مەملەكەت باسشىسى قاسىم-جومارت توقاەۆ «جاڭا قازاقستان: جاڭارۋ مەن جاڭعىرۋ جولى» اتتى قازاقستان حالقىنا جولداۋىن جاريالاپ, كوپ ءارى ماڭىزدى باستامالاردى العا تارتتى. ەڭ باستىسى, بۇل رەفورمالار سارالانىپ, ساراپتالىپ بارىپ ۇسىنىلعانى انىق.
ماسەلەن, «ستراتەگيا» الەۋمەتتىك جانە ساياسي زەرتتەۋلەر ورتالىعى» قوعامدىق قورى دەپ اتالاتىن ءبىزدىڭ ۇيىم اتالعان رەفورمالاردىڭ باعىتى, مازمۇنى ماسەلەسىنە قاتىستى ساراپشىلاردىڭ پىكىرىن زەرتتەدى. سوندىقتان, بۇل باعىتتا قانداي جۇمىس جۇرگىزىلگەنىن جاقسى بىلەمىن.
الايدا بۇل باستامالاردىڭ بولاشاعى قانداي بولاتىنىن ناقتى كەسىپ-ءپىشىپ ايتۋ قيىن. سەبەبى ساياسي رەفورمانى تۇرعىنداردىڭ بەلگىلى ءبىر بولىگى عانا كۇتىپ وتىر. قاراپايىم ادامدار ساياسي وزگەرىستەردىڭ ءمانى مەن ماڭىزىن تۇسىنە بەرمەيدى. الايدا ناق وسى ساياسي رەفورمالار تۇپتەپ كەلگەندە وتانداستارىمىزدىڭ, ءسىز بەن ءبىزدىڭ ومىرىمىزگە اسەر ەتەدى. بىراق بىردەن اسەر ەتەدى دەپ ايتۋ قيىن. سوندىقتان حالىق پرەزيدەنتتىڭ بۇل قادامدارىن ءجىتى تۇسىنگەنى اسا ماڭىزدى.
ال ەندى, پارتيا قۇرۋ ماسەلەسىنە كەلەتىن بولساق, تىركەۋ شەگىن 5 مىڭ ادامعا دەيىن ازايتۋدى زەرتتەۋ كەزىندە ساراپشىلار دا قولدادى. ساراپشىلاردىڭ باسىم كوپشىلىگى تىركەۋ شەگىنىڭ وسى كولەمىن قۇپ كوردى. ساياسي پارتيالاردىڭ اراسىندا باسەكە بولۋى ءتيىس. سەبەبى بۇل سالا كوپ جىلدان بەرى تۇرالاپ تۇرعان بولاتىن. مەنىڭ ويىمشا, ءدال قازىر ماجىلىسكە كىرۋ شەگىن وزگەرتۋگە بولمايدى. جاڭادان قۇرىلاتىن پارتيالار ەڭ الدىمەن ەلەكتورات سانىن ارتتىرىپ الۋعا ءتيىس. مۇنداي شەشىمدى كەلەسى قادام رەتىندە دە قاراۋعا بولادى.
كوپ جىلدان بەرى بۇرىنعى سەمەي وبلىسىندا زەرتتەۋ جۇرگىزدىك. بۇرىنعى جەزقازعان نەمەسە تالدىقورعان وبلىستارىنا قاراعاندا سەمەيلىكتەر وبلىس مارتەبەسىنەن ايىرىلعاندارىمەن كەلىسكەن جوق. جەكە وبلىس بولىپ قايتا قۇرىلۋىن جيىرما جىلدان استام ۋاقىت تالاپ ەتىپ كەلەدى. وسى جىلدار ارالىعىندا بۇرىنعى سەمەي وبلىسىنىڭ ەكونوميكاسى قۇلدىراپ كەتتى. سەمەي قالاسى دا دامىماي قالدى. سوندىقتان پرەزيدەنتتىڭ مۇنداي شەشىمىن تولىعىمەن قولدايمىن. ارينە, جاڭا وبلىس قۇرۋ ءۇشىن دە كوپ جۇمىس اتقارىلۋى كەرەك. ەڭ باستىسى, شەشىم قابىلداندى. جاڭادان اباي وبلىسى پايدا بولادى. قالعانى رەتتەلە جاتارىنا سەنىمدىمىن.
مەملەكەت باسشىسى قاڭتار وقيعاسىنىڭ ورىن الۋىنا سەبەپ بولدى دەپ جەمقورلىقتى, نەپوتيزمدى ايىپتادى. ال ونى جەڭۋ جاڭادان وبلىس قۇرۋ مەن پارتيالىق جۇيەنى جاڭعىرتۋدان دا قيىن بولاتىن سەكىلدى. ماسەلەن, جولداۋدى اكىمدەرمەن, كۆازيمەملەكەتتىك سەكتوردىڭ وكىلدەرىمەن, قۇقىق قورعاۋ ورگاندارىنىڭ قىزمەتكەرلەرىمەن بىرگە وتىرىپ تىڭدادىم. ءبىر بايقاعانىم, كوبىسى قول سوعىپ, قوشەمەت ءبىلدىرىپ وتىرعان جوق. ىشتەي قانداي دا ءبىر قارسىلىقتارى بار ەكەنى اڭعارىلادى. ال پرەزيدەنت باستامالارىنىڭ ءتيىمدى ىسكە اسۋى مەن اسپاۋى ءدال وسىنداي جوعارى, ورتا لاۋازىمداعى شەنەۋنىكتەردىڭ ارەكەتىمەن تىكەلەي بايلانىستى ەكەنى ايتپاسا دا بەلگىلى. سوندىقتان الداعى ۋاقىتتا اۋىر, اۋقىمدى جۇمىستار اتقارىلىپ, تىڭ قادامدار جاسالاتىنى انىق.
گۇلميرا يلەۋوۆا,
«ستراتەگيا» الەۋمەتتىك جانە ساياسي زەرتتەۋلەر ورتالىعى» قوعامدىق قورىنىڭ پرەزيدەنتى