جۇمىس ساپارىمەن الماتى وبلىسىنا كەلگەن اقپارات جانە قوعامدىق دامۋ ءمينيسترى اسقار وماروۆ تالعار اۋداندىق مادەنيەت ۇيىندە جەرگىلىكتى تۇرعىندارمەن كەزدەستى. ءۇش ساعاتتان استام ۋاقىتقا سوزىلعان اشىق ديالوگ بارىسىندا مينيستر تۇرعىنداردىڭ بارلىق سۇراعى مەن ۇسىنىسىن تىڭدادى. كەزدەسۋ بارىسىندا اسقار وماروۆ مينيسترلىكتىڭ اتقارعان جۇمىسى تۋرالى دا قىسقاشا بايانداما جاسادى.
اۋداندىق مادەنيەت ۇيىندە وتكەن كەزدەسۋ بارىسىندا اقپارات سالاسىن دامىتۋ, ازاماتتىق قوعام, جاستار جانە وتباسى ساياساتى, ءدىن, ەتنوسارالىق قاتىناستار, قوعامدىق سانانى جاڭعىرتۋ ماسەلەلەرى تالقىلاندى. كەزدەسۋگە الماتى وبلىسى اكىمىنىڭ ورىنباسارى ب.بايجۇمانوۆ, تالعار اۋدانىنىڭ اكىمى ق.ءابدىحانوۆ, قوعامدىق كەڭەس مۇشەلەرى, ۇكىمەتتىك ەمەس ۇيىمدار مەن ەتنو-مادەني بىرلەستىكتەردىڭ جەتەكشىلەرى, اۋدان تۇرعىندارى مەن جاستارى قاتىستى.
– ەلىمىزدە ازاماتتىق قوعام ينستيتۋتتارىن دامىتۋ بويىنشا ۇلكەن جۇمىستار اتقارىلۋدا. بۇگىنگى تاڭدا رەسپۋبليكا بويىنشا الەۋمەتتىك ماڭىزدى جۇمىستارمەن اينالىساتىن 22 مىڭ ۇكىمەتتىك ەمەس ۇيىم بار. مەملەكەت تاراپىنان بارلىق ۇكىمەتتىك ەمەس ۇيىمدارعا قولداۋ كورسەتىلۋدە. وسى باعىتتاعى جۇمىستارعا الماتى وبلىسىنىڭ تۇرعىندارى دا بەلسەندى ۇلەس قوسۋدا, – دەدى مينيستر ا.وماروۆ.
ماسەلەن, بىلتىر الماتى وبلىسىندا مەملەكەتتىك الەۋمەتتىك تاپسىرىس بويىنشا 92 جوباعا 199 ملن تەڭگە قارجى بولىنگەن. بيىل بۇل سوما 495 ملن تەڭگەنى قۇراعان. بۇعان 112 جوبا قاتىساتىن بولادى. وتكەن جىلمەن سالىستىرعاندا 2,5 ەسەگە ءوسىم بارى بايقالادى. ارينە, بۇل ءىس-شارالار ازاماتتىق قوعامدى دامىتۋعا سەرپىن بەرىپ وتىر. وسى جەردە ازاماتتىق قوعامنىڭ قالىپتاسۋى مەملەكەتتىڭ دامۋىندا ايتارلىقتاي ماڭىزعا يە ەكەنىنە باسىمدىق بەرۋى ءتيىس. سوندىقتان دا, مينيستر اۋدان تۇرعىندارىمەن كەزدەسۋدە وبلىستىق اكىمدىكتىڭ ازاماتتىق قوعامدى دامىتۋعا ەرەكشە نازار اۋدارۋى قاجەتتىگىن اتاپ ايتتى.
– قازىرگى ۋاقىتتا قوعامدىق كەڭەستەر قۇرامىن نىعايتۋ بويىنشا جۇمىستار جۇرگىزىلۋدە. كەيبىر وڭىرلەر بويىنشا مينيسترلىك تاراپىنان سىن بار. بىراق الماتى وبلىسى بويىنشا كەمشىلىك جوق, – دەدى مينيستر ەرىكتىلەر قوزعالىسىنا دا ەرەكشە ءمان بەرىلىپ جاتقاندىعىن ءسوز ەتىپ.
مينيسترلىكتىڭ ماڭىزدى جۇمىس باعىتىنىڭ ءبىرى – بۇقارالىق اقپارات قۇرالدارىن دامىتۋ ەكەنى بەلگىلى. مەملەكەت باسشىسىنىڭ حالىققا ارناعان بيىلعى جولداۋىندا بۇل باعىتتا ايقىن تاپسىرما جۇكتەلدى. قازىر سول بويىنشا بىرقاتار ءىس-شارا قولعا الىنعان ەكەن.
