اۋليەاتادان... اپەننين تۇبەگىنە

جامبىل وبلىسىنان العاشقى 18 توننا توپس يتالياعا جونەلتىلدى

قازاقستاننىڭ وڭدەلگەن ءجۇن ونىمدەرىن يتالياعا ەكسپورتتاۋ باستالدى. جاقىندا جامبىل وبلىسىنان العاشقى 18 توننا توپس (جۇقا نەگىزدەگى قوي ءجۇنىنىڭ جارتىلاي فابريكاتى) اپەننين تۇبەگىنە جونەلتىلدى. اتالعان ءونىمدى جەتكىزۋگە «قازاگرو» ۇلتتىق حولدينگىنىڭ قۇرامىنا كىرەتىن «قازاگروونىم» اق يتاليالىق فيرمالاردىڭ بىرىمەن مامىلە جاسادى. جاقىن ارادا ولار شەتەلدىك ارىپتەستەرىنە 54 توننا توپستى جەتكىزۋدى جوسپارلاپ وتىر. قازاقستاندىق كومپانيا الداعى ۋاقىتتا 140 توننا ءونىم جەتكىزۋگە قوسىمشا كەلىسىمشارت جاساماقشى. جالپى, اعىمداعى جىلى 500 توننا وڭدەلگەن ءجۇن ەكسپورتقا شىعارىلماقشى. قوي جۇنىنەن توپس شىعارۋ 2012 جىلى «قازاگروونىم» اق پەن «فابريكا پوش-تاراز» جشس بىرلەسكەن جوباسىنىڭ ناتيجەسى. ونى وڭدەۋ بارىسى يتاليالىق مامانداردىڭ باقى­لاۋىمەن جۇزەگە اسىرىلدى. بۇل قوي ءجۇنىنىڭ ساپاسىن جاقسارتۋعا جانە اقىرعى ءونىمدى الەمدىك ستاندارتتارعا سايكەس ەتۋگە مۇمكىندىك بەردى. توپس وڭدەۋ بويىنشا جابدىق حولدينگ قۇرامىنداعى ەنشىلەس كومپانيانىڭ ءبىرى «اگرارلىق نەسيە كورپوراتسياسى» اق قارجىلىق قولداۋىمەن ەۋروپادان جەتكىزىلگەن بولاتىن. «قازاگروونىم» اق پەن VICOTEX S.r.l. يتا­ليالىق كومپانياسى اراسىنداعى قوي ءجۇنى ءونىمىن جەتكىزۋ بويىنشا مامىلەنىڭ جالپى سوماسى 598 مىڭ اقش دوللارىن قۇرايدى. سونىمەن بىرگە, اعىمداعى جىلدىڭ قاڭتارىندا قازاقستان رەسپۋبليكاسىنىڭ ۇلتتىق بانكى وتكىزگەن ۇلتتىق ۆاليۋتانىڭ باعامى وزگەرۋىنە بايلانىستى ءونىمنىڭ تيىمدىلىگى 35 پايىزدى قۇرادى. بۇل ءوندىرۋشى تاراپ ءۇشىن قولايلى جاعداي تۋدىردى. كوسەمالى ساتتىباي ۇلى, «ەگەمەن قازاقستان». جامبىل وبلىسى.