ەلوردادا ناۋرىز مەيرامىنا دايىندىق قىزۋ

قالانىڭ ءتورت اۋدانىندا ناۋرىز مەيرامى اتاپ وتىلەتىن 20 –دان استام ورىن بەلگىلەندى.

22 ناۋرىزدا ساعات 11:00-دەن 15:00-گە دەيىن بارلىق اۋداندا, سونىڭ ىشىندە ەلوردانىڭ ەلدى مەكەندەرىندە «ناۋرىز-دۋمان - 2022» اتتى مادەني-بۇقارالىق ءىس-شارالار ۇيىمداستىرىلادى. ءىس-شارادا ۆەدومستۆولىق باعىنىستى ۇيىمداردىڭ ارتىستەرى مەن شىعارماشىلىق ۇجىمداردىڭ قاتىسۋىمەن كونتسەرتتىك باعدارلاما, ءتۇرلى كوستيۋم كيگەن كەيىپكەرلەر مەن قۋىرشاقتار شوۋىنىڭ باعدارلاماسى ۇسىنىلادى. سونداي-اق جينالعان قاۋىم ارقان تارتۋ, اسىق ويناۋ, توعىز قۇمالاق سياقتى ۇلتتىق سپورت تۇرلەرى بويىنشا جارىستارعا قاتىسا الادى. بۇل كۇنى مەرەكەنىڭ باستى بەلگىسى – ناۋرىز كوجە ۇلتتىق تاعامى دا جۇرتشىلىققا تاراتىلادى.

الماتى اۋدانىندا جوسپارلانعان مەرەكەلىك ءىس-شارالار «قازاق ەلى» مونۋمەنتى الاڭىندا, «ستۋدەنتتەر» ساياباعىندا, بايقوڭىر اۋدانىندا – «اتاتۇرىك» ساياباعىندا, جازۋشىلار اللەياسىندا, ەسىل اۋدانىندا – ەكسپو اۋماعىندا جانە ۇركەر ەلدى مەكەنىندە, سونداي-اق, سارىارقا اۋدانىنداعى – «كوكتال» ساياباعىندا جانە Demalys promenade الاڭىندا وتەدى.

ايتا كەتسەك, 18-19 ناۋرىزدا قالادا الەۋمەتتىك از قامتىلعان, كوپبالالى وتباسىلارعا, جالعىز باستى قارت ادامدارعا جانە حالىقتىڭ الەۋمەتتىك وسال توپتارىنىڭ باسقا دا ساناتتارىنا ازىق-ت ۇلىك سەبەتتەرىن تاراتۋ جوسپارلانۋدا.

سونىمەن قاتار 19 ناۋرىز كۇنى ساعات 11:00-دە ەلوردانىڭ دوستىق ءۇيى الاڭىندا قازاقستان حالقى اسسامبلەياسى قالا تۇرعىندارى ءۇشىن «قوش كەلدىڭ, ءاز ناۋرىز!» ءىس-شاراسىن وتكىزەدى. قوناقتاردى كونتسەرتتىك باعدارلاما, قولدانبالى ونەر بويىنشا ماستەر-كلاستار, جارمەڭكە جانە ۇلتتىق سپورتتىق ويىندار بويىنشا جارىستار وتەدى.

دوستىق ۇيىندە كيىز ۇيلەر مەن التىباقان ورناتىلىپ, ناۋرىز كوجە دايىندالادى. كيىز ۇيلەردىڭ ىشىندە ەلوردالىق ەتنومادەني بىرلەستىكتەردىڭ ۇلتتىق ناقىشتاعى ەكسپوزيتسيالارى قويىلادى. سونداي-اق ءاربىر كيىز ۇيدە قولدانبالى ونەر بويىنشا شەبەرلىك سىنىپتارى كورسەتىلەدى.

ساعات 12:00-دە «بۇقا تارتىس», «اسىق ويناۋ», «گىر كوتەرۋ», «قازاقشا كۇرەس», «قول كۇرەس» باعىتتارى بويىنشا ۇلتتىق سپورتتىق جارىستار باستالادى. جارىس قورىتىندىسى بويىنشا جەڭىمپازدارعا اقشالاي سىيلىقتار بەرىلەدى.

