پارتيا جۇمىسى جاڭا دەڭگەيگە كوتەرىلەدى

Amanat پارتياسى تاريحىندا وسىنداي بىرنەشە كەزەڭنەن وتكەن بولاتىن. «وتان» پارتياسى قۇرىلعان كەزدە I قۇرىلتاي سەزىندە ساياسي ۇيىمنىڭ قۇرامىنا قازاقستان حالىق بىرلىگى پارتياسى, قازاقستاننىڭ دەموكراتيالىق پارتياسى, قازاقستاننىڭ ليبەرالدىق قوزعالىسى, «قازاقستان – 2030 ءۇشىن» قوزعالىسى كىردى. 2006 جىلى «وتان» پارتياسىنىڭ قۇرامىنا «اسار», قازاقستاننىڭ ازاماتتىق پارتياسى جانە قازاقستاننىڭ اگرارلىق پارتياسى كىردى. حالىقارالىق تاجىريبەگە نازار اۋدارساق, دامىعان ەلدەردىڭ جەتەكشى پارتيالارى دا بىرىگۋ پروتسەسىنەن وتكەنىن كورەمىز. جانە بۇل ساياسي قادام ەلىمىزدىڭ پارتيالىق-ساياسي جۇيەسىندە اۋقىمدى وزگەرىستەر بايقالا باستاعانىنىڭ ايقىن كورىنىسى.

پرەزيدەنت قاسىم-جومارت كەمەل ۇلى بيىلعى ناۋرىز ايىنداعى «جاڭا قازاقستان: جاڭارۋ مەن جاڭعىرۋ جولى» اتتى جولداۋىندا بيلىك ينستيتۋتتارىن كۇردەلى قايتا قۇرىلىمداۋ مەن تەڭگەرىمدەۋ باعىتىنداعى ۇدەرىستى ەرەكشە اتاپ وتكەن بولاتىن. پارتيالىق زاڭنامانى وزگەرتۋ بويىنشا ۇسىنىلعان باستامالار پارتيالىق قۇرىلىمنىڭ تامىرىنا قان جۇگىرتە باس­تادى. بۇل قادامدى Adal پارتياسى ساياسي كەڭەسىنىڭ Amanat پارتياسىنا قوسىلۋ تۋرا­لى شەشىم قابىلداۋىنان انىق كورۋگە بولادى.

بۇگىنگى جاھاندىق ەكونوميكالىق جانە گەوساياسي داعدارىس جاعدايىندا ەل پرەزيدەنتىنىڭ ساياسي رەفورمالاردى جۇزەگە اسىرۋى بۇرىنعىدان دا وزەكتى ەكەنىن ۋاقىتتىڭ ءوزى دالەلدەپ بەردى. Amanat بيلىك پارتياسى رەتىندە پارتيالىق الاڭداعى جاعدايدىڭ بولجامدى بولۋىنا, بەلگىلى ءبىر ويىن ەرەجەلەرىنىڭ ساقتالۋىنا مۇددەلى. Adal پارتياسىنىڭ ساياسي الاڭداعى ءىس-ارەكەتى Amanat پارتياسىنىڭ ساياسي ريتوريكاسىنان سونشالىقتى الشاق ەمەس بولاتىن. سوندىقتان پارتيالاردىڭ قوسىلۋ پروتسەسى ەلدىك ماقسات-مۇراتتاردى جۇزەگە اسىرۋدا ءبىر نۇكتەدە تۇيىسەدى دەگەن ءسوز. وزدەرىڭىزگە ءمالىم, Adal پارتياسى 2020 جىلى رەبرەندينگتەن كەيىن جۇمىسىن قايتا قۇرىلىمداۋ ارقىلى ايتارلىقتاي كۇشەيدى. مىسالى, پارتيانىڭ «سكرينينگ» سياقتى قىزىقتى جوبالارىنا نازار اۋدارۋعا بولادى. جوبا اياسىندا ءۇي شارۋاشىلىقتارى مەن كاسىپكەرلەر تەكسەرىلدى, «وتباسىلاردىڭ تسيفرلىق تولقۇجاتى» قالىپتاستى, پارتيا­دان سايلانعان اۋىل اكىمدەرىنىڭ جۇمىسىن ادىستەمەلىك قولداۋ بويىنشا جۇمىستار جۇرگىزىلۋدە. دەمەك, Amanat پارتياسىنىڭ جۇمىسى مودەرنيزاتسيالاۋ مەن ترانسفورماتسيالاۋدا جاڭا ساپاعا كوتەرىلەدى دەگەن ءسوز.

