پارلامەنت سەناتىنىڭ دەپۋتاتتارى باقىتجان جۇماعۇلوۆ پەن نۇرلان بەكەنوۆ ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىندە بولىپ, پروفەسسور-وقىتۋشىلار قۇرامى جانە ستۋدەنتتەرمەن بىرگە الداعى رەفەرەندۋمدى تالقىلادى.
ب.جۇماعۇلوۆ كەزدەسۋ بارىسىندا كونستيتۋتسيالىق رەفورمالاردىڭ ماڭىزىن اتاپ ءوتىپ, ەلىمىزدىڭ كونستيتۋتسياسىنا ەنگىزىلەتىن وزگەرىستەر مەن تولىقتىرۋلار تۋرالى ەگجەي-تەگجەي ايتىپ بەردى.
«ەلىمىزدە ۇلكەن وزگەرىستەر بولىپ جاتىر. جاڭا قازاقستان يدەياسىنىڭ دامۋى ەكىنشى رەسپۋبليكانىڭ تۇجىرىمداماسىندا مازمۇندالعان. پرەزيدەنت قاسىم-جومارت توقاەۆ وسىعان وراي ۇلكەن وزگەرىستەردى قولعا الدى. ەگەمەندىك, جەرىمىز, ەلىمىز جانە ءتىلىمىز – ءبىزدىڭ باستى قۇندىلىعىمىز بولىپ تابىلادى. ءبىز قازاق ءتىلىنىڭ دامۋىنا باسا نازار اۋدارۋىمىز كەرەك. ارينە, ءبىز باسقا دا شەت تىلدەرىن ءبىلۋىمىز كەرەك, بىراق الدىمەن تۋعان ءتىلىمىزدى قۇرمەتتەۋىمىز كەرەك», دەدى سەنات دەپۋتاتى.
ءوز كەزەگىندە ن.بەكەنوۆ ستۋدەنتتەردى مەملەكەت دامۋىنا بەلسەندى قاتىسۋعا شاقىردى. ول ءۇشىن بيىل 5 ماۋسىمدا وتەتىن رەفەرەندۋمعا قاتىسۋ اسا ماڭىزدى بولىپ وتىر.
«كونستيتۋتسيالىق وزگەرىستەر – بۇل ساياسي رەفورما عانا ەمەس, سونىمەن بىرگە ءبىزدىڭ قوعامداعى ۇلكەن وزگەرىس. قازاقستان رەسپۋبليكاسى كونستيتۋتسياسىنىڭ 33 بابىنا وزگەرىس ەنگىزىلەدى. سوندىقتان ءبارىڭىزدى رەفەرەندۋمدا داۋىس بەرۋگە شاقىرامىن, بۇل ءبىزدىڭ ازاماتتىق پارىزىمىز», دەدى ن.بەكەنوۆ.