قر پرەمەر-ءمينيسترىنىڭ ورىنباسارى ەرالى توعجانوۆ «اۋىل - تابىس كوزى» جوباسى ىسكە اسىرىلاتىنىن ايتتى, دەپ حابارلايدى Egemen.kz.
«اۋىل حالقىن جۇمىسپەن قامتۋ اسىرەسە وبلىس, اۋدان, ونىڭ ىشىندە اۋىل اكىمدەرىنىڭ باستى مىندەتتەرى ەكەنى بەلگىلى. حالقىمىزدا «اۋىلى ءبۇتىندى – امان دە, ەلى ءبۇتىندى – ەسەن دە» دەگەن اتالى ءسوز بار. سوندىقتان اۋىل تۇرعىندارى ءۇشىن جۇمىس ورىندارىن قۇرۋ, وعان جاعداي جاساۋ كەرەك. بىراق, ول وڭاي جۇمىس ەمەس. دەگەنمەن, ونى شەشۋگە بەل شەشە كىرىسۋىمىز قاجەت. وسىلايشا, اۋىل تۇرعىندارىنىڭ ءۇي شارۋاشىلىعى دەڭگەيىندەگى تابىسىن ارتتىرۋعا ءتيىسپىز. وعان مۇمكىندىك بار, ەل بولىپ اتسالىسۋىمىز كەرەك», دەدى ۇكىمەت باسشىسىنىڭ ورىنباسارى ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا.
ونىڭ ايتۋىنشا, اقمولا وبلىسىنىڭ قارابۇلاق اۋىلىنداعى 4 ءۇي شارۋاشىلىعىن بىرىكتىرەتىن «ار-اي» اۋىل شارۋاشىلىعى وندىرىستىك كووپەراتيۆى كوكونىس داقىلدارىن ءوسىرىپ قاسىنداعى ستەپنوگورسك قالاسىن قامتاماسىز ەتىپ وتىر. ال جامبىل وبلىسىنىڭ قورداي اۋدانىندا 17 ءۇي شارۋاشىلىعىن ىرىكتىرەتىن «ەكوچيكەن» اۋىل شارۋاشىلىعى وندىرىستىك كووپەراتيۆى تاۋىق ەتىن ءوندىرۋ كولەمىن ءبىر جىل ىشىندە 147 توننادان 336 تونناعا دەيىن ارتتىرعان.
«باعدارلاما اياسىندا «اۋىل - تابىس كوزى» جوباسىن ىسكە اسىرامىز. ول جەردە ءۇي شارۋاشىلىعى كووپەراتيۆتەرىنە بىرىكتىرۋ نەگىزگى ماقساتتارىمىزدىڭ ءبىرى بولادى. ءاربىر مۇنداي كووپەراتيۆتكە مەملەكەت كومەك كورسەتەدى. بۇل وڭاي ەمەس. وعان حالىق اتسالۋ ءتيىس. نيەتتەنگەن ازاماتتارعا ناقتى كومەك بولاتىندىعىن اتاپ وتكىم كەلەدى», دەدى ەرالى توعجانوۆ.
ايانا توعانبەك