«قۇقىقتىق ءتارتىپ» جەدەل-الدىن الۋ ءىس-شاراسى اياسىندا جۇرگىزىلگەن ۇزاق مەرزىمدى ارنايى جەدەل-تەرگەۋ ءىس-شارالارىنىڭ ناتيجەسىندە ەلوردانىڭ 39 جاستاعى تۇرعىنى ۇستالدى, دەپ حابارلايدى Egemen.kz.
نۇر-سۇلتان قالاسىنىڭ پوليتسەيلەرى كينولوگيالىق قىزمەت ورتالىعىنىڭ يتتەرىن پايدالانا وتىرىپ ءتىنتۋ بارىسىندا «ميرنىي» گاراج كووپەراتيۆىنەن پوليەتيلەن قاپ تاپتى. بەلگىلى بولعانداي, قاپتا «گاشيش» ەسىرتكى زاتى ساقتالعان. ساتۋعا دايىندالعان زاتتىڭ سالماعى 25 كەلى ەكەن.
نۇر-سۇلتان قالاسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى پوليتسيا پولكوۆنيگى ەرلان اكباروۆتىڭ ايتۋىنشا, تاركىلەنگەن ەسىرتكى قۇرالدارىنىڭ سانى ەسىرتكىنى تۇتىنۋ ءۇشىن 5000 ءبىر رەتتىك دوزانى قۇرايدى. ال قۇنى «قارا نارىقتا» 30 ميلليون تەڭگەگە جۋىق. اتالعان فاكتى بويىنشا قر قك 297-بابى 3-بولىگى بويىنشا سوتقا دەيىنگى تەرگەۋ امالدارى جۇرگىزىلۋدە.
كۇدىكتى ءوز كىناسىن مويىندادى. قازىر ەلوردا اۋماعىندا ەسىرتكى جەتكىزۋگە جانە وتكىزۋگە قاتىسى بولۋى مۇمكىن باسقا دا ادامدار انىقتالۋدا.