رەسەيدىڭ وڭتۇستىك-ساحالين قالاسىندا جوعالعان كولىك كوكشەتاۋدا بەينەباقىلاۋ كامەراسىنا ءتۇسىپ قالدى, دەپ حابارلايدى Egemen.kz.
اقمولا وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, بيىلعى جىلعى ءساۋىردىڭ 22-سىندە كوكشەتاۋ قالاسىندا جەدەل باسقارۋ ورتالىعىنىڭ قىزمەتكەرلەرى قاۋىپسىزدىك بەلدىگىن پايدالانباعان «Lexus LX570» كولىگىن انىقتاعان.
ءتارتىپ بۇزۋشىلىق تۋرالى اقپارات بىردەن پاترۋلدىك پوليتسيا جاساعىنا بەرىلدى. ناتيجەسىندە جول تالعامايتىن كولىك ءۋاليحانوۆ جانە كەنەسارى كوشەلەرىنىڭ قيىلىسىندا توقتاتىلدى.
«كولىكتى كوكشەتاۋ قالاسىنىڭ 37 جاستاعى تۇرعىنى باسقارعان. ونىڭ قۇجاتتارىن تەكسەرۋ بارىسىندا اۆتوكولىكتى باسقارۋعا ازاماتتىق-قۇقىقتىق جاۋاپكەرشىلىگى ساقتاندىرۋ ءپوليسى بولماعانى انىقتالدى. ۆەدومستۆولىق اقپاراتتىق - ىزدەستىرۋ جۇيەلەرى بويىنشا ودان ءارى تەكسەرۋ بارىسىندا جول تالعامايتىن كولىكتىڭ 2018 جىلعى 15 قاڭتاردان بەرى رەسەي فەدەراتسياسى ءىىمب وڭتۇستىك-ساحالين قالاسى اۋماعىندا ۇرلانعانى بەلگىلى بولدى. ەگجەي-تەگجەيلى تەكسەرۋ جۇرگىزۋ جانە بارلىق ءمان-جايلاردى انىقتاۋ ءۇشىن كولىك قۇرالى سول كۇنى ايىپپۇل تۇراعىنا قويىلدى», دەدى ۆەدومستۆودان.
پوليتسيا دەپارتامەنتىنىڭ ءباسپاسوز قىزمەتىنەن اتاپ وتكەندەي, جۇرگىزۋشىنىڭ جەكە باسىن تەكسەرۋ كەزىندە ونىڭ بۇرىن اۆتوكولىكتى زاڭسىز يەمدەنگەنى جانە ابايسىزدا ادام ولىمىنە اكەپ سوققان جول قوزعالىسى ەرەجەسىنىڭ بۇزعانى ءۇشىن سوتتالعانى انىقتالدى.