قارجىنى جىمقىرىپ, ءىز سۋىتقان
پەتروپاۆل قالاسىنىڭ پروكۋرورى قونىسبەك يبراەۆ ءمالىم ەتكەندەي,تۇرعىن ءۇي-كوممۋنالدىق شارۋاشىلىقتى جاڭعىرتۋ باعدارلاماسى شەڭبەرىندە بولىنگەن قوماقتى قارجىعا جەمقورلاردىڭ قولدى مول سالعانى بايقالادى. «كومپانيا ەزار» جشس كوپ قاباتتى 7 ءۇيدىڭ جوندەۋىنە قاراستىرىلعان 120 ميلليون تەڭگەنىڭ سايدا سانىن, قۇمدا ءىزىن قالدىرماعان. ونىڭ باسشىسىنا ىزدەۋ سالىنعان. «سولتۇستىك باسقارۋ كومپانياسى» جشس-ءنىڭ جەتەكشىسى پاۆەل گلوبا قۇرىلىس جۇمىستارىنىڭ اياقتالماعانىن بىلە تۇرا, بيۋدجەتتىڭ قوماقتى قارجىسىن اتالمىش قۇرىلىس كومپانياسىنىڭ ەسەپشوتىنا اۋدارىپ جىبەرگەن. ءسوز اراسىندا بۇل مىرزانىڭ پەتروپاۆل قالاسى اكىمىنىڭ ورىنباسارى قىزمەتىن اتقارعان كەزەڭدە كوپتەگەن بىلىق-شىلىققا جول بەرىپ, قوزعالعان قىلمىستىق ءىستىڭ اقىرى سيىرقۇيىمشاقتانىپ كەتكەنىن ايتا كەتكەن ءجون. قارجىنى جىمقىرىپ, ىزىنە مايشام الىپ تۇسسە دە, تاپتىرماي جۇرگەن كايرالاپوۆ پەن تۇرعىن ءۇي ينسپەكتسياسىنىڭ بۇرىنعى باسشىسى قانات بايمۇحامبەتوۆ قىلمىستىق جاۋاپكەرشىلىككە تارتىلعان. قۇقىق قورعاۋ قىزمەتكەرلەرى مىنا الاياقتىق ارەكەتتىڭ كىمنەن شىققانىن بىلمەي اڭ-تاڭ. تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمىنىڭ جۇمىسىن تەكسەرۋ بارىسىندا مەملەكەتتىك تۇرعىن ءۇي قورىنان بەرىلگەن پاتەرگە قالدىق قۇنىن تولەمەۋ فاكتىسى سوپاڭ ەتىپ شىعا كەلگەن. ءبىر قىزىعى, سالىق قىزمەتى مەن قازىناشىلدىق ورگانعا ەشقانداي قاراجات تۇسپەگەنىنە قاراماستان اكىمدىككە پاتەر قۇنىنىڭ تولەنگەنى جايلى جالعان تۇبىرتەك وتكىزىلگەن. وسىنىڭ نەگىزىندە پاتەردى جەكەشەلەندىرۋ جونىندە شەشىم شىعارىلعان. ەندى كەلتىرىلگەن 1,3 ميلليون تەڭگە شىعىندى كىم وتەيتىنى بەلگىسىز. ويتكەنى, پاتەر يەلەرى دە, ولاردىڭ سەنىمدى وكىلى – ءبولىمنىڭ بۇرىنعى قىزمەتكەرلەرى دە كىنانى ءبىر-بىرىنە اۋدارىپ, الاياقتىق جاساماعاندارىنا انت-سۋ ءىشىپ وتىر.تىزىمدەگى «ءولى جاندار»
پەتروپاۆل قالاسىنداعى قۇرىلىس كوللەدجىنىڭ باسشىلىعى بيۋدجەتتىڭ قاراجاتىن مايشەلپەكشە سورىپ, جالعاندى جالپاعىنان باسىپ كەلگەن. اتالمىش وقۋ ورنىنىڭ ديرەكتورى جەڭىس بابجانوۆ ساباق بەرمەسە دە, جالعان تابەل تولتىرۋ ارقىلى جارتى ميلليون تەڭگەنى قالتاعا سالعان. «دانىككەننەن قۇنىققان جامان» دەگەن. مەملەكەتتىك وقۋ توپتارىنداعى ستۋدەنتتەردىڭ سانى كەمى 25 بولۋ كەرەك دەگەن ستاندارتتىق تالاپتى ورىنداۋ ءۇشىن «ءولى جانداردىڭ» ەسەبىنەن تولتىرۋعا ەش شىمىرىكپەگەن. ولاردىڭ اراسىندا بانك قىزمەتكەرى دە, مەكتەپ مۇعالىمى دە, الىس اۋدان تۇرعىندارى دا, ءتىپتى 60-تان اسقان كۇزەتشى دە ءجۇر. ال, ولارعا تولەنگەن شاكىرتاقىنى پىشاق ءۇستى ءبولىپ العان. ءسويتىپ, مەملەكەتكە كەلگەن جالپى شىعىن 2 ميلليون تەڭگەنى قۇراعان. وبلىستىق پروكۋراتۋرانىڭ باسقارما باسشىسى ارمان نۇرتازين كوللەدج ديرەكتورىنا قاتىستى قىلمىستىق ءىس قوزعالىپ, 176-بابى بويىنشا ايىپ تاعىلعانىن جەتكىزدى. سول سياقتى تايىنشا اگروبيزنەس كوللەدجىندە دە وسىعان ۇقساس وقيعا ورىن الىپ, مەملەكەتتىڭ 1,2 ميلليون تەڭگەسى تالان-تاراجعا تۇسكەن. قوس ديرەكتور دا قىزمەتتەرىنەن الاستاتىلدى. ءومىر ەسقالي, «ەگەمەن قازاقستان». سولتۇستىك قازاقستان وبلىسى.