نەگىزىندە Amanat پارتياسى كەز كەلگەن باسقا باسقارۋشى ورگان سەكىلدى ەكونوميكانى رەتتەۋگە ارالاسپاۋى, ەكونوميكانىڭ قالىپتى جانە تۇراقتى جۇمىس اتقارۋىن قامتاماسىز ەتۋى كەرەك. وسى باعىتتا قانداي دا ءبىر قادامدارعا بارىپ, رەفورما جۇرگىزىپ, ءتۇرلى تاۋەكەلدەردى دەر ۋاقىتىندا اڭعارىپ, قاجەتتى شەشىمدەردى قابىلداعانى ءجون.
ەگەر پارتيا ەكونوميكالىق تاۋەكەلدەردى جويا السا نەمەسە ونىڭ قاتەرىن تومەندەتە السا, سوندا عانا قوعام جانە ەكونوميكا ءۇشىن پايدالى بولماق. باسقارۋشى پارتيا ەكونوميكانىڭ دامۋ ستراتەگياسىن انىقتايدى. پارتيا «بىزدە قانداي ەكونوميكا جۇمىس ىستەيدى», «قالاي قاراي قوزعالىپ بارا جاتىر», «ول قالاي داميدى», «جالپى قالاي دامۋى كەرەك» دەگەن سۇراقتارعا جاۋاپ بەرەدى. سودان كەلىپ نەشە ءتۇرلى جوسپار, باعدارلاما, جوبالار جازىلا باستايدى.
الەمدە كوبىنە قوس پارتيالى جۇيە جاقسى جولعا قويىلعان. ماسەلەن, ۇلىبريتانيادا لەيبوريستەر مەن كونسەرۆاتورلار ۇنەمى باسەكەنىڭ كورىگىن قىزدىرىپ جاتادى. ەكەۋىنىڭ باعدارلاماسى, تاڭداعان دامۋ ستراتەگيالارى ەكى ءتۇرلى. بىرەسە بيلىككە لەيبوريستەر كەلەدى, بىرەسە كونسەرۆاتورلار ۇكىمەتتى باسقارادى. اقش-تا دا سونداي جۇيە. دەموكراتتار مەن رەسپۋبليكاشىلدار ەل بولاشاعى مەن مەملەكەتتىڭ بەت-بەينەسىن قالاي كورەتىنىن وزدەرىنشە دالەلدەپ, قىزۋ تالاس جۇرگىزۋدەن شارشامايدى. دەموكراتتار بيزنەسكە جاعداي جاساۋعا باسىمدىق بەرىپ, ولار ءۇشىن سالىق ستاۆكالارىن تومەندەتۋ, ساۋدا جانە كەدەن كەدەرگىلەرىن جويۋ, ءتۇرلى پرەفەرەنتسيالار ۇسىنۋ بويىنشا جۇمىس جۇرگىزەدى. ال رەسپۋبليكاشىلدار نەگىزىنەن الەۋمەتتىك باعىتتى جوعارى قويادى. كەدەيلەرگە كومەك كورسەتەيىك, جاردەماقىنى ارتتىرايىق, قوعامداعى تەڭسىزدىكتى جويۋىمىز كەرەك دەگەن ۇستانىمدارىن ءجيى كوتەرەدى. وسى تۇرعىدا ولاردان ۇلگى العان ارتىق بولماس ەدى.
جىل باستالعالى پرەزيدەنتتىڭ بىرقاتار رەفورماعا («سامۇرىق-قازىنا», قازاقستان دامۋ بانكى, وليگارحياعا قارسى كۇرەس, ت.ب. – رەد) كىرىستى. ونىڭ كوبى – ەكونوميكالىق تۇرعىدان گورى ساياسي سالماعى باسىم پروبلەمالار. دەسە دە ول ماسەلەلەر وڭىنان شەشىلسە, ءسوز جوق ەكونوميكاعا جاعىمدى اسەر بەرەدى. پرەزيدەنت پەن پارتيا جەكەلەگەن توپتاردىڭ مۇددەسىنەن ەل مۇددەسىن قانشالىقتى جوعارى قويىپ, قانشالىقتى باتىل قادامدارعا بارا الادى دەگەن ماسەلە – قازىر ۋاقىت ەنشىسىندە.
ارمان بەيسەمباەۆ,
TICKMILL حالىقارالىق بروكەرلىك توبىنىڭ ساراپشىسى