ءماجىلىس دەپۋتاتى امانجان جامالوۆ زەينەتاقى جيناقتارىنىڭ ەڭ تومەنگى جەتكىلىكتى شەگىن قولدانۋ مەرزىمىن جىلدىڭ سوڭىنا دەيىن ۇزارتۋعا قاتىستى ۇسىنىسىنا پىكىر ءبىلدىردى, دەپ حابارلايدى Egemen.kz.
وسى ۇسىنىسقا بايلانىستى ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ پىكىر ءبىلدىردى.
«جەتكىلىكتى شەگىنە توقتالساق, بۇل ماسەلەگە ءتۇرلى پريزمالار ارقىلى قاراۋ كەرەك. بجزق – ول ادامداردىڭ ءوزىنىڭ لايىقتى زەيناتاقىسىنا جيناعان قاراجاتى. وسىدان قاراجاتتى ۇنەمى الا بەرسەك, وندا ەرتەڭ ادام زەينەت جاسىنا جەتكەندە ەڭ تومەنگى زەينەتاقىنى الاتىن بولادى. بۇل دۇرىس پا؟ سوندىقتان ەڭبەك مينيسترىلىگى ءبىرىنشى كەزەكتە بولاشاق زەينەتكەرلەردىڭ قۇقىعىن قورعايدى. بۇل تۇرعىدا ءبىزدىڭ ۇستانىمدى ايتاتىن بولساق, ەل ازاماتتارى زەينەت جاسىنا جەتكەندە, ونىڭ تابىسىنا سايكەس لايىقتى زەينەتاقىسى بولۋ كەرەك», دەدى سەرىك شاپكەنوۆ.