تايلاندتىڭ كۋرورتتى ايماعىندا ورنالاسقان پحۋكەت قالاسىندا ۇيىمداستىرىلعان بوكستان ءداستۇرلى Thailand Open-2022 حالىقارالىق ءتۋرنيرى مارەسىنە جەتتى. دۇنيە ءجۇزىنىڭ 20-عا جۋىق ەلىنەن كەلگەن بىلعارى قولعاپ شەبەرلەرى قاتىسقان جارىستا قازاقستان قۇراماسىنىڭ ءبىرىنشى ءنومىرلى بوكسشىلارى ونەر كورسەتتى. تۋرنيرگە باس باپكەر قايرات ءساتجانوۆتىڭ باسشىلىعىمەن بارعان ەڭ ۇزدىك دەگەن 11 بوكسشىمىز قاتىسىپ, ناتيجەسىندە, ءۇش التىن, ەكى كۇمىس جانە ءۇش قولا مەدال جەڭىپ الدى.
حالىقارالىق تۋرنيردەگى العاشقى التىندى ەل قورجىنىنا 2021 جىلى سەربيادا ۇيىمداستىرىلعان الەم چەمپيوناتىنىڭ كۇمىس جۇلدەگەرى سەرىك تەمىرجانوۆ سالدى. 57 كيلو سالماقتا ونەر كورسەتكەن وتانداسىمىز ىرىكتەۋ كەزەڭدەرىنەن باستاپ, فينالعا دەيىنگى قارسىلاستارىن ەش كۇمانسىز جەڭدى. جارتىلاي فينالدا رينگ قوجايىنى رۋدجاكران دجۋنترونگتى ۇپاي سانى بويىنشا قاپى قالدىرىپ, فينالعا جولداما الدى. ءتۋرنيردىڭ فينالدىق باسەكەسىندە جەرلەسىمىز 2019 جىلعى ازيا چەمپيوناتىنىڭ قولا جۇلدەگەرى فيليپپين وكىلى يان كلارك باۋتيستامەن باس جۇلدەنى ساراپقا سالدى. ءۇش راۋندتا دا قارسىلاسىنا قاراعاندا كوپ سوققى جۇمساپ, رينگتە بەلسەندى قيمىلدادى. نəتيجەسىندە, بارلىق تورەشى س.تەمىرجانوۆتىڭ مىقتىلىعىن مويىنداپ, جەرلەسىمىز التىننان القا تاقتى.
ەكىنشى التىن مەدالدى جاستار اراسىنداعى الەم چەمپيونى نۇربەك ورالباي (81 كيلو) جەڭىپ الدى. جەرەبەگە سايكەس جەكپە-جەكتەرىن جارتىلاي فينالدا باستاعان وتانداسىمىز العاشقى ايقاسىندا تايلاندتىق اناۆات تونگكاتوكتى مەرزىمىنەن بۇرىن جەڭىپ, فينالعا جولداما الدى. جەرلەسىمىزدىڭ اۋىر سوققىلارىنا شىداي الماعان تايلاندتىق بوكسشى ەكىنشى راۋندتان كەيىن جەكپە-جەكتى جالعاستىرۋدان باس تارتىپ, جەڭىلگەنىن مويىندادى. فينالدىق ايقاستا قازاقستاندىق بوكسشىنى ءۇندىستاننىڭ ماقتانىشىنا اينالعان ايگىلى اشيش كۋمار كۇتىپ تۇردى. 2019 جىلى 75 كيلو سالماقتا ازيا بىرىنشىلىگىنىڭ كۇمىس جۇلدەگەرى (فينالدا قازاقستاندىق تۇرسىنباي قۇلاحمەتتەن جەڭىلدى) اتانعان بوكسشى تايلاندتاعى ءتۋرنيردىڭ التىنىنان دامەلى ەدى.
