شايبالى حوككەيدەن قازاقستان ۇلتتىق قۇراماسى كەشە فينليانديا استاناسى – حەلسينكيدە ۇيىمداستىرىلعان الەم چەمپيوناتىنىڭ توپتىق كەزەڭىندەگى سوڭعى ويىنىن وتكىزدى. جەرلەستەرىمىز حەلسينكيدە ورنالاسقان 10 مىڭعا جۋىق جانكۇيەر سىياتىن «مۇز سارايى» مۇزايدىنىندا جەتى كەزدەسۋ وتكىزىپ, بىرەۋىندە عانا جەڭىسكە جەتتى. ءسويتىپ, ءوزىنىڭ ەليتالى ديۆيزيونداعى ورنىن ساقتاپ قالدى. ال بۇعان دەيىن دانيا قۇراماسىنان (1:9) ءىرى ەسەپپەن ۇتىلسا, كەيىنگى تۋرلاردا فرانتسيا (1:2), شۆەيتساريا (2:3), كانادا (3:6) جانە سلوۆاكيا (3:4) قۇرامالارىنان جەڭىلىپ قالعان ەدى.
جەكسەنبى كۇنى كوماندالار توپتىق كەزەڭنىڭ التىنشى تۋر ويىندارىن وتكىزدى. بۇل تۋردا قازاقستان قۇراماسى گەرمانيا حوككەيشىلەرىمەن شەبەرلىك بايقاستى. اسا تارتىستى وتكەن ماتچتا جەرلەستەرىمىز تاعى دا ءبىر شايبا ايىرماشىلىعىمەن جەڭىلىپ قالدى – 4:5. بۇل – يۋري ميحايليس شاكىرتتەرىنىڭ ءبىر شايبا ايىرماشىلىعىمەن جەڭىلگەن ءتورتىنشى ويىنى بولدى. ال گەرمانيا قۇراماسى العاشقى تۋردا كاناداعا (3:5) ەسە جىبەرگەنىمەن, قالعان ويىنداردىڭ بارىندە (سلوۆاكيا – 2:1, فرانتسيا – 3:2, دانيا – 1:0, يتاليا – 9:4) قارسىلاستارىنان ايلاسىن اسىردى. التى ويىندا 15 ۇپاي جيناعان نەمىستەر مەرزىمىنەن بۇرىن الەم بىرىنشىلىگىنىڭ پلەي-وفف كەزەڭىنە جولداما الدى.
ءۇش مىڭنان اسا جانكۇيەر تاماشالاعان قازاقستان – گەرمانيا كەزدەسۋىندە ەسەپتى ءبىرىنشى بولىپ جەرلەستەرىمىز اشتى. باسەكەنىڭ ءۇشىنشى مينۋتىندا كوك جولاقتىڭ بويىندا قارسىلاس ويىنشىنىڭ قاتەلىگىنەن كەيىن شايباعا يەلىك ەتكەن قۇراما كاپيتانى رومان ستارچەنكو چەمپيوناتتاعى العاشقى گولىن سالدى. ارادا ەكى مينۋت وتكەندە قازاقستاندىق جانكۇيەرلەردىڭ قۋانىشى سۋ سەپكەندەي باسىلدى. نەمىستەر تارازى باسىن جىلدام تەڭەستىرىپ كەتتى. بۋندەسمانشافت حوككەيشىلەرى بەسىنشى مينۋتتا قورعاۋشى يوناس ميۋللەردىڭ جەكە شەبەرلىگىنىڭ ارقاسىندا تابلوداعى كورسەتكىشتى 1:1-گە وزگەرتتى. الىستان باعىتتاعان بۇل سوققى اندرەي شۋتوۆ ءۇشىن وڭاي ولجا بولۋى كەرەك ەدى, بىراق قاقپاشىمىز ميۋللەردىڭ سوققىسىنىڭ الدىندا دارمەنسىز قالدى. 15-مينۋتتا قازاقستان قۇراماسى تاعى دا ەسەپتە العا شىقتى. ەگور پەتۋحوۆ ەكى قورعاۋ- شىنىڭ قورشاۋىندا قالىپ قويسا دا, مەرگەندىگىمەن كوزگە ءتۇستى. ايتكەنمەن, نەمىستەردىڭ قايتا تارازى باسىن تەڭەستىرۋىنە نەبارى 30 سەكۋندتىڭ ءوزى جەتكىلىكتى بولدى. بۇل جولى لەونحارد پفەدەرل گول سوقتى. ال ۇزىلىسكە ءبىر مينۋت قالعاندا دانيەل فيشبۋح كومانداسىن ەسەپتە العا شىعاردى – 3:2. بۇل جەردە دە شۋتوۆ وتە ءساتسىز وينادى.
