ۇلتتىق مۋزەيگە نۇرتىلەۋ يمانعالي ۇلىنىڭ جەكە زاتتارى تاپسىرىلدى

قالامگەر قولدانعان زاتتار قاتارىندا جۋرناليستيكا قايراتكەرىنىڭ قىزمەتتىك جانە وتباسىلىق ەستەلىكتەرى جيناقتالعان فوتو-البوم, «قازاق جەرىنىڭ زيالىلارى» اتتى ەنتسيكلوپەدياسى مەن ۇلتتىڭ ءۇنجارياسى, كوستيۋم-شالبارى مەن كويلەگى, سومكەسى, قالامسابى مەن كوزىلدىرىگى, قويىن داپتەرلەرى, «بەيىمبەت مايلين – 125 جىل», ء«ىلياس جانسۇگىروۆ – 125 جىل», «اسەت نايمانباي ۇلى – 150 جىل» مەدالدارى بار.

«نۇرتىلەۋ يمانعالي ۇلى جارتى عاسىرعا جۋىق عۇمىرىن جۋرناليستيكا سالاسىنا ارناپ, ساۋاتتى دا سالماقتى اقپارات تاراتۋ جولىندا شاكىرتتەردىڭ ءبىر بۋىنىنا مەكتەپ قالىپتاستىردى. نۇرتىلەۋ يمانعالي ۇلى ەلدىڭ ازاماتى, وتباسىنىڭ بەرىك تىرەگى بولدى, ەسىمى تاريحتا قالدى. بۇگىن ءوزى قولدانعان زاتتارىنىڭ ءبىر بولىگىن ۇلتتىق مۋزەيگە تاپسىرىپ, ول جايلى ەسكىرمەس ەستەلىكتەردىڭ كەيىنگى ۇرپاق جادىندا ساقتالۋىنا اتسالىستىق دەپ ويلايمىن. ەكسپوناتتار قاتارىندا ەفيرگە كيگەن كيىمدەرى دە بار. نۇرتىلەۋدىڭ ءوزى ايتقانداي «پاتشا كوڭىلدى كورەرمەنى» ەندى ۇلتتىق مۋزەيدەن تاماشالاي الادى. سونداي-اق نۇر-اعانىڭ شىعارماشىلىعى مەن جەكە ءومىرىن ناسيحاتتايتىن ەڭ العاشقى كورمە دە ۇلتتىق مۋزەيدەن باستاۋ العالى جاتىر. بۇل باستاماعا قولداۋ بىلدىرگەن مۋزەي باسشىلىعىنا ايرىقشا العىسىمدى بىلدىرەمىن. كورمە ءارى قاراي الماتى, سەمەي, شىمكەنت جانە تۋعان ءوڭىرى تالدىقورعان قالاسىندا اياقتالادى», دەدى ق. سوۆەتبەكقىزى.

قازاقتىڭ سەگىز قىرلى ءبىر سىرلى, وت ءتىلدى, وراق اۋىزدى ۇستاز-ءجۋرناليسى رەتىندە ەستە قالعان نۇرتىلەۋ يمانعالي ۇلىنىڭ جۇبايى قارلىعاش تابۋلدينوۆا وتاعاسىنىڭ حالقىن ەرەكشە ءسۇيىپ, ءوز ماماندىعىن ايرىقشا قۇرمەتتەگەنىن دە ەسكە الدى.

«نۇر-اعا ۇلتىن ەرەكشە جاقسى كوردى, سالت-ءداستۇرى مەن ادەت-عۇرپىن ايرىقشا باعالادى. سودان بولار ۇلتتىق كيىمنىڭ زاماناۋي ءتۇرىن حابارلارعا, ەفيرگە كيىپ ناسيحاتتادى. سونىمەن قاتار ول سپورتتى دا جاقسى كوردى. جاس كەزىندە بوكسپەن اينالىسىپ, «سپورت شەبەرىنە ۇمىتكەر» اتاعىن الدى. كەيىنگى جىلدارى سۋدا ءجۇزۋ, ۆولەيبول, بيليارد ويىندارىمەن دە اينالىستى. ودان دا العان كۋبوك, ناگرادالارى كوپ. ول ءوز سالاسىنىڭ كاسىبي مامانى عانا ەمەس جان-جاقتى بولعاندى, ۇنەمى ىزدەنىپ, دامىپ وتىرعاندى قالادى.  نۇرتىلەۋدىڭ قوعامداعى, جەكە ومىرىندەگى بارلىق قاسيەتى ۇلگى ەتۋگە لايىق بولسا, ونىڭ دالەلى جىلى ەستەلىكتەر مەن ارتىندا قالعان مۇرالارى», دەدى ول.

