الماتى قالاسىنداعى ءماجيت بەگالين اتىنداعى №120 مەكتەپ-گيمنازيادا «قازاقفيلم» كينوستۋدياسىنىڭ قولداۋىمەن بەلگىلى كينورەجيسسەردىڭ 100 جىلدىق مەرەيتويىنا وراي سالتاناتتى جيىن ءوتىپ, سوڭىنان كونتسەرت ۇيىمداستىرىلدى.
اتالعان شاراعا ءماجيت بەگاليننىڭ تۋىستارى – گۇلنار, ايجان جانە ايدار بەگاليندەر, كسرو حالىق ءارتىسى, قازاقستاننىڭ ەڭبەك ەرى, كينوستۋديانىڭ كوركەمدىك جەتەكشىسى ءاسانالى ءاشىموۆ, دەرەكتى كينو رەجيسسەرى بولات نۇسىمبەكوۆ, سونداي-اق «قازاقفيلمنىڭ» ۆيتسە-پرەزيدەنتتەرى ايدارحان ادىلباەۆ پەن ايدار باتالوۆ جانە باسقالارى قاتىستى.
مادەني ءىس-شارا الدىندا قوناقتار ءماجيت بەگاليننىڭ قۇجاتتارى, جەكە زاتتارى, ناگرادالارى, سۋرەتتەرى مەن ءوزى تۇسىرگەن ءفيلمنىڭ پوستەرلەرى ساقتالعان مەكتەپتىڭ مۋزەيىن ارالاپ, قىزىقتى دەرەكتەرمەن تانىستى. كينوستۋديانىڭ ۆيتسە-پرەزيدەنتى ايدار باتالوۆ رەجيسسەردىڭ ەسىمىن ۇلىقتاپ جۇرگەن ۇستازدارعا العىسىن ءبىلدىرىپ, مەكتەپ ديرەكتورى ايسۇلۋ بوتا-ەۆاعا شاكەن ايمانوۆتىڭ فيلمدەرى توپتاستىرىلعان DVD جيناعىن تارتۋ ەتتى.
قازاق كينو ونەرىنىڭ ساڭلاعى ءاسانالى ءاشىموۆتى مەكتەپ وقۋشىلارى ەرەكشە قوشەمەتپەن قارسى الدى. ءوز سوزىندە تانىمال اكتەر وسىدان 10 جىل بۇرىن مۋزەيدىڭ اشىلۋىنا قاتىسقانىن ەسكە الىپ, وسىنداعى جادىگەرلەر رەجيسسەردىڭ ءىنىسى قاسىم بەگاليننىڭ ارقاسىندا جينالعانىن ايتتى.
– ءماجيت بەگالين مەنەن 15 جاس ۇلكەن بولسا دا, ءبىر-بىرىمىزبەن وڭاي ءتىل تابىستىق. ماجەكەڭ ماعان كوپ نارسەنى ۇيرەتتى. وتە مەيىرىمدى جانە ءبىلىمدى ادام ەدى, تەك قانا شىندىقتى ايتۋعا تالپىناتىن. ارامىزدان ەرتە كەتسە دە, قازاق كينوسىنىڭ تاريحىندا وشپەيتىن ءىز قالدىردى, – دەدى ءاسانالى ءاشىموۆ.
ۇلتتىق كينونىڭ ىرگەتاسىن قالاپ, قالىپتاسۋى جولىندا ولشەۋسىز ەڭبەك سىڭىرگەن ءماجيت بەگاليننىڭ ەسىمىن يەلەنىپ وتىرعان مەكتەپ ۇجىمى مەن وندا ءبىلىم الاتىن ۇرپاق تۇلعانى قاستەرلەۋ جولىندا تىنباي ىزدەنىستە كەلە جاتقانىن ماقتانىشپەن جەتكىزدى.
الماتى