ەلوردالىق حالىقتى جۇمىسپەن قامتۋ ورتالىعى ديرەكتورىنىڭ ورىنباسارى تالعات ەسىموۆ اكىمدىكتە وتكەن بريفينگتە قالادا قانشا ادام رەسمي تۇردە جۇمىس ىزدەپ جۇرگەنىن ايتتى, دەپ حابارلايدى Egemen.kz.
تالعات ەسىموۆ ۇلتتىق ستاتيستيكا بيۋروسىنىڭ دەرەكتەرىنە سايكەس, 2021 جىلدىڭ IV توقسانىنىڭ قورىتىندىسى بويىنشا ەلوردادا جۇمىسسىزدىق دەڭگەيى 4,6%-دى قۇرايتىنىن, بۇل رەسپۋبليكالىق ماننەن 0,3%-عا (قر بويىنشا-4,9%) تومەن ەكەنىن حابارلادى.
«ەلوردادا جۇمىسسىزدار سانى 28 226 ادامدى قۇرايدى, ونىڭ ىشىندە 6203 ادام 15-28 جاس ارالىعىنداعى جاستار», دەپ ناقتىلادى ول.
2021 جىلدىڭ قورىتىندىسى بويىنشا حالىقتى جۇمىسپەن قامتۋ ورتالىعىنا ەڭبەك دەلدالدىعى ءۇشىن 18 924 ادام جۇگىندى, «ەڭبەك» مەملەكەتتىك باعدارلاماسى شەڭبەرىندە جۇمىسپەن قامتۋعا جاردەمدەسۋ شارالارىمەن 23 240 ادام قامتىلدى.