ءوز ورتاڭا, ەل-جۇرتىڭا, اتا-انا, باۋىر, اعايىن-تۋىس, جورا-جولداسىڭا كۇن سايىن ءوزىڭنىڭ ريزالىعىڭدى ءبىلدىرىپ جۇرگەنگە نە جەتسىن. ءوزىڭ شىن نيەتىڭمەن العىس ايتقىڭ كەلەتىن ادامدار كوپ, ارينە. سوندا دا بولسا, سولاردىڭ اراسىنان وزىڭە ەرەكشە اسەر ەتكەن, ءومىرىڭنىڭ جاقسى جاعىنا وزگەرۋىنە اتسالىسقان, سەبەپكەر بولعان جانعا ىستىق ىقىلاسىڭدى ەرەكشە جاعدايدا بىلدىرگىڭ كەلەدى ەمەس پە.
وسى ورايدا, ياعني جىل سايىن كوكتەمنىڭ العاشقى كۇنى ەلىمىزدە مامىراجاي قالىپتا اتالىپ وتەتىن العىس ايتۋ كۇنى مەرەكەسى قارساڭىندا مەن بىلىكتى دارىگەر-ماسساجشى جۇلدىز سەيتبەكقىزى ومىراليەۆاعا شىن جۇرەگىممەن العىسىمدى ەلىمىزدىڭ باس باسىلىمى – «ەگەمەن قازاقستان» گازەتى ارقىلى جەتكىزگىم كەلەدى.
2019 جىلى ينسۋلت الىپ, دەنەمنىڭ وڭ جاق بولىگى سال بولىپ قالدى. بۇل مەن ءۇشىن, وتباسىم ءۇشىن اۋىر جاعداي ەدى. مۇنداي جاعداي ەشكىمنىڭ باسىنا كەلمەسىن. ءومىرىم تۇنەككە اينالعانداي بولدى. دارىگەرگە جۇگىندىم, ءتۇرلى ەم-دوم قابىلدادىم. دارىگەرلەر ماعان نەگىزىنەن ماسساج الۋ قاجەتتىگىن باسا ايتتى. سودان نۇر-سۇلتان قالاسىنداعى №8 ەمحانانىڭ دارىگەر-ماسساجشىسى جۇلدىز سەيتبەكقىزىنا باردىم. ول كىسى مەنى جىلى قابىلداپ, مەنى ەمدەي باستادى. 20 جىلدىق تاجىريبەسى بار بىلىكتى مامان مەنى 10 كۇننىڭ ىشىندە اياققا تۇرعىزدى. قولدارىم جۇمىس ىستەپ, كادىمگىدەي جۇرە باستادىم. بۇل مەن ءۇشىن ۇلكەن قۋانىش ەدى.
مەن العىس ايتۋ كۇنى مەرەكەسى قارساڭىندا جۇلدىز سەيتبەكقىزىنا رياسىز پەيىلمەن العىسىمدى بىلدىرگىم كەلەدى. ەلىمىزدە وسىنداي بىلىكتى ماماندار كوپ بولسا ەكەن دەيمىن. جۇلدىز حانىمعا قاجىماس قايرات, ىسىنە بەرەكە, مىقتى دەنساۋلىق تىلەيمىن!
مۇرات يساحوۆ,
نۇر-سۇلتان قالاسىنىڭ تۇرعىنى