ءاز ناۋرىزدى ۇلكەن-كىشى جارىسا كۇتەتىنى اقيقات. ارقانىڭ ايازى باسەڭسىپ, كۇن جىلۋى دا سەزىلە باستادى. ەلىمىزدىڭ تۇكپىر-تۇكپىرى ۇلىستىڭ ۇلى كۇنىن تويلاپ جاتقاندا, ەلوردالىق بالالار دا مەيرامنان تىس قالعان جوق. اتاپ ايتساق, استانا قالاسىنداعى №57 «سالتانات» بالاباقشاسىنىڭ بالاقايلارى ءاز ناۋرىزدى ءان-بيىمەن, تاقپاقتارىمەن قارسى الدى. ءۇش اي بويى جەر-انانى توڭدىرعان قار مەن سۋىق ىزعاردىڭ كەتۋ مەن جەر اياعىنىڭ كەڭۋىن, وعان قوسا ۇزىنسارىنى كۇتكەن, ويىن-دۋماندى اڭساعان بالالاردىڭ قۋانىشىندا شەك جوق.
جىر سىيلاعان, نۇر سىيلاعان تىرلىككە,
قاستەرلەدىك, قادىرىڭدى بىلدىك تە.
قۇتتى بولسىن, ۇلىس كۇن جۇمىلدىرعان,
ءبارىمىزدى ىنتىماق پەن بىرلىككە, – دەپ ءبىرى تاقپاقتاتسا, ەكىنشىلەرى كورىنىستەر قويدى. قىرىقتىڭ ءبىرى قىدىر اتا كەلىپ, بالالارعا باتا بەردى. «ەل بولام دەسەڭ, بەسىگىڭدى تۇزە» دەگەن ءتامسىل بار. تەكتىلىگى تەرەڭدە جاتقان ەلىمىزدىڭ بالا تاربيەسىنە باسا نازار اۋدارعانى بەلگىلى. ءاردايىم ۇرپاعىنىڭ رۋحاني باي ازامات بوپ وسۋىنە كوڭىل بولگەن حالقىمىز بالاسىنىڭ دەنە ءبىتىمىنىڭ دۇرىس قالىپتاسۋ مەن اقىل-ويىنىڭ جەتىلۋى ءۇشىن ۇلتتىق ويىنداردى ويناتۋدى ءجون كورگەن. قازىرگى كۇنى دە قالا بالاسى ءوز تامىرىنان الشاقتاپ كەتپەسى ءۇشىن بالاباقشادان باستاپ حالىقتىق پەداگوگيكانى بويلارىنا ءسىڭىرىپ وسىرۋدە. ونىڭ دالەلى, بالاقانداردىڭ وزدەرى ويناعان, كورسەتكەن ارقان تارتىسى, قىز قۋ ويىندارى. بۇل سالت-ءداستۇر بالانى جاقسىدان ۇيرەنۋگە, جاماننان جيرەنۋگە باۋلۋدىڭ كورىنىسى.
باسى بارلىق ىرىستىڭ,
باسى بارلىق ۇلى ءىستىڭ,
قۇتتى بولسىن, ناۋرىز تويى –
ۇلى كۇنى ۇلىستىڭ!
ۆەنەرا تۇگەلباي,
«ەگەمەن قازاقستان».