فرانتسيانىڭ استاناسى – پاريجدە «ۇلكەن دۋلىعا» ساناتىنداعى ەڭ ءىرى ءتورت جارىستىڭ ەكىنشىسى – «رولان گارروس» ءتۋرنيرىنىڭ ىرىكتەۋ كەزەڭدەرى ءوتىپ جاتىر. ال جارىستىڭ رەسمي شىمىلدىعى 22 مامىردا تۇرىلەدى. وعان دەيىن سپورتشىلار ىرىكتەۋ سايىستارىن وتكىزىپ, نەگىزگى كەزەڭگە شىعۋ ءۇشىن شەبەرلىك بايقاسادى. تەننيسشىلەر اراسىنداعى الەمدەگى ەڭ بەدەلدى جارىستىڭ ءبىرى سانالاتىن دودادا قازاقستاننىڭ بىرنەشە وكىلى ونەر كورسەتەدى.
قازاقستاندىق تەننيسشىلەردەن ءتۋرنيردىڭ نەگىزگى كەزەڭىنە ايەلدەر اراسىندا ەلەنا رىباكينا مەن يۋليا پۋتينتسەۆا, ەرلەردەن الەكساندر بۋبليك تىكەلەي جولداما الدى. جۇپتىق سىندا اندرەي گولۋبەۆ, اننا دانيلينا, الەكساندر نەدوۆەسوۆ, سونداي-اق ا.بۋبليك پەن ە.رىباكينا دا باق سىنايدى دەپ جوسپارلانعان. وتكەن جىلى وسى جارىستىڭ جۇپتىق باسەكەسىندە ا.گولۋبەۆ پەن ا.بۋبليك فينالعا دەيىن جەتىپ, باس جۇلدە ءۇشىن بولعان سايىستا فرانتسيالىق نيكوليا مايۋ مەن پەر-يۋگ ەربەرگە ەسە جىبەرگەن ەدى – 6:4, 6:7 (1:7), 4:6. ال ەرلەر اراسىنداعى قازاقستاننىڭ ءبىرىنشى راكەتكاسى الەكساندر بۋبليك 2019 جانە 2020 جىلدارى ەكى رەت ءتۋرنيردىڭ ەكىنشى كەزەڭىنە دەيىن جەتكەن بولاتىن.
سونىمەن قاتار بىلتىر ايەلدەر اراسىندا ەلىمىزدىڭ ءبىرىنشى راكەتكاسى ە.رىباكينا دا پاريج كورتتارىندا ءساتتى ويناپ, رەسەيلىك اناستاسيا پاۆليۋچەنكوۆامەن بىرگە جۇپتىق باسەكەدە شيرەك فينالعا دەيىن جەتىپ, جەكەلەي سىننىڭ شيرەك فينالىنداعى اسا تارتىستى ويىندا ءتۋرنيردىڭ بولاشاق ءفيناليسى ا.پاۆليۋچەنكوۆادان ۇتىلىپ قالعان ەدى – 7:6 (7:2), 2:6, 7:9. يۋليا پۋتينتسەۆا ءۇشىن فرانتسيانىڭ اشىق چەمپيوناتى ءوزىنىڭ ەڭ سۇيىكتى تۋرنيرلەرىنىڭ ءبىرى سانالادى. سەبەبى ول ەكى رەت «رولان گارروستىڭ» شيرەك فينالىنا دەيىن جەتتى.
سونداي-اق جارىستىڭ ىرىكتەۋ سايىستارىنا زارينا دياس, دميتري پوپكو جانە تيموفەي سكاتوۆ قاتىسۋدا. جاراقاتىنان ەمدەلىپ جاتقان ميحايل كۋكۋشكين بۇل تۋرنيرگە قاتىسا العان جوق. ىرىكتەۋ سايىستارىنىڭ العاشقى اينالىمىندا دميتري پوپكو الەمدىك رەيتينگتە 141-ورىندا تۇرعان ارگەنتينالىق حۋان لوندەرومەن شەبەرلىك بايقاسادى. ەكى تەننيسشى بۇعان دەيىن 2018 جىلى ۋرۋگۆايدا وتكەن حالىقارالىق تۋرنيردە كەزدەسىپ, جەرلەسىمىز ءۇش سەتتە 2:6, 6:4, 6:4 ەسەبىمەن جەڭىسكە جەتكەن. تيموفەي سكاتوۆ امەريكالىق ميتچەلل كريۋگەرمەن (145) كۇش سىناسادى. تيموفەي مەن ميتچەلل العاش رەت بيىل جىل باسىندا اۋسترالياداعى تۋرنيردە جولىعىپ, كريۋگەر ەكى سەتتە – 6:1, 6:0 ەسەبىمەن باسىم تۇسكەن بولاتىن.
زارينا دياس ىرىكتەۋدىڭ العاشقى كەزەڭىندە رەسەيلىك اناستاسيا گاسانوۆامەن (155) كەلەسى اينالىمنىڭ جولداماسىن ساراپقا سالادى. ەكى تەننيسشى بۇعان دەيىن ءبىر-بىرىمەن كەزدەسپەگەن.
ايتا كەتەيىك, بيىلعى «رولان گارروس» ءتۋرنيرىنىڭ جالپى جۇلدە قورى – 43,6 ملن ەۋرونى قۇرايدى. ءبىرىنشى اينالىمدا جەڭىلىس تاپقاندار 62 مىڭ ەۋرو السا, چەمپيوندار 2,2 ملن ەۋروعا دەيىن تابىس تابادى.