ىستانبۇلدا وتكەن رەسەي مەن ۋكراينا اراسىنداعى كەلىسسوزدىڭ بىرقاتار باعىتىندا ىلگەرىلەۋ بار. كەزدەسۋدەن كەيىن رەسەي قورعانىس مينيسترلىگىنىڭ وكىلى ۋكراينانىڭ سولتۇستىگىندەگى ۇرىس قيمىلىنىڭ قارقىنى ازاياتىنىن مالىمدەدى.
كيەۆ دەلەگاتسياسىنىڭ وكىلى الەكساندر ءچالىيدىڭ سوزىنە سۇيەنسەك, ەل ازاماتتارى كەلىسىمگە قاتىستى رەفەرەندۋم وتكىزۋى كەرەك. ونى قابىلداۋ-قابىلداماۋ ماسەلەسى سول كەزدە شەشىلمەك. بىراق شارتقا اتىستى تولىق توقتاتۋدان كەيىن عانا قول قويىلادى. سودان كەيىن كەلىسىمدى ۋكراينا پارلامەنتى مەن كەپىلگەر ەلدەردىڭ پارلامەنتتەرى راتيفيكاتسيالاۋى ءتيىس.
ۋكراينا تاراپى كەلىسىمگە قاتىستى بىرقاتار ۇسىنىس جاسادى. ماسەلەن, تاراپتار قىرىم مەن دونباسس ماسەلەلەرىن بولەك تالقىلاۋى كەرەك. قىرىم مەن سەۆاستوپولدىڭ مارتەبەسى تۋرالى كەلىسسوزدەر 15 جىلعا سوزىلادى. تاراپتار وسى مەرزىمدە ماسەلەنى شەشۋ ءۇشىن قارۋ قولدانۋدان باس تارتادى. وزدەرىن مەملەكەت دەپ جاريالاپ العان ايماقتاردىڭ احۋالى مەن تاعدىرى تۋرالى ماسەلە دەربەس قاراستىرىلماق. بۇل ەكى ەل پرەزيدەنتىنىڭ كەزدەسۋىندە تالقىلانادى.
ۋكراينا بىرقاتار مەملەكەت كەپىلدىك بەرگەندە يادرولىق ەمەس ەل مارتەبەسىنە كەلىسۋگە دايىن. بۇل دا قۇجات جۇزىندە بەكىتىلۋى ءتيىس. الدا-جالدا وسى تارماق ورىندالسا, ۋكراينا اۋماعىندا شەتەلدىك اسكەري بازالار مەن اسكەري كونتينگەنتتەر ورنالاستىرىلمايدى. كيەۆ تاراپى ەشقانداي اسكەري-ساياسي وداقتارعا كىرمەۋگە كەلىسەدى. ۋكراينا اۋماعىندا حالىقارالىق اسكەري وقۋ-جاتتىعۋلار تەك كەپىلگەر ەلدەردىڭ كەلىسىمىمەن عانا وتكىزىلۋى مۇمكىن. بىراق رەسەي ۋكراينانىڭ ەۋروپا وداعىنا مۇشە بولۋىنا كەدەرگى كەلتىرمەۋى ءتيىس.
كيەۆتەن كەلگەن دەلەگاتسيا ۇلىبريتانيا, قىتاي, اقش, تۇركيا, فرانتسيا, كانادا, يتاليا, پولشا جانە ءيزرايلدى كەپىلگەر مەملەكەت رەتىندە كورگىسى كەلەتىنىن مالىمدەدى. ەگەر ۋكرايناعا قارسى سوعىس نەمەسە قارۋلى اگرەسسيا جاسالسا, وندا كەپىلگەر ەلدەر ءۇش كۇن ىشىندە كومەك كورسەتۋگە مىندەتتى.
رەسەي دەلەگاتسياسىنىڭ جەتەكشىسى ۆلاديمير مەدينسكي ىستانبۇلداعى كەلىسسوز كونسترۋكتيۆتى تۇردە وتكەنىن مالىمدەدى.
