تابيعي ۇلتتىق پارك اۋماقتارىندا قورىقشىلار اڭ-قۇستاردى قورعاپ عانا قويمايدى, جىلىنا ەكى رەت ساناق جۇرگىزىپ, تىركەپ وتىرادى. جۋىقتا «كاتونقاراعاي» ۇلتتىق تابيعي پارك اۋماعىندا كوكتەمگى ساناق جۇمىستارى اياقتالدى.
تاۋ-تاستى ەركىن كەزىپ جۇرگەن ءتۇز تاعىلارىن ساناۋ ءبىر-ەكى كۇندىك جۇمىس ەمەس. اپتاعا, ايعا سوزىلادى. «كاتونقاراعاي» ۇلتتىق پاركىندە ساناق جۇمىستارىنا 248 ينسپەكتور مەن جانۋارلاردى قورعاۋ جانە ءوندىرۋ ءبولىمىنىڭ 5 مامانى قاتىستى. ساناق جۇمىستارى كەزىندە قورىقشىلار جابايى اڭدار شوعىرلانعان جەرلەردە ىزدەرىن سانادى, كوزگە تۇسسە, وزدەرىن سانادى. فوتوتۇزاققا تۇسكەندەرى جانە بار.
جانۋارلاردى قورعاۋ جانە ءوندىرۋ ءبولىمىنىڭ باستىعى ەرىك قاسىموۆتىڭ ايتۋىنشا, تۇياقتى اڭداردان تاۋتەكە, مارال, ەلىك, قابان شوشقا, كۇدىر, بۇلاننىڭ ساندارى تۇراقتى. سونىمەن قاتار تەرىسى باعالى بۇلعىن, تۇلكى, سۋ كۇزەنى سەكىلدى اڭدار دا كەمىپ, بولماسا كوبەيگەن جوق. جىرتقىشتاردىڭ سانى دا تۇراقتى.
– ساناق جۇمىستارىنا ينسپەكتورلار كادىمگىدەي دايىندالادى. اڭ-قۇستاردىڭ ىزىمەن تاۋ كەزۋ قيىننىڭ قيىنى. جەتكەن جەرىمىزگە دەيىن اۆتوكولىكپەن, ودان ءارى اتپەن جۇرەمىز. ات تۇياعى باسپايتىن جەرلەرگە جاياۋ شىعۋعا ءماجبۇرمىز. جابايى اڭدار جۇرەتىن جەرلەرگە فوتوتۇزاق قۇرامىز. جابايى اڭ-قۇستار شوعىرلانعان جەرلەر درونمەن دە باقىلاندى, – دەيدى ە.قاسىموۆ.
ەستەرىڭىزدە بولسا, «كاتونقاراعاي» ۇلتتىق تابيعي پاركىنىڭ اۋماعىنا قۇرىلعان فوتوتۇزاققا «قىزىل كىتاپقا» ەنگەن قار بارىسى, التاي ۇلارى تۇسكەن ەدى. مامانداردىڭ پىكىرىنشە, جابايى اڭ-قۇستار سانىنىڭ تۇراقتى بولۋى – جاز, كۇز ايلارىندا دايىندالعان ازىق پەن ناۋاعا سەبىلگەن تۇزدىڭ ناتيجەسى. التايدى مەكەن ەتەتىن اڭ-قۇستاردىڭ تۇرىنە كەلەر بولساق, ۇلتتىق تابيعي پارك اۋماعىندا قوسمەكەندىلەردىڭ 3 ءتۇرى, باۋىرىمەن جورعالاۋشىلاردىن 6, سۇيەكتى بالىقتاردىڭ 17, سۇتقورەكتىلەردىڭ 67, قۇستاردىڭ 280-نەن استام ءتۇرى بار. ال ومىرتقاسىز جانۋارلاردىڭ 1 500 ءتۇرى مەكەندەيدى ەكەن. قازاقستاننىڭ «قىزىل كىتابىنا» ەنگەن سۇتقورەكتىلەردىڭ 5 ءتۇرىن (التاي ارقارى, تاس سۋسارى, قار بارىسى, سابانشى جانە يكوننيكوۆ جارقاناتى), قۇستاردىن 21 ءتۇرىن (بۇركىت, يتەلگى, التاي ۇلارى, سۇر تىرنا, قارا دەگەلەك, بالىقشى تۇيعىن) پارك اۋماعىنان كەزدەستىرۋگە بولادى.