدىڭىزدەر. سوندىقتان ۇستازدارىڭىزعا, جاتتىقتىرۋشىلارىڭىز بەن اتا-انالارىڭىزعا العىس ايتامىن. ءبىلىم جانە عىلىم مينيسترلىگى وقۋشىلار اراسىندا زياتكەرلىك جانە سپورتتىق وليمپيادالاردى دامىتۋ جۇمىستارىن جالعاستىرادى», دەدى مينيستر.
ءسويتىپ, قازاقستاندىق وقۋشى سپورتشىلار مەدال سانى جاعىنان ۇزدىكتەر قاتارىنان كورىندى. مۇنىڭ ءوزى ەلىمىزدىڭ جاس ورەندەرى ءۇشىن ۇلكەن جەتىستىك. وسى كەشەندى باسەكەلەر ناتيجەسىنە قاراپ-اق ءار مەملەكەتتەگى مەكتەپ ليگاسى مەن جاسوسپىرىمدەر سپورتىنىڭ دامۋ قارقىنىن بايقاۋعا بولاتىنداي.