«رەسەي ۋكراينا ۇسىنعان اتىستى توقتاتۋ بويىنشا كەلىسسوزدەردى قاراستىرادى جانە بۇل جايلى پرەزيدەنت پۋتينگە حابارلانادى. بەيبىتشىلىك تۋرالى كەلىسىمدى ەكى ەلدىڭ سىرتقى ىستەر مينيسترلىگى رەتتەگەن سوڭ پۋتين مەن زەلەنسكي كەزدەسۋى مۇمكىن», دەدى ول كەلىسسوزدەن كەيىن.
رەسەي تاراپى ۋكراينانىڭ سولتۇستىگىندە اسكەري ءىس-قيمىلىنىڭ قارقىنىن ازايتاتىنىن مالىمدەگەنىنە قاراماستان, اۋىر ارتيللەريامەن اتقىلاۋدى جالعاستىرىپ جاتىر. BBC اگەنتتىگىنىڭ حابارلاۋىنشا, چەرنيگوۆ اكىمشىلىگىنىڭ باسشىسى ۆياچەسلاۆ چاۋس قالا مەن ونىڭ ماڭىنداعى اۋدانداردى رەسەي اسكەرى بومبالاعانىن ايتقان.
ۆ.چاۋستىڭ سوزىنە سۇيەنسەك, وق اتۋ سالدارىنان تۇرعىن ۇيلەر, ينفراقۇرىلىم, كىتاپحانا عيماراتتارى مەن ساۋدا ورتالىقتارى زاقىمدانعان. سونداي-اق ول 35 ادام جاراقات العانىن جەتكىزگەن. ال نيكولاەۆ قالاسىنداعى اكىمشىلىك عيماراتقا تاستالعان زىمىراننان كەيىن قازا تاپقاندار سانى 14 ادامعا جەتتى.
بۇۇ مالىمەتى بويىنشا سوعىس باستالعالى بەرى 4 ميلليوننان استام ادام ۋكراينانى تاستاپ كەتكەن. ونىڭ ىشىندە 2,3 ميلليوننان استام بوسقىن پولشاعا, 608 مىڭنان استامى رۋمىنياعا, 387 مىڭنان استامى مولدوۆاعا, 365 مىڭدايى ماجارستانعا ءوتىپ كەتكەن.
پولشانىڭ پرەمەر-ءمينيسترى ماتەۋش موراۆەتسكي جىل سوڭىنا دەيىن رەسەيلىك مۇنايدان باس تارتۋدى جوسپارلاپ وتىرعانىن حابارلادى. قازىرگى تاڭدا پولشانىڭ مۇناي وڭدەۋ زاۋىتتارىندا وڭدەلەتىن شيكى مۇنايدىڭ ۇشتەن ەكىسى رەسەيدەن كەلەدى.
كۇنى كەشە رەسەي سىرتقى ىستەر ءمينيسترى سەرگەي لاۆروۆ قىتاي سىرتقى ىستەر ءمينيسترى ۆان يمەن كەزدەستى. كەلىسسوزدەر الدىندا س.لاۆروۆ قىتايدى جاڭا «الەمدىك ءتارتىپتىڭ» ءبىر بولىگى دەپ اتادى. ء«بىز سىزدەرمەن جانە جاناشىرلارىمىزبەن بىرگە كوپپوليارلى, ادىلەتتى, دەموكراتيالىق الەمدىك تارتىپكە قاراي جىلجيمىز», دەدى رەسەيدىڭ سىرتقى ىستەر ءمينيسترى.
قىتاي سىرتقى ىستەر مينيسترلىگىنىڭ ءباسپاسوز حاتشىسى ۆان ۆەنبين جۋرناليستەرگە بەرگەن سۇحباتىندا ماسكەۋ مەن بەيجىڭ «جاھاندىق كوپپوليارلىقتى جانە حالىقارالىق قاتىناستاردى دەموكراتيالاندىرۋدى» ىلگەرىلەتۋدى جالعاستىراتىنىن ايتقان.