– ءبىز قازىر باق تۋرالى زاڭدى قايتا ازىرلەۋ جۇمىستارىن جۇرگىزىپ جاتىرمىز. جاقىندا «رۋحاني جاڭعىرۋ» قازاقستاندىق قوعامدىق دامۋ ينستيتۋتى» الاڭىندا باس رەداكتورلار كلۋبىنىڭ مۇشەلەرىمەن كەزدەسۋدە باق-قا قاتىستى ءبىرتالاي ماسەلە كوتەرىلىپ, ۇسىنىستار ايتىلدى. قازىرگى ۋاقىتتا مەديا سالاسىنداعى زاڭنامانى جەتىلدىرۋ ءۇشىن جۇمىس توبى قۇرىلىپ, جۇمىسىن باستادى, – دەدى مينيستر.
ا.وماروۆ ءسوز كەزەگىندە الماتى وبلىسىندا باق-تى دامىتۋعا باسا نازار اۋدارىلىپ وتىرعاندىعىنا دا كەڭىنەن توقتالدى. بۇگىندە وڭىردە 218 اقپارات قۇرالى جۇمىس ىستەيتىندىگىن اتاپ وتكەن مينيستر ءسوز كەزەگىندە مەملەكەتتىك اقپاراتتىق تاپسىرىستى ۋاقتىلى وتكىزۋدى قامتاماسىز ەتۋ قاجەتتىگىن دە قۇلاعدار ەتتى.
اقپارات جانە قوعامدىق دامۋ مينيسترلىگىنىڭ تاعى ءبىر باعىتى ەلىمىزدىڭ جاستار ساياساتىن جۇزەگە اسىرۋ بولىپ وتىر. دەرەك بويىنشا, قازاقستاندا 3,7 ملن جاس بولسا, ونىڭ 40 پايىزى اۋىلداعى جاستار ەكەن. ال تالعار اۋدانىندا رەسمي ستاتيستيكا بويىنشا ەلدى مەكەندە 49 مىڭ جاس ازامات تۇرادى. قازىر جاستاردى قولداۋ بويىنشا كوپتەگەن مەحانيزم مەن جاڭا جوبالار جۇزەگە اسۋدا. ايتالىق, «العاشقى جۇمىس ورنى» جانە Zhas Project جوبالارى, «تاۋەلسىزدىك ۇرپاقتارى» گرانتتارىمەن قارجىلاندىرۋ شەڭبەرىندە ءتيىستى ءىس-شارالار جۇزەگە اسپاق. وسى جوبالار بويىنشا ەڭبەككە ارالاسىپ, كاسىبىن اشۋدىڭ مۇمكىندىكتەرى مول ەكەندىگى دە ەگجەي-تەگجەي ايتىلدى. وتكەن جىلى بيزنەستى جاڭا باستاعان جاس كاسىپكەرلەرگە 30 گرانت ءبولىنىپ, بايقاۋ جاريالانعان. جوباعا الماتى وبلىسىنان ەكى جاس قاتىسىپتى. ءبىرى جامبىل اۋدانىنداعى اسەت بەيسەۋوۆ اتىنداعى مەكتەپتىڭ مۇعالىمى بيومەحانيكالىق پروتەز دايىنداۋ ءۇشىن گرانت يەلەنسە, ەكىنشىسى جيھازدى قايتا قالپىنا كەلتىرەتىن جوباسى ءۇشىن گرانت ۇتىپ العاندىعىن اتاپ ءوتتى. گرانتتى پرەزيدەنت ءوزى تاپسىرعان.
رەسمي جيىننان كەيىن مينيستر ا.وماروۆ اۋدان تۇرعىندارىمەن اشىق ديالوگقا كوشتى. مينيسترمەن كەزدەسۋگە كەلگەن تۇرعىندارعا ءسوز كەزەگى تيىسىمەن اششى دا بولسا اقيقاتىن ىزدەگەن ماڭىزدى ماسەلەلەردىڭ تيەگى اعىتىلدى. ول ارينە, الدىمەن كوپبالالى انالاردىڭ باسپاناعا قول جەتكىزە الماۋى, ءۇي الۋ كەزەگىنىڭ جىلجىماۋى سىندى جانايقايى بولسا, ەندى ءبىرى اۋىل جاستارىنىڭ جۇمىسسىز جۇرگەندىگىن, كاسىبىن اشۋعا قولداۋ تاپپايتىندىعىن العا تارتتى. سونداي-اق قوعامدىق كەڭەستىڭ مۇشەلەرىن قايتا سايلاۋ, اۋىلداعى ۇەۇ-نىڭ ماسەلەلەرى, اككرەديتاتسيا, ءتىپتى جول مەن اۋىز سۋدىڭ پروبلەمالارى دا ەش كەدەرگىسىز مينيستر نازارىنا ۇسىنىلدى.
كەزدەسۋدە تالعار اۋدانىنىڭ تۇرعىندارى, تانىمال قالامگەرلەر مۇسا ءجانادىلوۆ, قورعانبەك امانجولوۆ, بەكسۇلتان كولباەۆ, تۇرسىنبەك جالعاسباەۆ, كامنۇر ءتالىم ۇلى, كاسىپكەر-ۇستاز نايليا ۇمبەتوۆا ءدىن مەن ءتىل, اۋداندىق گازەتكە قاتىستى وتكىر دە وزەكتى ماسەلەردى جايىپ سالىپ, ناقتى شەشىم قابىلداۋعا ىقپال ەتۋدى سۇرادى.