17 مامىردا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءىس باسىنداعى توراعاسى, قازاقستاننىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆتىڭ اۋعانستان يسلام رەسپۋبليكاسىنا رەسمي ساپارى باستالدى. ساپار بارىسىندا اۋعانستان پرەزيدەنتى حاميد كارزايمەن, سىرتقى ىستەر ءمينيسترى زالماي راسۋلمەن, بىرىككەن ۇلتتار ۇيىمى باس حاتشىسىنىڭ سول ەلدەگى ارنايى وكىلى ستەفان دە ميستۋرامەن, ەۋروپا وداعىنىڭ ارنايى وكىلى ۆيگاۋداس ۋشاتسكاسپەن كەزدەسۋلەر جوسپارلانعان, دەدى ءداستۇرلى اپتالىق بريفينگتە سىرتقى ىستەر مينيسترلىگىنىڭ رەسمي وكىلى اسقار ابدراحمانوۆ.
وتاندىق ديپلوماتيا جەتەكشىسىنىڭ بىلتىر قاراشا ايىندا جاساعان اۋعانستانعا رەسمي ساپارى بارىسىندا ءبىلىم بەرۋ سالاسىنداعى ەكىجاقتى ىنتىماقتاستىق تۋرالى كەلىسىمگە قول قويىلعانى ءمالىم. نۇرسۇلتان نازارباەۆ پەن حاميد كارزايدىڭ باستاۋىمەن ازىرلەنگەن قۇجاتقا ءسايكەس 2010-2015 جىلدار ارالىعىندا 1000-نان استام اۋعان جاستارى قازاقستاننىڭ ارناۋلى ورتا جانە جوعارى وقۋ ورىندارىندا بەيبىت ماماندىقتار بويىنشا ءدارىس الادى.
17 جانە 19 مامىر ارالىعىندا ەۋروپاداعى قاۋىپسىزدىك جانە ىنتىماقتاستىق ۇيىمىنا قازاقستاننىڭ توراعالىعى اياسىندا ۆارشاۆادا “سوت جۇيەسىنىڭ ءتاۋەلسىزدىگىن جانە قوعامنىڭ ادىلەتتىلىككە قولجەتىمدىگىن نىعايتۋ” تاقىرىبىندا گۋمانيتارلىق ولشەم بويىنشا حالىقارالىق سەمينار وتەدى, دەپ جالعادى ءسوزىن رەسمي وكىل. ءىس-شاراعا ۇيىمعا قاتىسۋشى 56 مەملەكەتتىڭ رەسمي دەلەگاتسيالارى, باق, حالىقارالىق جانە ۇكىمەتتىك ەمەس ۇيىمداردىڭ وكىلدەرى قاتىسادى. قازاقستاننىڭ رەسمي دەلەگاتسياسى قۇرامىنا سىرتقى ىستەر مينيسترلىگى, جوعارعى سوت جانە باس پروكۋراتۋرا وكىلدەرى ەنگەن.
ا.ابدراحمانوۆ كەلەسى كەزەكتە 17 جانە 18 مامىردا قىزىلوردادا ارالدى قۇتقارۋ جونىندەگى حالىقارالىق قوردىڭ اتقارۋشى ديرەكتسياسى مەن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ استاناداعى ورتالىعىنىڭ ۇيىمداستىرۋىمەن “قازىرگى تاڭدا قازاقستاندىق ارال ءوڭىرىندەگى سۋ جانە ەكولوگيالىق قاۋىپسىزدىك ماسەلەلەرى” اتتى ءدوڭگەلەك ۇستەل وتەتىنىنەن حاباردار ەتتى. اتالعان ءىس-شاراعا پولشا, اۆستريا, يسپانيا, نورۆەگيا, فينليانديا, چەحيا جانە تاعى دا بىرقاتار ديپلوماتيالىق وكىلدىكتەردىڭ باسشىلارى, بىرىككەن ۇلتتار ۇيىمىنىڭ دامۋ باعدارلاماسى, يسلام دامۋ بانكى, ەۋرازيا دامۋ بانكى جانە تاعى دا باسقا حالىقارالىق ۇيىمداردىڭ وكىلدەرى قاتىسادى دەپ كۇتىلۋدە ەكەنى نازارعا سالىندى.
بريفينگ بارىسىندا 19 جانە 20 مامىردا پرەمەر-مينيستر كارىم ءماسىموۆتىڭ بەلارۋس رەسپۋبليكاسىنا جۇمىس ساپارى بولاتىنى, ساپار بارىسىندا ەكى مەملەكەتتىڭ ۇكىمەت باسشىلارى اراسىندا شاعىن قۇرامداعى كەلىسسوزدەر وتكىزۋ جوسپارلانعانى, سونداي-اق, كارىم ءماسىموۆتىڭ ەكىجاقتى ىسكەرلىك فورۋمعا قاتىساتىنى بەلگىلى بولدى. ىسكەرلىك فورۋمعا 130-دان استام قازاقستاندىق كاسىپكەر قاتىسادى دەپ كۇتىلۋدە ەكەن. ال كارىم ءماسىموۆتىڭ 21 مامىردا پەتەربوردا وتەتىن تمد ۇكىمەت باسشىلارى كەڭەسىنىڭ كەزەكتى وتىرىسىنا قاتىساتىنى دا ايتىلدى.
23 جانە 26 مامىر ارالىعىندا تۇرىك رەسپۋبليكاسىنىڭ پرەزيدەنتى ابدوللا گيۋل قازاقستانعا رەسمي ساپار جاسايدى, دەدى قورىتىندىسىندا رەسمي وكىل. ساپار شەڭبەرىندە ابدوللا گيۋلدىڭ ەلباسى نۇرسۇلتان نازارباەۆپەن ەكىجاقتى كەلىسسوزدەرى كۇتىلۋدە. سولاردىڭ بارىسىندا ەكىجاقتى قاتىناستار جانە حالىقارالىق ارەناداعى ىنتىماقتاستىقتىڭ وزەكتى ماسەلەلەرى تالقىلانباق.
سونداي-اق, تۇركيا پرەزيدەنتىنىڭ سەنات توراعاسى قاسىم-جومارت توقاەۆپەن جانە ءماجىلىس توراعاسى ورال مۇحامەدجانوۆپەن كەزدەسۋلەرى جوسپارلانىپ وتىر. ساپار اياسىندا بىرقاتار ەكىجاقتى قۇجاتتارعا قول قويىلادى.
“ەگەمەن-اقپارات”.