ەكىنشى كەزەڭدە قۇرامالار ءبىر-ءبىر شايبا سوقتى. ۇزىلىستەن كەيىن مۇزايدىندا بەلسەندى ويناعان قازاقستاندىق حوككەيشىلەر سان باسىمدىعىنا يە بولسا دا, ەسەپتى تەڭەستىرەتىن مۇمكىندىكتى ۇتىمدى پايدالانا المادى. كەيىن گەرمانيا قۇراماسى ءاليحان اسەتوۆ پەن كيريلل ساۆيتسكيدىڭ قاتار ەرەجە بۇزۋىنىڭ سالدارىنان ءبىر ەمەس, ەكى ويىنشى باسىمدىعىنا قول جەتكىزىپ, ءوز مۇمكىندىكتەرىن ءساتتى پايدالاندى. ناتيجەلى ويىنىمەن كوزگە تۇسكەن لۋكاس رەيحەل قۇراماسىنىڭ ءتورتىنشى شايباسىن سالدى. ءسويتىپ, ەكىنشى كەزەڭنىڭ ورتا تۇسىنا جەتپەي جاتىپ ەكى شايبا ايىرماشىلىعىمەن ەسەپتە العا شىعىپ العان گەرمانيالىقتار بىرتە-بىرتە قارقىنىن باسەڭدەتىپ, كۇشىن كەلەسى ويىندارعا ساقتاپ جاتقانداي اسەر قالدىردى. ال ۋاقىت وزعان سايىن بەلسەندىلىگىن ارتتىرعان جەرلەستەرىمىز ۇزىلىسكە 30 سەكۋند قالعاندا ەسەپ ايىرماسىن ءبىر شايباعا دەيىن قىسقارتتى. بۇل جولى پاۆەل اكولزين دالدىك تانىتتى.
ءۇشىنشى كەزەڭ باستالعان بەتتە نيكيتا ميحايليس تارازى باسىن تەڭەستىرىپ (4:4), قازاقستاندىق جانكۇيەرلەردى ءبىر سەرپىلتىپ تاستاعان ەدى. بىراق وتكەن ويىندارداعى قاتەلىكتەردەن ءتيىستى قورىتىندى شىعارماعان ءبىزدىڭ جىگىتتەر تاعى قورعانىستا جاس بالانىڭ قاتەلىگىن جاساپ, بولمايتىن جەردە قاقپاعا گول وتكىزىپ الدى. گولدىڭ اۆتورى – يازين ەليتس. بۇل جەردە دە قاقپاشىمىز ءساتسىز وينادى. وسىلايشا, گەرمانيا قۇراماسى ماڭىزدى ءۇش ۇپايىن ولجالاپ, تۋرنير كەستەسىندە ەكىنشى ورىنعا كوتەرىلدى. ال قاتارىنان التىنشى ويىندا جەڭىلگەن قازاقستان سوقىر ۇپايسىز كوش سوڭىندا قالىپ قويدى.
