استىقتى اقمولا وبلىسى بيىل 4 ميلليون 200 مىڭ گەكتارعا ىرىزدىق ءدانىن سەبۋدى جوسپارلاپ وتىر. ءوتكەن جىلدارداعى سياقتى بيىل دا اۋىلشارۋاشىلىق داقىلدارىن ورنالاستىرۋداعى ءارتاراپتاندىرۋ قادامدارى جالعاسىن تاپپاق.
ديقانداردىڭ ەسەبى بويىنشا, بيىل مايلى داقىلدار ەگىستىگىنىڭ اۋقىمى 271 مىڭ گەكتاردى قۇرايدى. بۇل بىلتىرعى جىلعى دەڭگەيدەن 20 مىڭ گەكتارعا جۋىق كوپ. ال كوپجىلدىق ءشوپتى قوسىپ ەسەپتەگەندە مال ازىقتىق ەكپە ءشوپ اۋقىمى جارتى ميلليون گەكتاردان اسىپ تۇسپەك. بۇعان قاجەتتى تۇقىم قورى الدىن الا دايىندالىپ قويىلعان.
جالپى, وبلىس بويىنشا كوكتەمگى ەگىسكە قاجەتتى تۇقىم قورى 529 مىڭ توننانى قۇراسا, ول تولىق قۇرامدا قۇيىپ الىنعان. ونىڭ 330 مىڭ تونناسى سۇرىپتاۋ سىناقتارىنان وتكىزىلدى. قازىر تۇقىم تازالاۋ جۇمىستارى قارقىن الۋدا.
وبلىستىق اۋىل شارۋاشىلىعى باسقارماسى باسشىسىنىڭ ورىنباسارى ديماش تالاسباەۆتان كوكتەمگى ناۋقاندى جانار-جاعارمايمەن قامتاماسىز ەتۋ جايى تۋرالى سۇراعانىمىزدا, دايىندىق بىلتىرعىدان اناعۇرلىم جاقسى ەكەندىگىن بىلدىك.
– ۇكىمەت كۇنى كەشە وبلىسىمىزعا ءار تونناسىن 98312 تەڭگەدەن 65 مىڭ توننا ديزەل وتىنىن ءبولدى, – دەيدى ول. – وسى تاقىلەتتەس كومەك باسقا دا ماتەريالدارعا كەپىلدى تۇردە بەرىلەتىن بولادى. بۇل ديقاندار قاۋىمىن جىگەرلەندىرە تۇسەدى. بۇگىنگى كۇنى جاۋاپتى ناۋقانعا قاتىساتىن تەحنيكانىڭ 78 پايىزى دايىندىق ساپىنا قويىلدى. استىقتى القاپتارعا 17 مىڭ دانا ءدان سەپكىش شىعارىلسا, ونىڭ 923-ءى جوعارى ونىمدىلىكتەگى تۇقىم سەبۋ كەشەندەرى.
باقبەرگەن امالبەك,
«ەگەمەن قازاقستان».
اقمولا وبلىسى.