الايدا اۋىر سالماقتاعى بوكسشىلاردىڭ ايقاسىندا جەرلەسىمىز ۇندىستاندىق بوكسشىعا ەش مۇمكىندىك قالدىرعان جوق. اسا تارتىستى وتكەن كەزدەسۋدىڭ ءبىرىنشى راۋندىندا تورەشىلەر جەڭىستى ارالاس داۋىسپەن نۇربەككە بەرگەن (4:1) بولسا, ەكىنشى جانە ءۇشىنشى راۋندتاردا وتانداسىمىز بەس تورەشىنىڭ دە داۋىسىنا يە بولدى. نۇربەك ورالباي – تۋرنير چەمپيونى!
كوپ كەشىكپەي نۇربەكتىڭ سىڭارى ايبەك تە شارشى الاڭعا كوتەرىلىپ, ول دا تايلاندتاعى ءتۋرنيردىڭ جەڭىمپازى اتاندى. 91 كيلودا وتكەن جارتىلاي فينالدىق جەكپە-جەكتە ايبەك ورالباي قازاقستان ۇلتتىق قۇراماسىنىڭ تاعى ءبىر بوكسشىسى ساعىندىق توعامبايمەن جۇدىرىقتاستى. تورەشىلەردىڭ باسىم داۋىسىمەن جەڭىسكە جەتكەن ايبەك فينالعا جولداما الدى. الايدا فينالداعى قارسىلاسى بەلگىسىز سەبەپپەن رينگكە كوتەرىلگەن جوق. ءسويتىپ, ايبەك ورالباي ەل قورجىنىنا ءۇشىنشى التىن مەدالدى سالدى.
وكىنىشكە قاراي, فينالدا ونەر كورسەتكەن ەكى بوكسشىمىزدىڭ جولى بولماي, كۇمىس جۇلدەنى قاناعات تۇتتى. ۇلتتىق قۇراما كاپيتانى اسلانبەك شىمبەرگەنوۆ (69 كيلو) جارتىلاي فينالدا جەرگىلىكتى بوكسشى اتيچاي فومساپتى ەكىنشى راۋندتا نوكاۋتپەن جەڭگەنىمەن, فينالدا تاعى ءبىر تايلاندتىق بۋندجونگ سينسيريدەن جەڭىلىپ قالدى. العاشقى راۋند شىمبەرگەنوۆتىڭ پايداسىنا اياقتالعانىمەن, ەكىنشى راۋندتا بۋندجونگ جەرلەسىمىزدى ءبىر رەت اۋىر سوققىسىمەن نوكداۋنعا ءتۇسىردى. ءۇشىنشى راۋندتا دا سينسيري مىقتىلىق تانىتتى.
ال 63 كيلوداعى سۇلتان مۋسينوۆ جارتىلاي فينالدا تاعى ءبىر جەرلەسىمىز ءساناتالى تولتاەۆتى جەڭگەنىمەن, فينالدا تايلاند وكىلى سومچاي ۆونگسۋۆاننان ايلاسىن اسىرا المادى. ءسويتىپ, ول دا كۇمىس مەدالدى قاناعات تۇتتى.
جارتىلاي فينال باسەكەسىندە جەكپە-جەكتەرىن اياقتاعان ءساناتالى تولتاەۆ (63,5 كيلو), ساعىندىق توعامباي (91 كيلو) جانە اياتوللا تاكىجانوۆ (75 كيلو) Thailand Open حالىقارالىق ءتۋرنيرىنىڭ قولا جۇلدەگەرلەرى اتاندى.
جالپىكوماندالىق ەسەپتە تايلاند قۇراماسى كۇمىس جۇلدەسىنىڭ (4) كوپتىگىنە بايلانىستى توپ جاردى. 3 التىن, 3 كۇمىس جۇلدەسى بار ءۇندىستان ەكىنشى ورىنعا تابان تىرەسە, قازاقستان ۇزدىك ۇشتىكتى تۇيىندەدى.