برازيليانىڭ كاشياس-دۋ-سۋل قالاسىندا ەكى اپتاعا جالعاسقان XXIV جازعى سۋردليمپيادا ويىندارى ءوز مارەسىنە جەتتى. ءار ءتورت جىل سايىن ۇيىمداستىرىلاتىن بيىلعى دودادا قازاقستاندىق سپورتشىلار 4 التىن, 7 كۇمىس, 18 قولا مەدال جەڭىپ الدى.
الەمنىڭ 100 ەلىنەن 4 000-نان استام سپورتشى قاتىسقان جارىستا جەرلەستەرىمىز جالپى سانى 29 جۇلدە ەنشىلەپ, جالپىكوماندالىق ەسەپتە 13-ورىنعا تابان تىرەدى. مەدال كورسەتكىشى بويىنشا ۋكراينا سپورتشىلارىنا تەڭ كەلەر قارسىلاس تابىلمادى. ولار 138 (62 التىن, 38 كۇمىس, 38 قولا) مەدال جيىنتىعىن ولجالاپ, تۋرنير كەستەسىندە توپ جاردى. ەكىنشى ورىن العان اقش قۇراماسىنىڭ قورجىنىندا 55 (20, 11, 14) مەدال بار بولسا, ءۇشىنشى ورىنداعى يران سپورتشىلارى 40 (14, 12, 14) جۇلدە جەڭىپ الدى.
وسىدان ءتورت جىل بۇرىن سامسۋندا (تۇركيا) وتكەن XXIII سۋردليمپيادادا قازاقستاندىق سپورتشىلار 1 التىن, 1 كۇمىس جانە 5 قولا مەدالمەن جالپىكوماندالىق ەسەپتە 25-ورىنعا تۇراقتاعان ەدى. ايتا كەتەيىك, سۋردليمپيادالىق سپورت تۇرلەرىن قولداۋ ماقساتىندا مەملەكەت تاراپىنان بەرىلەتىن قارجىلاي سىياقى مولشەرى وليمپيادا جانە پاراليمپيادامەن تەڭەستىرىلگەن.