قاراعاندىنىڭ «سارىارقا» حوككەي كلۋبى قاتارىنان ەكىنشى رەت, ءوز تاريحىندا ءۇشىنشى مارتە ەل چەمپيوناتىنىڭ باس جۇلدەسىن جەڭىپ الدى. جەتى ويىنعا جالعاسقان بيىلعى قازاقستان بىرىنشىلىگىنىڭ فينالدىق باسەكەسىندەگى شەشۋشى ماتچتا «كەنشىلەر» ۇجىمى ءوز مۇزايدىنىندا كوكشەتاۋدىڭ «ارلانىن» قابىلداپ, ءىرى ەسەپپەن جەڭىسكە جەتتى.
ىرگەتاسى 2006 جىلى قالانعان قاراعاندىلىق «سارىارقا» حوككەي كلۋبى 2009 جىلعا دەيىن رەسەيدىڭ ءارتۇرلى چەمپيوناتتارىندا ونەر كورسەتىپ, جۇلدەلى ورىنداردان كورىنىپ ءجۇردى. ماسەلەن, 2006-2007 جىلعى ماۋسىمدا رەسەيدىڭ 1 ليگاسىندا قولا جۇلدە جەڭىپ السا, كەلەسى جىلى جارىس جەڭىمپازى اتاندى. ال 2009 جىلى ەلىمىزدە ەرلەر كوماندالارى اراسىندا شايبالى حوككەيدەن ءبىرىنشى ۇلتتىق چەمپيونات وتكىزۋ تۋرالى شەشىم قابىلداندى. ءۇش جىلدىڭ ىشىندە رەسەيدە ءبىراز تاجىريبە جيناقتاعان «سارىارقا» ەل چەمپيوناتىنىڭ العاشقى ماۋسىمىندا-اق قارسىلاس شاق كەلتىرمەي, باس جۇلدەنى ولجالادى.
قازاقستانداعى العاشقى چەمپيوندىعىنان كەيىن قاراعاندىلىق كوماندا قايتادان رەسەيدى بەتكە الىپ, جوعارى حوككەي ليگاسىندا ونەر كورسەتۋگە بەل بۋدى. جەرلەستەرىمىز 10 جىلعا جۋىق ۋاقىتتىڭ ىشىندە ەكى مارتە پەتروۆ كۋبوگىنا قول جەتكىزدى. اتاپ ايتقاندا, 2014 جىلعى باسەكەنىڭ فينالىندا تۇمەننىڭ «رۋبين» كلۋبىنان التى ويىندا 4:2 ەسەبىمەن باسىم تۇسسە, اراعا بەس جىل سالىپ 2019 جىلى فينالدا ءدال وسى «رۋبينمەن» كەزدەسىپ, بەس ويىنعا جالعاسقان ماتچتا 4:1 ەسەبىمەن جەڭىسكە جەتتى. وسىلايشا, جحل-دا ءتاۋىر ناتيجە كورسەتىپ كەلە جاتقان «سارىارقا» 2020 جىلى پاندەمياعا بايلانىستى ءتۇرلى شەكتەۋلەردەن كەيىن قايتادان ەل بىرىنشىلىگىندە باق سىناۋعا ءماجبۇر بولدى.
قاراعاندىلىق كوماندا 2021 جىلدىڭ كوكتەمىندە ەكىنشى مارتە قازاقستان بىرىنشىلىگىندە توپ جاردى. التى ويىنعا جالعاسقان فينالدىق باسەكەدە «سارىارقا» كوكشەتاۋدىڭ «ارلانىنان» 4:2 ەسەبىمەن ايلاسىن اسىرىپ, جانكۇيەرلەرىنىڭ قوشەمەتىنە بولەندى. ءبىر قىزىعى, بيىلعى فينالدا دا ەكى كوماندانىڭ جولدارى قايتا ءتۇيىستى. تۇراقتى بىرىنشىلىكتە «سارىارقا» مەن «ارلان» بىلتىرعىداي ءبىرىنشى جانە ەكىنشى ورىندى يەلەنىپ, پلەي-وففقا جولداما الدى. ءسويتىپ, ەكى ۇجىم دا فينالعا دەيىن قارسىلاستارىن قاپى قالدىرىپ, قاتارىنان ەكىنشى جىل فينالدا قايتا جولىقتى. التى ويىندا ءبىر-ءبىرىن جەڭە الماعان كوماندالار (3:3) سوڭعى شەشۋشى ويىندى قاراعاندىدا وتكىزدى.
