الەم چەمپيوناتىنا جولداما الدى
قازاقستاننىڭ 14 جاسقا دەيىنگى جاسوسپىرىمدەر قۇراماسى تۇڭعىش رەت الەم چەمپيوناتىندا باق سىناۋ مۇمكىندىگىنە يە بولدى.
قتف ءباسپاسوز قىزمەتىنىڭ مالىمەتى بويىنشا, ءۇندىستاننىڭ نيۋ-دەلي قالاسىندا وتكەن ازيا/تىنىق مۇحيت ايماعى ىرىكتەۋ تۋرنيرىندە قازاقستاندىقتار ءۇشىنشى ورىنعا يە بولدى. قازاقستان جاسوسپىرىمدەر قۇراماسى ءۇشىنشى ورىن ءۇشىن باسەكەدە تايلاندپەن سىنعا ءتۇستى. ءبىرىنشى ۇپايدى دامير جالعاسباي اپەردى. جاس قازاقستاندىق تەننيسشى ءبىرىنشى پارتيادا 2:6 ەسەبىمەن ەسە جىبەرسە, ەكىنشى سەتتە 1:4 ەسەبىمەن جەڭىلىپ جاتىپ, تارازى باسىن وزىنە اۋدارا ءبىلدى. ءۇشىنشى, شەشۋشى پارتيادا ەسەپ 3:5 بولعان مەزەتتە تايلاندتىق تەننيسشىنىڭ ەكى ماتچبولىن پايدالانۋىنا مۇمكىندىك بەرگەن جوق. سوسىن تاعى ءبىر برەيك جاساپ, جەڭىستى ج ۇلىپ الدى – 7:5. بۇدان كەيىن زاڭعار نۇرلان ۇلى قارسىلاسىن 6:2, 6:1 ەسەبىمەن تىزە بۇكتىردى. ەسەپ – 2:0, قازاقستاننىڭ پايداسىندا.
وسىلايشا, قازاقستان جاسوسپىرىمدەر قۇراماسى العاش رەت بيىل كۇزدە وتەتىن الەم چەمپيوناتىنىڭ فينالدىق كەزەڭىنە قاتىسادى. سونىمەن قاتار ەرەسەكتەر اراسىنداعى قازاقستاننىڭ ەرلەر جانە ايەلدەر قۇراماسى دا كۇزدە ۇيىمداستىرىلاتىن الەم چەمپيوناتىندا باق سىنايدى.
جىگىتتەر اقش-تا جۇدىرىقتاسادى
جۋىردا عانا كاسىپقوي بوكسقا اۋىسقان بوكستان ۇلتتىق قۇرامانىڭ ەكى وكىلى, قازاقستاندىق Suleimen Promotion كومپانياسىمەن جۇمىس ىستەيتىن ابىلايحان ءجۇسىپوۆ پەن ءابىلحان امانقۇل مامىر ايىندا اقش-تا دەبيۋتتىك جەكپە-جەكتەرىن وتكىزەدى.
ەكى بوكسشىمىز دا ورتا سالماقتا ونەر كورسەتەتىن جەرلەسىمىز جانىبەك ءالىمحان ۇلىنىڭ (11-0, 7 كو) الداعى كەزدەسۋىنىڭ اندەركاردىندا جۇدىرىقتاساتىنى بەلگىلى بولدى. بۇل – 2017 جىلعى الەم بىرىنشىلىگىنىڭ جانە 2018 جىلعى جازعى ازيا ويىندارىنىڭ كۇمىس جۇلدەگەرى, ازيا چەمپيوناتىنىڭ قولا جۇلدەگەرى ءابىلحان امانقۇل ءۇشىن كاسىپقوي بوكس الەمىندەگى العاشقى جەكپە-جەگى بولسا, ۇلتتىق قۇرامانىڭ كاپيتانى, ءۇش دۇركىن الەم چەمپيوناتىنىڭ قولا جۇلدەگەرى, ازيا بىرىنشىلىگىنىڭ قولا جۇلدەگەرى ابىلايحان ءجۇسىپوۆتىڭ ەكىنشى ايقاسى.
ايتا كەتەيىك, ج.ءالىمحان ۇلى ءوزىنىڭ كەلەسى كەزدەسۋىن 21 مامىر كۇنى لاس-ۆەگاس (نەۆادا شتاتى, اقش) قالاسىندا وتكىزەدى. ونىڭ قارسىلاسى – ۇلىبريتانيالىق دەنني ديگنۋم (14-0-1, 8 كو). بۇل كەزدەسۋدە WBو ۇيىمىنىڭ «ۋاقىتشا» چەمپيوندىق اتاعى ساراپقا سالىنادى.
جاپپاي جۇگىرۋگە قاتىستى
قورعانىس مينيسترلىگىنىڭ ۇيىمداستىرۋىمەن قازاقستان قارۋلى كۇشتەرىنىڭ 30 جىلدىعىنا وراي ەلوردادا «وتان. ارميا. جاس سارباز» اتتى جاپپاي جۇگىرۋ ءوتتى.
العاش رەت وتكىزىلگەن اۋقىمدى ءىس-شارانىڭ ماقساتى – وسكەلەڭ ۇرپاقتى سپورت پەن سالاماتتى ءومىر سالتىنا باۋلۋ, ولاردىڭ ىنتا-جىگەرىن ارتتىرۋ, جاستارعا بۇقارالىق سپورتتى ناسيحاتتاۋ. سول سەبەپتەن ءتوزىم مەن جىگەر كۇشىن ارتتىراتىن سپورت تۇرلەرىنىڭ كەڭ دامۋىنا اتسالىسۋ, دەيدى ۇيىمداستىرۋشىلار.
جاپپاي جۇگىرۋگە اقمولا گارنيزونىنىڭ اسكەري قىزمەتشىلەرى, باسقا دا اسكەرلەر مەن اسكەري قۇرىلىمداردىڭ اسكەري قىزمەتشىلەرى, نۇر-سۇلتان قالاسى «جاس سارباز» قوزعالىسىنىڭ, س.نۇرماعامبەتوۆ اتىنداعى اسكەري كوللەدجدىڭ تاربيەلەنۋشىلەرى قاتىستى.