وزىندىك ۇنىمەن, سۋرەتكەرلىك قاسيەتىمەن تانىلعان قوسجان مۇسىرەپوۆ از عانا ۋاقىت ءومىر سۇرسە دە, ادەبيەتكە ىرگەلى شىعارمالارمەن ولجا سالدى. نازىك يىرىمدەرگە تولى ناركەز نوۆەللالار جازۋدىڭ دا حاس شەبەرى بولعان. «جوعالعان اق الماس», «جارىق دۇنيە», «نامىس», «اسىلىق», «وكىنىش», «التىن انام», تاعى باسقا دا نوۆەللالارى جۇرەك قىلىن شەرتەدى, وقىرمانىن ءيىرىمى تەرەڭ مۇڭعا ورايدى. اقىننىڭ بالالارعا ارناپ جازعان شىعارمالارى دا زەرتتەپ-زەردەلەۋدى قاجەت ەتەدى.
اقىنعا قۇرمەت, تاعزىم رەتىندە تۇركىستان وبلىسى ماقتاارال اۋدانىنىڭ ورتالىعى مىرزاكەنتتىڭ جاڭا شاعىن اۋدانىندا ورنالاسقان قوسجان مۇسىرەپوۆ اتىنداعى جالپى ورتا مەكتەپتە ەسكەرتكىش-ءبيۋستى اشىلدى. نەبارى 35 جىل عۇمىر كەشىپ, قازاق ادەبيەتى كوگىنەن جۇلدىزداي اعىپ وتكەن سىرشىل اقىن ەسكەرتكىشىنىڭ اشىلۋ ءىس-شاراسىنا اۋدان اكىمى باقىت اسانوۆ قاتىسىپ, يگى ءىس وقۋشىلارعا ۇلكەن ۇلگى-ونەگە بولاتىنىن اتاپ ءوتتى. «بۇگىن 90 جىلدىعى اتالىپ ءوتىپ جاتقان اقىن ارامىزدا بولماسا دا ونىڭ عۇمىرىن ءوزىنىڭ شىعارمالارى, ليريكالىق جىرلارى جالعاستىرۋدا. سونداي-اق جاڭادان پايدالانۋعا بەرىلگەن 1 200 ورىندىق قوسجان مۇسىرەپوۆ اتىنداعى مەكتەپتىڭ جاڭا عيماراتىنىڭ الدىندا اقىننىڭ اسقاق ەسكەرتكىشىنىڭ بوي كوتەرۋى – وعان دەگەن حالىق قۇرمەتىنىڭ ودان ءارى اسقاقتاي تۇسكەنىن كورسەتەدى», دەدى باقىت ناسىرحان ۇلى.
مۇنان سوڭ قوعام قايراتكەرى, بەلگىلى پۋبليتسيست-قالامگەر اكىم ىسقاقتىڭ «مەنىڭ قوسجانىم» اتتى كىتابىنىڭ تۇساۋكەسەرى ءوتتى. كىتاپتان قوسجان مۇسىرەپوۆ تۋرالى مول ماعلۇمات تابا الاسىز. قالامگەر تۋرالى زامانداستارىنىڭ, ۇزەڭگىلەس دوستارىنىڭ, ارىپتەستەرىنىڭ, تۋعان-تۋىستارىنىڭ ەستەلىكتەرى كىتاپ مازمۇنىن بايىتا تۇسكەن. سونداي-اق جيناقتا اقىننىڭ دوستارىنا, اعايىن-تۋىستارىنا جازعان حاتتارى بار. ق.مۇسىرەپوۆ اتىنداعى ادەبي بىرلەستىك مۇشەلەرىنىڭ وتىز بەس جىلدا اتقارعان جۇمىستارى دا وسىندا. كىتاپ «قىمبات تا قيماس قوسجان», «جۇرەك كوزىمەن», «تاريح پاراعىن اقتارعاندا», «اقىن شىعارمالارى» اتتى ءتورت بولىمنەن تۇرادى. جيناقتان اقىننىڭ ءبىر توپ ولەڭدەرى مەن نوۆەللالارىن دا وقي الاسىز. ءىس-شارا بارىسىندا اقىننىڭ كوزىن كورگەن ازاماتتار, جازۋشىلار, جۋرناليستەر, ارداگەرلەر ەستەلىكتەرىمەن ءبولىستى. سونداي-اق جيىننىڭ سوڭىندا اقىننىڭ تۋعان ءىنىسى سىرىم مۇسىرەپ ۇلى اعاسىنىڭ ارۋاعىنا باعىشتاپ اس بەردى.
تۇركىستان وبلىسى