جىل باسىنان بەرى پاۆلودار وبلىسىنىڭ پوليتسياسىنا اكىمشىلىك قۇقىق بۇزۋشىلىقتار جاسالعانى تۋرالى 45 مىڭعا جۋىق حابارلاما تۇسكەن, دەپ حابارلادى Egemen.kz Polisia.kz-كە سىلتەمە جاساپ.
ونىڭ ىشىندە وتباسى-تۇرمىستىق قاتىناستار سالاسىنداعى بۇزۋشىلىقتار – 2 500. وسىنداي 22 جانجال سوڭى قىلمىسقا بارۋمەن اياقتالعان.
– بيىل پاۆلودار وبلىسىنىڭ پوليتسيا قىزمەتكەرلەرى 1 960 قورعاۋ نۇسقاماسىن شىعاردى, سونداي-اق 305 ازاماتتىڭ ءجۇرىس-تۇرىسىنا ەرەكشە تالاپتار قويىلدى. ءوڭىردىڭ 180 تۇرعىنى شىعارىلعان قورعاۋ نۇسقامالارىن بۇزدى, – دەدى پاۆلودار وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى جاسقايرات قايىروۆ.
وتباسىلىق جانجالداردى بۇزۋ اكىمشىلىك كودەكستىڭ ەكى بابى بويىنشا قاراستىرىلادى. ماسەلەن, زاڭدا دەنساۋلىققا قاساقانا جەڭىل زيان كەلتىرگەنى ءۇشىن 15 اەك مولشەرىندە ايىپپۇل سالۋ نە 15 تاۋلىككە دەيىنگى مەرزىمگە اكىمشىلىك قاماققا الۋ كوزدەلگەن. سونداي-اق بىرەۋدىڭ دەنساۋلىعىنا جەڭىل زيان كەلتىرگەن ادام 10 اەك مولشەرىندە ايىپپۇل ارقالايدى نەمەسە 10 تاۋلىككە دەيىنگى مەرزىمگە اكىمشىلىك قاماۋعا الىنادى.
مىسالى, 8 ساۋىردە پاۆلودار تۇرعىنى ۇيدە اناسىمەن جانجالداسىپ قالعان. ەر ادام اناسىنا اۋىر سوزدەر ايتىپ, وعان فيزيكالىق زورلىق-زومبىلىق جاساۋعا دەيىن بارامىن دەپ قورقىتقان. بۇرىن ول وسىنداي قۇقىق بۇزۋشىلىق جاساعان. سول ءۇشىن جاۋاپقا تارتىلعان. بۇل جولى ۋچاسكەلىك ينسپەكتور جانجالشىعا قاتىستى قر اقبتك-ءنىڭ 73-بابىنىڭ 2-بولىگى بويىنشا اكىمشىلىك حاتتاما تولتىردى. سوت وعان 10 تاۋلىككە قاماۋعا الۋ تۇرىندەگى اكىمشىلىك جازا شىعاردى.