جەتىنشى ماتچتىڭ العاشقى شايباسىن ءبىرىنشى كەزەڭنىڭ 15-مينۋتىندا مۇزايدىن يەلەرىنەن دەنيس فەدوروۆ سوقتى. ەكىنشى كەزەڭ باستالعان بەتتە سايان دانيار «سارىارقانىڭ» ەسەپتەگى باسىمدىعىن ەسەلەي ءتۇستى – 2:0. بۇل وزدەرىنىڭ فينالدىق باسەكەدەگى سوڭعى مۇمكىندىگى ەكەنىن جاقسى تۇسىنگەن كوكشەتاۋدان كەلگەن جىگىتتەر جەڭىلىپ جاتقاندارىنا قاراماستان, جانۇشىرا العا ۇمتىلدى. ناتيجەسىندە, ەكىنشى كەزەڭنىڭ سوڭىنا دەيىن ولار تارازى باسىن تەڭەستىرىپ ۇلگەردى. بۇل گولداردىڭ اۆتورلارى – الەكساندر ەۆگرافوۆ (33 مينۋت) پەن نيكيتا لۋكين (37 مينۋت). الايدا ەكىنشى كەزەڭنىڭ اياقتالۋىنا توعىز سەكۋند قالعاندا ميحايل راحمانوۆ «سارىارقانى» تاعى دا ەسەپتە العا شىعاردى – 3:2.
ءۇشىنشى كەزەڭدە دە شيەلەنىستى ماتچ جالعاستى. بۇل رەتتە جەرگىلىكتى حوككەيشىلەردىڭ اسىعى الشىسىنان ءتۇستى. باس-اياعى 10 مينۋتتىڭ ىشىندە سەرگەي بارباشەۆ (49 مينۋت) پەن نيكيتا اناحوۆسكي (59 مينۋت) تاعى ەكى رەت نىسانانى ءدال كوزدەدى. قورىتىندى ەسەپ – 5:2, «سارىارقانىڭ» پايداسىنا.
وسىلايشا, ءۇشىنشى چەمپيوندىعىنا قول جەتكىزگەن قاراعاندىلىق ۇجىم كۋبوك سانى بويىنشا پاۆلوداردىڭ «ەرتىسىمەن» تەڭەستى. ال ەل بىرىنشىلىگىنىڭ ەڭ تيتۋلدى كومانداسى وسكەمەننىڭ «تورپەدوسى» سانالادى. شىعىس قازاقستاننىڭ كلۋبى 1992 جىلدان بەرگى چەمپيوناتتا 13 مارتە تۇعىردىڭ ەڭ بيىك ساتىسىنان كورىنگەن. ولار قازاقستان چەمپيوناتىندا ەڭ كەيىنگى رەت 2007 جىلى دارا شىققان ەدى. كەيىننەن وسكەمەندىك كوماندا دا جوعارى حوككەي ليگاسىندا ونەر كورسەتۋ تۋرالى شەشىم قابىلداعان بولاتىن.
ەل بىرىنشىلىگىنىڭ قورىتىندىسى بويىنشا, يليا رۋميانتسەۆ («ارلان») بيىلعى ماۋسىمنىڭ ەڭ ۇزدىك قاقپاشىسى, ەدگارس سيكسنا («سارىارقا») ۇزدىك قورعاۋشى جانە تاعى ءبىر «سارىارقالىق» ميحايل راحمانوۆ ۇزدىك شابۋىلشى اتاندى. ال «اقتوبە» كلۋبىنىڭ ويىنشىسى يۆان زينچەنكو ماۋسىمنىڭ ۇزدىك جاس ويىنشىسى اتالىمىنا يە بولدى.
فينالدىق ماتچ اياقتالا سالىسىمەن حوككەيدەن قازاقستان ۇلتتىق قۇراماسىنا شاقىرتۋ العان «سارىارقا» جانە «ارلان» كلۋبىنىڭ ويىنشىلارى ەلوردادا جاتتىعۋ جيىنىن وتكىزىپ جاتقان نەگىزگى قۇرامنىڭ قاتارىنا قوسىلدى. ايتا كەتەيىك, جەرلەستەرىمىز 13-29 مامىر ارالاعىندا فينليانديادا وتەتىن جوعارى ديۆيزيوننىڭ الەم چەمپيوناتىندا باق سىنايدى. جەرلەستەرىمىز «ا» توبىندا دانيا, كانادا, گەرمانيا, شۆەيتساريا, سلوۆاكيا, يتاليا جانە فرانتسيا قۇرامالارىمەن شەبەرلىك بايقاسادى. يۋري ميحايليس شاكىرتتەرى العاشقى ويىنىن 14 مامىردا دانيا حوككەيشىلەرىمەن وتكىزەدى.