كونتسەرتتىك باعدارلامامەن ەلوردانىڭ ەتنومادەني ورتالىقتارىنىڭ كاسىبي, كوركەم ۇجىمدارى ونەر كورسەتەدى.

18-31 ناۋرىز ارالىعىندا قۋىرشاق تەاترى «ناۋرىز-دۋمان» قۋىرشاقتار شوۋىنا شاقىرادى. قويىلىمداردىڭ باستالۋ ۋاقىتى: 10:00, 12:00, 14:00 جانە 16:00.

قالانىڭ ورتالىقتاندىرىلعان كىتاپحانا جۇيەسى دە مەرەكەدەن تىس قالعان جوق. قالالىق كىتاپحانالار كۇن سايىن ناۋرىز مەيرامىنا وراي ءىس-شارالار وتكىزەدى.

17 ناۋرىزدا №3 بالالار كىتاپحاناسى «جاساي بەر, ءاز ناۋرىز» اقپارات ساعاتىن, ال №4 بالالار كىتاپحاناسى – «كوڭىل كوتەرەمىز, ناۋرىز مەرەكەسىن قارسى الامىز» مەرەكەلىك كالەيدوسكوپىن, سونداي-اق «ناۋرىز – بىرلىك, بەيبىتشىلىك جانە جاڭارۋ مەرەكەسى!» ءىس-شارالارىن وتكىزەدى.

ءدال وسى كۇنى №5 بۇقارالىق كىتاپحانادا «سالەم, ناۋرىز!», ورتالىق قالالىق كىتاپحانادا – «جارقىرا, جاينا, ناۋرىزىم!», №9 بۇقارالىق كىتاپحانادا – « ۇلىستىڭ ۇلى كۇنى – ناۋرىز» كەشى ۇيىمداستىرىلادى. سونىمەن قاتار №4 بۇقارالىق كىتاپحانادا «ناۋرىز-دۋمان» ۇلتتىق تاريح ساعاتى, №7 بۇقارالىق كىتاپحانادا «ارمىسىڭ, ءاز ناۋرىز! اق مول بولسىن!», № 8 بالالار كىتاپحاناسىنا «ناۋرىز كەلەدى!» ءىس-شاراسى وتكىزىلەدى.

19 ناۋرىزدا № 3 بۇقارالىق كىتاپحانادا « ۇلىستىڭ ۇلى كۇنى – ناۋرىز» اڭگىمە-ويىنىن, №2 بۇقارالىق كىتاپحانادا «نۇر سەبەلە – ۇلىستىڭ ۇلى كۇنى» مەرەكەلىك كەشىن, №10 بۇقارالىق كىتاپحانادا «قازاقشا ستيلدەگى دەفيلە» تاريح ساعاتىن, №15 بۇقارالىق كىتاپحانادا « ۇلىستىڭ ۇلى كۇنى – ءاز ناۋرىز!» كىتاپ كورمەسىن ۇيىمداستىرۋ جوسپارلانۋدا.

ساكەن سەيفۋللين مۇراجايى وسى اپتادا الەۋمەتتىك جەلىلەردە ناۋرىز مەيرامى مەن قازاق ۇلتتىق داستۇرلەرىنە ارنالعان ونلاين فورماتتا ءىس-شارالار وتكىزەدى.

ال 25 ناۋرىزدا ەلوردانىڭ مەملەكەتتىك اكادەميالىق فيلارمونيادا «ناۋرىز سىيى» ۇلتتىق سىيلىعى وتەدى. جوبا تەك مادەنيەتتى عانا ەمەس, سونىمەن بىرگە ۇلتتىق بايلىقتىڭ الۋان تۇرلىلىگىن بىلدىرەتىن حالىق شەبەرلەرىنە ارنالعان.

سونىمەن قاتار, 18-22 ناۋرىز ارالىعىندا ارناساي كوشەسى, 109 بويىنداعى ساۋدا پاۆيلونىنىڭ اۋماعىندا ناۋرىز مەرەكەسىنە وراي ۇلكەن اۋىل شارۋاشىلىعى جارمەڭكەسى ۇيىمداستىرىلادى. ال ونداعى باعالار بازار باعاسىنان 15%-عا تومەن بولادى.