اراعا ءبىر كۇن سالىپ جەرلەستەرىمىز سوڭعى تۋردا ەليتالى ديۆيزيونداعى ورنىن ساقتاپ قالۋ ءۇشىن التى ويىندا ءبىر ۇپاي جيناعان يتاليا قۇراماسىمەن شەبەرلىك بايقاستى. باس باپكەر يۋري ميحايليس وتكەن ويىنمەن سالىستىرعاندا بۇل جولى نەگىزگى قۇرامعا تەك ءبىر عانا وزگەرىس جاسادى. گەرمانيامەن بولعان ماتچتا جاراقات الىپ قالعان شابۋىلشى كيريلل ساۆيتسكيدىڭ ورنىنا «سارىارقا» ويىنشىسى سايان دانياردى نەگىزگى تىزىمگە قوستى. الايدا باس باپكەر وعان مۇزايدىندا ونەر كورسەتۋگە مۇمكىندىك بەرمەدى.
كەزدەسۋ باستالعان بەتتە ويىن تىزگىنىن قولىنا العان قازاقستان قۇراماسىنىڭ حوككەيشىلەرى العاشقى كەزەڭنىڭ بەل ورتاسىنان اسقاندا عانا ەسەپتى اشتى. ماتچتىڭ 12-مينۋتىندا كەرتيس ۆولك سان باسىمدىعىن جۇزەگە اسىرسا, ارادا ءۇش مينۋت وتكەندە قارسىلاس كوماندا دا سان باسىمدىعىنىڭ ارقاسىندا تارازى باسىن تەڭەستىرىپ كەتتى. گولدىڭ اۆتورى – برەندون ماكنەللي. ءبىرىنشى كەزەڭنىڭ اياقتالۋىنا ءتورت مينۋت قالعاندا قورعاۋشى ۆالەري ورەحوۆ قازاقستان قۇراماسىن ەسەپتە قايتا العا شىعاردى.
ەكىنشى كەزەڭدە قۇرامالار ءبىر-ءبىر شايبا الماستى. 25-مينۋتتا قازاقستان قۇراماسى ساپىنان ءاليحان اسەتوۆ مەرگەندىك تانىتسا, يتاليا حوككەيشىلەرىنەن ديەگو كوستنەر گول سوقتى. ءۇشىنشى كەزەڭدە جەرلەستەرىمىز تاعى دا مىقتىلىق تانىتتى. 44-مينۋتتا رومان ستارچەنكو ارتىق قۇرامدا ويناعاندا شايبا سوقسا, ەكى مينۋتتان كەيىن نيكيتا ميحايليس ويىننىڭ نۇكتەسىن قويدى. ماتچتىڭ سوڭىنا قاراي يتاليا قۇراماسىنىڭ باس باپكەرى مۇزايدىنعا التىنشى حوككەيشىنى شىعارعانىمەن, ونىسى ناتيجە بەرمەدى. قورىتىندى ەسەپ – 5:2. وسىلايشا, قازاقستان قۇراماسى جالعىز جەڭىسىنىڭ ارقاسىندا ءۇش ۇپايمەن سەگىز كوماندانىڭ ىشىندە جەتىنشى ورىنعا تابان تىرەپ, ەليتالى ديۆيزيونداعى ورنىن ساقتاپ قالدى.
دەي تۇرعانمەن, قازاقستان قۇراماسىنىڭ بيىلعى چەمپيوناتتاعى ويىنى جانكۇيەرلەردىڭ كوڭىلىنەن شىعا قويعان جوق. جەتى ويىنىڭ تەك بىرەۋىندە عانا جەڭىسكە جەتۋ جاقسى ناتيجە ەمەس ەكەنى ايتپاسا دا تۇسىنىكتى. ەندى فەدەراتسيا باسشىلىعى وسى چەمپيوناتتان قورىتىندى شىعارىپ, كەلەسى جىلعى الەم بىرىنشىلىگىندە جارقىن ونەر كورسەتەدى دەپ ۇمىتتەنەمىز.