الماتىدا قازاقستان رەسپۋبليكاسى پرەزيدەنتىنىڭ جانىنداعى قازاقستان ستراتەگيالىق زەرتتەۋلەر ينستيتۋتىندا “گەرمانيانىڭ قازاقستان مەن ورتالىق ازياداعى ساياسي جانە ەكونوميكالىق مۇددەلەرى” اتتى حالىقارالىق عىلىمي-تاجىريبەلىك كونفەرەنتسيا بولىپ ءوتتى. ءسوز رەتى كەلگەندە اتاپ ايتارلىعى, حالىقارالىق كونفەرەنتسيا گەرمانيانىڭ قازاقستانداعى جىلى اياسىندا ۇيىمداستىرىلدى. ونىڭ جۇمىسىنا سىرتقى ىستەر مينيسترلىگى ەۋروپا دەپارتامەنتىنىڭ ديرەكتورى ءادىل تۇرسىنوۆ, گفر-دىڭ قازاقستانداعى توتەنشە جانە وكىلەتتى ەلشىسى راينەر شلاگەتەر, حالىقارالىق ۇيىمدار وكىلدەرى, عالىمدار مەن ديپلوماتتار قاتىستى.
كوپشىلىككە بەلگىلى, وتكەن جىلدىڭ اقپان ايىندا گەرمانياعا رەسمي ساپارى كەزىندە مەملەكەت باسشىسى نۇرسۇلتان نازارباەۆ ماشينە جاساۋ, اۋىل شارۋاشىلىعى, تاعام ءوندىرىسى سالالارىنداعى ىنتىماقتاستىقتى ودان ءارى جەتىلدىرۋ جانە كەڭەيتۋ قاجەتتىگى تۋرالى اتاپ ايتقان بولاتىن. قازاقستان ەكونوميكاسى ءۇشىن, سونىمەن قاتار, جاڭا تەحنولوگيا مەن ينجينيرينگ سالالارىندا الەمدىك كوشباسشى بولىپ ەسەپتەلەتىن كومپانيالارمەن ەكونوميكالىق بايلانىستى ودان ءارى نىعايتۋدىڭ ماڭىزى جوعارى ەكەنى بەلگىلى. حالىقارالىق عىلىمي-ءتاجىريبەلىك كونفەرەنتسياعا قاتىسۋشىلار پىكىرىنشە, “ەكونوميكانىڭ ءارتۇرلى سالالارىنداعى ەكىجاقتى قارىم-قاتىناستى ودان ءارى تەرەڭدەتۋدىڭ بۇگىن دە, كەلەشەكتە دە بەرەرى مول”.
وتكەن جىلى تاۋار اينالىمىنداعى كەيبىر كۇردەلىلىكتەرگە قاراماستان, بيىلعى جىلدىڭ العاشقى توقسانىنداعى كورسەتكىش دەڭگەيى ءبىرشاما جاقسارىپ, ول 948 ميلليون دوللاردى قۇرادى. ءبىر قۇپتارلىعى, ءبىزدىڭ ەلىمىزدىڭ ەكونوميكاسىنا گەرمانيادان كەلەتىن تىكەلەي ينۆەستيتسيالار كولەمى دە ارتا تۇسۋدە. ال مۇنىڭ ءوزى, تۇپتەپ كەلگەندە, ينۆەستيتسيالىق كليماتتىڭ ناقتى تارتىمدىلىعىنىڭ ايقىن كەپىلى. قازاقستان بيىلعى جىلى جاقىن ونجىلدىقتا يندۋستريالىق-يننوۆاتسيالىق دامۋ باعدارلاماسىن جۇزەگە اسىرۋعا كىرىستى. ءسويتىپ, قازىردە بەس ميلليارد دوللاردى قۇرايتىن 140 جوبانى اياقتاۋ جوسپارلانۋدا. سونداي-اق, 50-گە جۋىق جوبانى جۇزەگە اسىرۋ جۇمىسى دا باستالماق. جيىنعا قاتىسىپ, ءوز پىكىرىن ورتاعا سالعاندار نەمىس ينۆەستورلارىن ءوز كاپيتالدارىن وسى جوبالارعا باعىتتاۋعا شاقىردى.
سونىمەن, “گەرمانيانىڭ قازاقستان مەن ورتالىق ازياداعى ساياسي جانە ەكونوميكالىق ءمۇددەلەرى” اتتى كونفەرەنتسيادا قاۋىپسىزدىك, ساۋدا-ەكونوميكالىق, قارجى-ينۆەستيتسيالىق جانە ەنەرگەتيكا سالالارىنا قاتىستى ناقتى ءپىكىرلەر مەن ۇسىنىستار ورتاعا سالىندى. تاعى ءبىر اتاپ ايتارلىق ءجايت, ەۋروپا مەن قازاقستان جانە ورتالىق ازيا ەلدەرى اراسىنداعى قارىم-قاتىناس جىل وتكەن سايىن ۇلعايا تۇسۋدە. ارينە, مۇنىڭ ءوزى ەۋروپالىق وداق ەلدەرىنىڭ سىرتقى ساياساتىندا ورتالىق ازيا ەلدەرىنىڭ ستراتەگيالىق ماڭىزىنىڭ ارتۋىنىڭ ناتيجەسى ەكەندىگى ءسوزسىز. بۇل ورايدا, ەۋرووداقتىڭ ورتالىق ازيا مەملەكەتتەرىمەن 2007 جىلى قابىلداعان جاڭا ارىپتەستىك ستراتەگياسى ىنتىماقتاستىقتىڭ ماڭىزدى قىرلارىنىڭ ءبىرى بولىپ تابىلادى.
باقىت بالعارينا, الماتى.