مەملەكەت باسشىسى قاسىم-جومارت توقاەۆتىڭ جولداۋى جۇيەلى وزگەرىستەردى كوزدەيدى. بۇل وزگەرىستەر ەڭ الدىمەن ساياسي رەفورمالارعا قاتىستى بولىپ وتىر. سەبەبى بۇگىنگى تاڭدا ەلىمىزدىڭ الەۋمەتتىك-دەموگرافيالىق احۋالى وزگەردى. سوندىقتان پرەزيدەنت بۇل جولداۋدى ءارتۇرلى پروتسەستەرگە ساياسي-اكىمشىلىك جۇيەنىڭ بەيىم بولۋىنا باعىتتادى. پارلامەنتتىڭ قۇزىرەتىن ارتتىرۋعا, سەنات پەن ءماجىلىستىڭ اراقاتىناسىن نىعايتۋعا نەگىزدەلگەن شارالار قابىلداندى.
بۇل رەتتە, قازاقستان حالقى اسسامبلەياسىنىڭ دەپۋتاتتارىنا قاتىستى وزگەرىستەرگە توقتالعاندى ءجون ساناپ وتىرمىن. مەملەكەت باسشىسى قازاقستان حالقى اسسامبلەياسىنىڭ ماجىلىستەگى كۆوتاسىن جويىپ, اتالعان كۆوتانى سەناتقا اۋىستىردى. بۇعان قوسا, بىرنەشە وزگەرىس بولاتىنى تاعى ايتىلدى. ماسەلەن, پارلامەنتاريلەر قۇرامىن پروپورتسيونالدى جانە ماجوريتارلى تارتىپپەن سايلاۋ ۇسىنىلدى. سونىمەن قاتار پارلامەنتتىڭ جوعارعى پالاتاسىنداعى پرەزيدەنتتىك كۆوتا 15-تەن 10 دەپۋتاتقا دەيىن قىسقارىپ, بۇل قادام پرەزيدەنتتىڭ قۇزىرەتىن شەكتەيتىن شارانىڭ ءبىرى بولماق. ول 10 دەپۋتاتتىڭ بەسەۋىن اسسامبلەيا ۇسىنادى. مەملەكەت باسشىسىنىڭ بۇل شەشىمىن جۇرت جىلى قابىلدايدى دەگەن سەنىمدەمىن.
تاعى ءبىر ايتا كەتەرلىگى, سەناتتىڭ قۇزىرەتى كەڭەيىپ, كونستيتۋتسيالىق كەڭەس پەن جوعارى سوت كەڭەسىنىڭ توراعاسى لاۋازىمىنا ۇسىنىلاتىن كانديداتتارعا كەلىسىم بەرۋ قۇقىعىمەن تولىقتى. وسىلايشا, ەلىمىزدەگى ءتۇرلى ەتنوستىق توپتارعا ماندات بەرىلىپ, ولاردىڭ ءۇنى جوعارعى پالاتادا ەستىلۋىنە لايىقتى جاعداي, بىرەگەي مۇمكىندىك جاسالادى. وزدەرىڭىز جاقسى بىلەتىندەي, مەملەكەت باسشىسى زاڭدى تۇردە قازاقستان حالقى اسسامبلەياسىنىڭ توراعاسى. دە يۋرە دە, دە فاكتو دا سولاي. سوندىقتان اسسامبلەيا ۇسىنعان 5 دەپۋتاتتىڭ سەناتتا قىزمەت ەتۋى زاڭدى.
سونىمەن قاتار ەلىمىزدە جاڭادان 3 وبلىس قۇرىلادى. بۇل دا اسا ماڭىزدى, قاجەت شەشىم دەپ ايتار ەدىم. سەبەبى ءبىزدىڭ كوپتەگەن زەرتتەۋلەرىمىز كورسەتىپ وتىرعانداي, اسىرەسە ەلىمىزدىڭ وڭتۇستىك وڭىرىندە حالىق وتە تىعىز شوعىرلانعان. وسى ماسەلە جۇمىس ورنىنىڭ تاپشىلىعىن تۋىنداتىپ وتىر. بۇعان قوسا, الماتىعا ىرگەلەس ورنالاسقان اۋداندار مەن اۋىلداردىڭ ازاماتتارى ءوز ءومىرىن تەك وسى وڭىرمەن بايلانىستىرادى. بۇل جاعداي پاندەميا كەزىندە دە, قاڭتار وقيعاسى كەزىندە دە ەڭ الدىمەن, حالىقتىڭ ءجۇرىپ تۇرۋىنا, قيمىل-قوزعالىسىنا كەرى اسەرىن, كەدەرگىسىن تيگىزدى. ال سەمەي مەن جەزقازعان وڭىرىندە كەرىسىنشە, ەكونوميكالىق جاعدايدىڭ ناشارلىعىنان حالىق سانى ازايا باستادى. تۇرعىندار سانى ازايعان سوڭ شاھاردى, اۋداندى, اۋىلدى دامىتۋعا بيۋدجەتتەن دە قوماقتى قاراجات بولىنبەيتىنى بەلگىلى. ونداي جەردە ءوندىرىس ورىندارى دا قۇرىلمايدى, ساۋدا-ساتتىق دا دامىمايدى.
ەندىگى رەتتە, جاڭادان قۇرىلاتىن وبلىستاردىڭ ينفراقۇرىلىمى دامىپ, جولى جوندەلەتىنى, وزگە وبلىستارمەن بايلانىسى نىعاياتىنى انىق. سوندىقتان مەملەكەت باسشىسىنىڭ بۇل قادامى كوپتەگەن تۇيتكىلدى ماسەلەنىڭ ءتۇيىنىن تارقاتۋعا سەپ بولىپ, باسقارۋ جۇيەسىنە قولايلى جاعداي جاسالادى دەپ سەنەمىن.
ايگۇل سادۋاقاسوۆا,
الەۋمەتتانۋشى