اقش-تىڭ مايامي قالاسىندا تەننيستەن بەيرەسمي تۇردە 5-ءشى «ۇلكەن دۋلىعا» ءتۋرنيرى سانالاتىن اسا ءىرى Miami Open ءوز مارەسىنە جەتتى. ەرلەر اراسىنداعى باسەكەدە 18 جاستاعى كارلوس الكاراس توپ جارسا, ايەلدەر باسەكەسىندە يگا شۆەنتەك جەڭىمپاز اتاندى.
جۇلدە قورى 8 584 055 اقش دوللارىن قۇراعان حالىقارالىق جارىستىڭ ەرلەر اراسىنداعى فينالىندا يسپانيالىق كارلوس الكاراس پەن نورۆەگيالىق كاسپەر رۋد باس جۇلدەنى ساراپقا سالدى. اسا تارتىستى وتكەن باسەكەدە الكاراس ەكى سەتتە 7:5, 6:4 ەسەبىمەن جەڭىسكە جەتتى. بۇل كارلوس الكاراستىڭ وسى جىلداعى ءۇشىنشى جەڭىسى بولسا, اتالعان ءتۋرنيردى جەڭىپ العان ەڭ جاس تەننيسشى اتاندى.
WTA تۋرنيرلەرىنىڭ حانشايىمى سانالاتىن پولشالىق يگا شۆەنتەك ماياميدەگى ايەلدەر ءتۋرنيرىنىڭ فينالىندا جاپونيالىق ناومي وساكانى ەكى سەتتە 6:4, 6:0 ەسەبىمەن قاپى قالدىرىپ, قاتارىنان ءۇشىنشى جۇلدەسىنە قول جەتكىزدى. سونداي-اق شۆەنتەك وسى ناتيجەسىنىڭ ارقاسىندا كەشەدەن باستاپ الەمدىك رەيتينگتە كوش باستادى.