نۇرتىلەۋ يمانعالي ۇلى يمانعاليەۆ 1952 جىلى الماتى وبلىسى, اقسۋ اۋدانى, دىڭگەك اۋىلىندا دۇنيەگە كەلگەن. ۇيدەگى 14 بالانىڭ كەنجەسى. اتاسى قالياسقار بەس جاسىندا ساۋاتىن اشقان. 1977 جىلى قازمۋ-ءدى بىتىرگەن سوڭ  قازاق تەلەۆيزياسىندا ءتىلشى, رەداكتور, اعا رەداكتور, كوممەنتاتور, باس رەداكتور, ساياسي شولۋشى, ديرەكتوردىڭ ورىنباسارى, «حابار» اگەنتتىگىندە مودەراتور-جۇرگىزۋشى, ودان كەيىن ۇكىمەت كەڭسەسىندە سەكتور مەڭگەرۋشىسى, پرەزيدەنت اكىمشىلىگىندە باس مامان بولىپ ىستەگەن. كوررۋپتسياعا قارسى كۇرەس جونىندەگى مەملەكەتتىك كوميسسياسىنىڭ مۇشەسى, «قازاقستان» رترك» اق باسقارما توراعاسى قىزمەتىن اتقارعان.

نۇرتىلەۋ يمانعالي ۇلى قازاقستان جۋرناليستەر وداعى سىيلىعىنىڭ ەكى مارتە لاۋرەاتى, «التىن جۇلدىز» سىيلىعىنىڭ يەگەرى, قر مادەنيەتىنە ەڭبەگى سىڭگەن قايراتكەر, قازاق ۇلتتىق ونەر اكادەمياسىنىڭ كۇرمەتتى پروفەسسورى, اقسۋ اۋدانىنىڭ «قۇرمەتتى ازاماتى» اتانعان.

ايتا كەتسەك, قازاقستان رەسپۋبليكاسى ۇلتتىق مۋزەيى ەلىمىزدەگى ۇلتتىق مۇرالارى مەن مادەني قۇندىلىقتارىن  ساقتاۋ مەن قورعاۋدىڭ بىرەگەي ورتالىعى بولىپ تابىلادى. مۋزەي قورىندا پالەونتولوگيا, ارحەولوگيا, ەتنوگرافيا, قارۋ-جاراق, نۋميزماتيكا, اسىل مەتالدار مەن ساندىك-قولدانبالى ونەر جانە بەينەلەۋ ونەرى كوللەكتسيالارى, مۇراعاتتىق فوتو, بەينە جانە اۋديو قۇجاتتار بار. قازىرگى تاڭدا مۋزەي قورىندا 217 286 جادىگەر ساقتالعان.

سونداي-اق قر ۇلتتىق مۋزەيىندە 2022 جىلعى 28 ءساۋىر كۇنى ساعات 16:00-دە  بەلگىلى قالامگەر نۇرتىلەۋ  يمانعالي ۇلىنىڭ 70 جىلدىعىنا ارنالعان «باي-قۋاتتى بولايىق!» اتتى كورمەسى اشىلادى. كورمەگە نۇرتىلەۋ يمانعالي ۇلىنىڭ ەفيردە كيگەن ۇلتتىق ۇلگىدەگى كيىمدەرى, جەكە قولجازبالارى مەن جۇمىس ۇستەلىندەگى بۇيىمدارى, مەملەكەتتىك جانە مەرەكەلىك ناگرادالارى, سپورتتىق كيىمدەرى مەن قانجار, قامشى, دومبىرا سىندى 200-گە تارتا زاتتارى قويىلادى.