قر پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن قازاقستان اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسى ءوتتى, دەپ حابارلايدى Egemen.kz ۇكىمەت باسشىسىنىڭ اقپاراتتىق رەسۋرسىنا سىلتەمە جاساپ.
كوميسسيا جۇمىسىنا مەملەكەتتىك ورگانداردىڭ, «اتامەكەن» ۇكپ وكىلدەرى مەن وڭىرلەردىڭ باسشىلارى قاتىستى.
ەپيدەميولوگيالىق جاعدايدىڭ تۇراقتانۋىن ەسكەرە وتىرىپ, قازاقستان اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا بيىلعى 11 ساۋىردەن باستاپ رەسەي فەدەراتسياسى, وزبەكستان جانە قىرعىزستان رەسپۋبليكالارىمەن قۇرلىقتاعى وتكىزۋ پۋنكتتەرىندە قازاقستان ازاماتتارىنىڭ, ازاماتتىعى جوق ادامداردىڭ جانە شەتەلدىكتەردىڭ قازاقستان رەسپۋبليكاسىنىڭ مەملەكەتتىك شەكاراسىنان وتۋىنە قويىلعان شەكتەۋلەردى الىپ تاستاۋ تۋرالى شەشىم قابىلدادى.
وعان قوسا, اۋە قاتىناسى ارقىلى مەملەكەتتىك شەكارانى كەسىپ وتۋگە قويىلعان بارلىق شەكتەۋلەر الىنىپ تاستالادى. بۇل رەتتە قازاقستاندىقتار مەن قازاقستان رەسپۋبليكاسىنىڭ اۋماعىندا تۇرۋعا نيەتتەنگەن شەتەلدىكتەرگە پتر ادىسىمەن COVID-19-عا تەستىنىڭ تەرىس ناتيجەسى بار انىقتامانى نەمەسە ۆاكتسينالاۋ پاسپورتتارى ءوزارا تانىلعان جاعدايدا كوروناۆيرۋسقا قارسى ۆاكتسينالاۋدىڭ, رەۆاكتسينالاۋدىڭ تولىق كۋرسىنان وتكەنى تۋرالى قۇجاتتى مىندەتتى تۇردە ۇسىنۋ جونىندەگى تالاپ ساقتالادى.
ەرالى توعجانوۆ ءوز سوزىندە مەملەكەتتىك شەكارانى اشۋ ماسەلەسى مەملەكەت باسشىسىنىڭ تۇراقتى جەكە باقىلاۋىندا ەكەنىن جەتكىزدى.
وتىرىس سوڭىندا ەرالى توعجانوۆ اكىمدىكتەرگە كوروناۆيرۋس ينفەكتسياسىنا قارسى ەگۋ ناۋقانىن ەرەكشە باقىلاۋعا الۋدى تاپسىرىپ, حالىق اراسىندا ساپالى ءتۇسىندىرۋ جۇمىستارىن جۇرگىزۋ قاجەتتىگىن اتاپ ءوتتى.