وڭىرلىك كوممۋنيكاتسيالار قىزمەتىندە جالپىحالىقتىق رەفەرەندۋمعا بايلانىستى دوڭگەلەك ۇستەل ءوتىپ, وعان پارلامەنت سەناتىنىڭ دەپۋتاتى, رەفەرەندۋمعا بايلانىستى قۇرىلعان رەسپۋبليكالىق شتاب مۇشەسى مۇرات باقتيار ۇلى, باق وكىلدەرى قاتىستى.
كونستيتۋتسياعا ەنگىزىلەتىن وزگەرىستەر مەن تولىقتىرۋلاردىڭ ماڭىزدىلىعى ايتىلعان جيىندا سەناتور حالىقتىڭ بۇل ساياسي ناۋقاننان ۇلكەن ءۇمىت كۇتىپ وتىرعانىن ايتتى.
– مەملەكەت باسشىسى ناۋرىز ايىنداعى جولداۋىندا ساياسي رەفورمانىڭ وزگەرەتىنىن جانە ەكونوميكالىق تۇرعىدان ناقتى ارەكەتتەر جۇرگىزىلەتىنىن ايتقانىن بىلەسىزدەر. سونىڭ باستى قادامى – وسى كونستيتۋتسياداعى وزگەرىس. مەن وسى وزگەرىستەردى ۇشكە ءبولىپ ايتار ەدىم. ونىڭ العاشقىسى – بيلىك تارماعى اراسىنداعى قارىم-قاتىناستى وڭتايلاندىرۋ. ەكىنشىسى – ازاماتتاردى مەملەكەتتىك بيلىككە تارتۋ, ارالاستىرۋ. ءۇشىنشى بولىگى – ادام جانە ادام قۇقىقتارى. ەندى «بۇل وزگەرىستەرگە ەل قالاي قارايدى؟» دەگەنگە كەلەيىك. جەر-جەردە وتكىزىلىپ جاتقان كەزدەسۋلەردە جۇرتشىلىقتىڭ جاڭارۋعا دەگەن ۇمتىلىسى بايقالادى, – دەدى مۇرات باقتيار ۇلى.
اتا زاڭ تاريحىن سارالاعان سەناتور 1993 جىلعى 28 قاڭتاردا قابىلدانعان كونستيتۋتسيانىڭ ەرەكشەلىگىنە توقتالدى. بىراق كوپ بيلىكتى پارلامەنتكە بەرگەن سول كونستيتۋتسيادان كەيىن زاڭداردىڭ قابىلدانۋى قيىندادى. سەناتور زاڭداردىڭ التى اي, 1 جىلعا دەيىن ايتىس-تارتىسقا ءتۇسىپ قابىلدانۋى, كەشىگۋى ساياسي-ەكونوميكالىق جۇيەگە قاتتى اسەر ەتە باستاعانىن اشىق ايتتى.
مۇرات باقتيار ۇلى قازىرگى كونستيتۋتسيا دا العاشقى جىلدارى نارىق تالابىنا ساي زاڭدار شىعۋىنا نەگىز بولىپ, ول ەكونوميكامىزدى العا جىلجىتقانىن اتاپ ءوتتى. بىراق كەيىننەن كۇشەيگەن پرەزيدەنتتىك بيلىك, پارلامەنت قابىلداعان كونستيتۋتسيالىق رەفورمالار ساياسي جۇيەنىڭ دامۋىن تەجەدى.
– حالىق پەن بيلىك اراسىندا سەنىم بولعاندا عانا قوعام العا باسادى. مىسالى, پرەزيدەنتتىڭ ەكى مەرزىمگە عانا سايلانۋى, ونىڭ جاقىن تۋىستارىنىڭ لاۋازىمدى قىزمەتتەرگە تاعايىندالۋىنا توقتاۋ قويىلۋى – ەل كۇتكەن جاڭالىق. نەگىزگى زاڭداعى باسقا دا وزگەرىستەر ازاماتتارىمىزدىڭ ەرتەڭگە دەگەن سەنىمىن وياتادى, – دەدى سەناتور.
قىزىلوردا