قىتايدىڭ شانحاي قالاسىندا كوروناۆيرۋستىڭ وميكرون شتامىن جۇقتىرعان 25 ملن-عا جۋىق ادام وقشاۋلاندى.
ىندەتتىڭ قارقىن الۋى قىتاي مەگاپوليسىنىڭ وسى ۋاقىتقا دەيىنگى الەمدىك دەرتكە قارسى قاتاڭ شارالاردى ۇستانباۋىنان بولىپ وتىر. اۋرۋعا شالدىققانداردىڭ سانى ارتقان كەزدە عانا 3 ءساۋىر كۇنى بارلىق قالا بويىنشا كارانتين جاريالاندى. تۇرعىندار ءۇي قاماقتا وتىرىپ, اس-سۋلارىن تاپسىرىسپەن الدىرۋعا ءماجبۇر. جەرگىلىكتى بيلىك قالا تۇرعىندارىن ەت, جۇمىرتقا, كوكونىسپەن قامتاماسىز ەتىپ جاتقانىن حابارلادى. الايدا حالىق ءدارى-دارمەكتىڭ تاپشىلىعىن ايتىپ, نارازىلىق بىلدىرۋدە.
بۇل – شانحايداعى العاشقى جالپىقالالىق كارانتين. وتكەن ايعا دەيىن جەرگىلىكتى بيلىك شاعىن عانا شەكتەۋلەر ەنگىزىپ كەلدى. ءتىپتى 2021 جىلدىڭ ناۋرىز ايىندا ىندەت جۇقتىرعانداردىڭ سانى 1 800-گە دەيىن ارتقان كەزدە دە شانحاي قالاسى تولىقتاي وقشاۋلانۋدان باس تارتقان ەدى. شانحاي قىتايدىڭ وزگە قالالارىنان نەگە وزگەشەلەندى؟ ونىڭ باستى سەبەبى – قىتاي ەكونوميكاسى ءۇشىن ماڭىزىندا. شانحاي وسى ۋاقىتقا دەيىن قىتايدى الەممەن جالعاپ تۇرعان كوپىر بولدى, قازىر دە سولاي. ول 2018 جىلدان بەرى ەلدىڭ جالپى ساۋداسىنىڭ 10 پايىزدان استامىن قۇراپ وتىر. جەرگىلىكتى Caixin اقپارات اگەنتتىگىنىڭ حابارلاۋىنشا, شانحاي اۋەجايلارى ەلدەگى پاندەميانىڭ العاشقى كۇندەرىندە قاجەت بولعان قورعانىس قۇرالدارى مەن ءدارى-دارمەكتىڭ جارتىسىنا جۋىعىن دەر كەزىندە جەتكىزىپ وتىرعان. ماسەلەن, 2020 جىلى پۋدۋن حالىقارالىق اۋەجايىنىڭ جۇك تاسىمالى 3,4 ملن تونناعا جەتكەن. بۇل كورسەتكىش ءىرى كولەمدە جۇك تاسىمالداناتىن بەيجىڭ, گۋانچجوۋ جانە شەنچجەن اۋەجايلارىن بىرىكتىرىپ ساناعاندا بىرنەشە ەسەگە ارتىق.
گونكونگتاعى قىتاي ۋنيۆەرسيتەتىنىڭ زەرتتەۋلەرىنە قاراساق, شانحاي سەكىلدى مەگاپوليستەردىڭ جابىلۋى قىتاي ەكونوميكاسىنا ەداۋىر نۇقسان كەلتىرەتىنى ايتىلعان. سول سەبەپتى قىتاي بيلىگى قالانىڭ ەلگە اكەلەر پايداسىن تۇرعىنداردان جوعارى قويىپ وتىرعان جايى بار.
ال الەم ەلدەرى ءۇشىن بۇل قاۋىپتى. COVID-19-دىڭ وشاعى بولعان قىتاي كارانتين شارالارىن قاتاڭداتىپ, شەكاراسىن بەكەم ۇستاۋ قاجەت دەپ وتىر ساراپشىلار. قىتاي بيلىگىنىڭ بۇل ارەكەتىنە الەم عالىمدارى پىكىر ءبىلدىرىپ, بۇرىس شەشىم بولعانىن ايتۋدا. لوندون گيگيەنا جانە تروپيكالىق مەديتسينا مەكتەبىنىڭ پروفەسسورى مارتين گيببەرد شانحايدىڭ بۇل شەشىمى ۆيرۋستىڭ الدەقايدا جۇقپالى بولىپ تابىلاتىن Omicron شتامىنا سايكەس كەلمەدى دەپ سانايدى.
وزگە ەلدەردەگى جاعداي قانداي؟ دجونس حوپكينس ۋنيۆەرسيتەتىنىڭ مالىمەتىنشە, الەمدە COVID-19 ينفەكتسياسىن 500 907 811 ادام جۇقتىرىپ, 6 185 177 ادام قايتىس بولعان. قازىر اقش-تا – 1 105 217, ءۇندىستاندا – 10 860, گەرمانيادا – 3 624 615, ۇلىبريتانيادا – 1 617 068, تۇركيادا – 200 060, ۋكراينادا – 821 098, رەسەيدە 375 452 ادام دەرتكە شالدىققان. دۇنيەجۇزىلىك دەنساۋلىق ساقتاۋ ۇيىمىنىڭ مالىمدەمەسى بويىنشا ءبىر اپتا ىشىندە كۆي جۇقتىرعاندار سانى تومەندەگەن.
ينفەكتسيا جۇقتىرعان 80 ملن-نان استام ادام كورسەتكىشىمەن اقش العاشقى ورىندا تۇر. ودان كەيىن ءۇندىستان – 45 ملن ادام. 30 ملن تۇرعىنى دەرتكە شالدىققان برازيليا ءۇشىنشى ورىنعا جايعاستى. ال وڭتۇستىك كورەيادا كوروناۆيرۋستىڭ وميكرون XE شتامى العاش رەت تىركەلدى. بۇل دەرەكتى اتالعان ەلدىڭ جۇقپالى اۋرۋلارمەن كۇرەس جونىندەگى شتابى مالىمدەدى. ىندەتتىڭ جاڭا ءتۇرىن جۇقتىرعان ناۋقاس ناۋرىز ايىندا قايتا ۆاكتسينا العان.
ەستەرىڭىزگە سالا كەتەيىك, العاش رەت ۇلىبريتانيادا تىركەلگەن وميكرون XE كوروناۆيرۋسى ۇندىستانعا دا كەلىپ جەتكەنى بۇدان بۇرىن حابارلانعان بولاتىن. العاشقى ناۋقاس 7 ساۋىردە انىقتالدى.
سونداي-اق گەرمانيا بيلىگى دەرتكە قارسى كۇرەستى قاتاڭ قولعا الدى. بۇگىندە بۇل ەلدە ىندەتتەن قايتىس بولعانداردىڭ سانى 3 مىڭنان اسپايدى. گەرمانيادا تەستىلەۋ كورسەتكىشىنىڭ سانى وسكەن. وسى ورايدا, ۇلىبريتانيا بيلىگى دە ءساۋىر ايىنىڭ سوڭىنا دەيىن كۇن سايىن 100 مىڭ ادامدى تەستىلەۋدەن وتكىزەتىنىن حابارلادى.