مەيىرىم ورداسى

بۇل مەكەمەدە بالالار سانى – 88, ونىڭ ىشىندە جەتىم بالالار سانى – 14, اتا-اناسىنىڭ قامقورلىعىنسىز قالعان بالالار سانى – 74. ءبىر قۋانارلىق جايت, بالالار ۇيىنە كەلەتىن بالالار­دىڭ سانى جىل سايىن كەمىپ كەلەدى. ماسەلەن, 2019 جىلى بالالار ۇيىنە كەلىپ تۇسكەن بالالار 83 بولسا, 2020 جىلى بۇل كورسەتكىش 28-گە ازايىپ 55 بالا قابىلدانعان, ال 2021 جىلى بالالار ۇيىنە 43 بالا كەلگەن.

مەكەمە ديرەكتورى بوتاگوز قاز­بەكوۆا بالالار ۇيىندەگى بالا­لاردىڭ دەنى اتا-اناسىنىڭ قام­قو­ر­لىعىنسىز قالعانى ءۇشىن وسىن­دا كەلگەنىن مالىمدەدى. ياعني ولار الەۋمەتتىك جەتىمدەر توبىنا جاتادى. نەگە بۇل ءۇردىس بەلەڭ الىپ بارادى؟ اتا-انالاردىڭ بەز­بۇيرەك بولىپ كەتكەنى مە؟ الدە ماسكۇنەمدىككە سالىنۋ مەن تۇرمىس تاپشىلىعى ما؟ ەلى­مىزدەگى مامانداردىڭ ايتۋى بو­يىنشا, بالالار ۇيىنە بالالار اسى­راۋشىسىنان ايىرىلۋى, ياعني اتا-اناسىنىڭ ومىردەن ءوتىپ, قاراۋ­سىز قالۋىنا بايلانىستى جانە اتا-اناسىنىڭ ءوز ەركىمەن بالادان باس تارتۋى نەمەسە اتا-انا قۇقى­عىنان شەكتەلۋى سە­بەپتى بالالار ۇيىنە ورنالاس­تى­رىلادى. ال بالالاردىڭ اتا-اناسىنىڭ قام­قورلىعىن­سىز قالۋىنا اكەلىپ سوعار تاعى ءبىر جاعداي – كەيبىر جاس انالار ومىردەگى قيىندىقتار­دان قور­­قىپ بالادان تەرىس اينالۋى سەبەپتى جانە وتباسىندا مۇمكىندىگى شەكتەۋلى (ەرەكشە با­لا­­لاردىڭ) بالالاردىڭ قوعام مۇشەسى بولىپ, بولاشاقتا اياققا تۇرىپ كەتۋىنە كۇمانمەن قاراۋى سال­دارىنان بولىپ وتىر.

اقكول قالالىق بالالار ۇيى­نەن شىققان تۇلەكتەر ەلىمىزدىڭ عانا ەمەس, رەسەيدىڭ جوعارى وقۋ ورىن­دارىندا وقىپ, ءبىلىمىن جەتىل­دىرگەن. وزات تۇلەكتىڭ ءبىرى – مايرا داۆىدوۆا. 1992-2003 جىلدارى بالالار ۇيىندە تاربيەلەنگەن مايرا اۋەلى تومسكىدەگى پوليتەحنيكالىق ۋنيۆەرسيتەتتە يادرولىق فيزيكا جانە تەحنولوگيا ماماندىعى بويىنشا ءبىلىم الادى. 2009 جىلى رەسەي­دىڭ عىلىمي-زەرتتەۋ ينستيتۋتىنىڭ ىشىندەگى يادرولىق ورتالىقتىڭ قىز­مەتكەرى بولىپ ەڭبەك ەتەدى. 2008 جىلى وتاۋ قۇرىپ, بۇگىندە ءۇش بالانىڭ اناسى اتانىپ وتىر.

مايرا ءوز سوزىندە: «بالالار ءۇيى­نىڭ مەيىربان الاقانىنا شەك­سىز العىسىمدى بىلدىرەمىن. كوپ­تەگەن بالانىڭ تاعدىرى – سىز­دەردىڭ قولدارىڭىزدا. تاعدىر تال­كەگىنە تۇسكەن بالالاردىڭ ءومى­رىن جەڭىلدەتىپ, باقىتقا بولەۋ ءۇشىن ءوز جۇرەكتەرىڭىزدەن مەيىرىم مەن پاراساتتىلىق وتىن اقتارا بىلگەندەرىڭىز ءۇشىن العىس ايتامىن», دەگەن بولاتىن.

ال بالالار ۇيىنەن قانات قا­عىپ, جوعارى وقۋ ورنىن ءبىتىرىپ, بۇگىندە ەكى بالانىڭ اناسى بولىپ وتىر­عان ايگۇل دۇيسەمباەۆا اعىنان جارىلا: «اتا-اناسىز, تۋعان تۋىسسىز ءومىر سۇرسەم دە, بالالار ۇيىندە بۇل ولقىلىقتى سەزىنگەن ەمەسپىن. بالالار ۇيىندە بولعان ءار ادامنان ساباق الا ءبىل­دىم. ومىردە جەتىستىككە جەتۋ ءۇشىن كوپ ەڭبەك ەتۋ كەرەك ەكەنىن ءتۇسىندىم. ەشقاشان باسقا جاننان دايىن زاتتى كۇتۋگە بولمايدى. ەڭبەك, ەڭبەك جانە ەڭبەك. قاۋىپسىزدىك پەن ماحابباتتى سەزىن­دىرگەنى ءۇشىن ءبىزدىڭ بالالار ءۇيىنىڭ ۇجىمىنا ۇلكەن العىس ايتامىن», دەدى.

بالالار ۇيىندە جەتكىنشەكتەر بولاشاققا ەركىن قانات قاعۋى ءۇشىن بارلىق جاعداي جاسالعان. ءارتۇرلى سپورتتىق ويىن الاڭدارى مەن بالالاردىڭ زەيىنى اشىلۋى ءۇشىن كىتاپحانا قىزمەت كورسەتىپ وتىر. ءار بالانىڭ تاعدىرىنا جەكە-جەكە نازار سالىپ, بۇگىننەن ەرتەڭگە جولداما بەرگەن مەيىرىم ورداسى الداعى ۋاقىتتا دا قاجىرلى ەڭبەگىمەن العا ادىمداي بەرەرى ءسوزسىز.