ەكىنشى, مەملەكەت باسشىسى قاسىم-جومارت توقاەۆتىڭ Amanat پارتياسىنان شىعاتىنىن رەسمي تۇردە مالىمدەۋى. جالپى, اشىق قوعام قالىپتاستىرۋعا قادام باسقان ەلدەردە ساياسي كۇشتەرگە تەڭ جاعداي جاسالۋى كەرەك. اكىمشىلىك رەسۋرستاردان ادا, اقپاراتتىق جۇيە تەڭگەرىمدى جۇمىس جۇرگىزىپ, حالىقتىڭ تاڭداۋ جاساۋىنا جاعداي تۋعىزۋ ءۇشىن مەملەكەت باسشىسىنىڭ پارتيالارعا دەگەن بەيتاراپتىعى اسا قۇندى. وسى ورايدا «ساياسي تارازىنىڭ» ءبىر جاعى باسىپ كەتپەۋىن قامتاماسىز ەتۋ ماڭىزدى جانە ساياسي مادەنيەتتىڭ نەگىزگى كورسەتكىشى دەۋگە بولادى.

ءۇشىنشى, پارتياعا جاڭا توراعا بولىپ ءماجىلىس سپيكەرى ەرلان قوشانوۆتىڭ سايلانۋى. ول – وتە اشىق جانە مادەنيەتتى ادام. ارينە, مەملەكەت باسشىسى ۇستامدى جانە ۇتىمدى ۇسىنىس جاسادى. ەرلان جاقان ۇلىنىڭ قاتارداعى جۇمىسشىدان باستاپ ورتا جانە جوعارى دەڭگەيدەگى لاۋازىمداردى ابىرويمەن اتقارعانى تاجىريبەلى تۇلعا ەكەنىن كورسەتەدى. مىرىش ساپىرىپ, مىس قايناتقان, كەن قازعان ەڭبەكشىلەردىڭ قادىرىن بىلەدى. كومىرلى وڭىردەگى اكىمدىك قىزمەتىندە حالىقتىڭ بەل ورتاسىندا ءجۇرىپ, ماسەلەنى ىشتەن كورىپ جانە شەشۋ جولدارىن قاراستىرعان. ال پرەزيدەنت اكىمشىلىگىنىڭ باسشىسى لاۋازىمىندا بولعاندا مەملەكەتتىڭ باسقارۋ جۇيەسىنىڭ كۇنگەيى مەن تەرىسكەيىن قاتار سەزىنگەن ازامات. ءماجىلىس سپيكەرى رەتىندە ءتۇرلى بيۋروكراتيالىق بارەرلەردىڭ تامىرىنا بالتا شاۋىپ, حالىققا ءتيىمدى زاڭدار قابىلداۋداعى ەرىك-جىگەرىن ءسات سايىن سەزىنىپ تە, كورىپ تە ءجۇرمىز. دەمەك, ساياسي ۇيىمنىڭ جەتەكشىسى رەتىندە دە قوعامدىق وزگەرىستەر مەن ساياسي رەفورمالاردىڭ جۇزەگە اسۋىنا ىقپال ەتەتىنى داۋسىز.

جاناربەك ءاشىمجان,

ءماجىلىس دەپۋتاتى