«انالار ءۇيى» اشىلدى

ول مەتسەنات مەرەيلى ءىسىن جالعاستىرا بەرمەك

جەسىرىن جاتقا بەرمەگەن, جەتىمىن جىلاتپاعان قازاقى قاسيەت بۇگىنگىدەي قاتىگەزدىگى باسىمداۋ قوعامدا كەرەك-اق. وسىنداي يماندىلىق قادامدارىنا كاسىپكەرلەردىڭ ۇيىتقى بولۋى دا قۋانتادى. جاقىندا اقتوبە وبلىسى كاسىپكەرلەرى ايماقتىق كەڭەسىنىڭ توراعاسى, «التىن قىران» جشس ديرەكتورى يسلامبەك سالجانوۆ ءىرى كومپانيالار باسشىلارىمەن, كاسىپكەرلەرمەن كەزدەسۋ بارىسىندا «انالار ءۇيى» الەۋمەتتىك جوباسىنىڭ تۇساۋىن كەستى. ونىڭ باستاماشىسى – بەلگىلى بيزنەسمەن ايدىن راحىمباەۆ. «انالار ءۇيى» الەۋمەتتىك جوباسىنىڭ نەگىزگى ماقساتى – الەۋمەتتىك جەتىمدىكتىڭ الدىن الۋ بولىپ تابىلادى. – وسى جوبانى جۇزەگە اسىرۋ ارقىلى ەلىمىزدە جەتىمدەر سانىن ازايتۋدى كوز­دەيمىز, – دەپ اتاپ ءوتتى يسلامبەك تولەۋباي ۇلى. ونىڭ ايتۋىنشا, قازىردىڭ وزىندە ەلىمىزدىڭ ايماقتارىندا جاس انالارعا ارنالعان 23 ورتالىق جۇمىس ىستەيدى. رەسپۋبليكا بويىنشا وسىنداي 58 ورتالىق اشۋ ماقسات ەتىلگەن. ولاردا بەلگىلى ءبىر سەبەپتەرمەن جاس سابيلەرىنەن باس تارتۋدى شەشكەن ايەلدەر ۋاقىتشا تۇرا الادى. قازاقستاندىق كاسىپكەرلەر تاعدىر اۋىرتپالىعىن ارقالاعان وسىنداي انالارعا قولداۋ كورسەتۋگە ۇمتىلۋدا. ول ءۇشىن ءار وبلىس ورتالىعىندا كوتتەدجدەر جالعا الىنادى, ولارعا تەك باسپانا مەن تاماق قانا بەرىلىپ قويمايدى, باسىنا ءىس تۇسكەن ايەلدەرگە پسيحولوگيالىق كومەك كورسەتىلەدى. قوردىڭ بىردەن ءبىر قامقورشىسى يسلامبەك سالجانوۆتىڭ ءوزى بولىپ تابىلادى. مەتسەنات ەلىمىزدىڭ باتىس وڭىرىندە وسىنداي ورتالىقتار اشۋعا جانە جوبا باس­تاماشىسىنا كومەكتەسۋگە ىنتا ءبىل­دىرىپ وتىر. اقتوبەدە 10 اناعا شاقتالعان ورتالىق ۇستىمىزدەگى جىلدىڭ 1 اقپانىنان باستاپ جۇمىس ىستەۋدە. مەكەمەنىڭ شىعىنىن مەتسەنات كاسىپكەر ءوز موينىنا العان. مۇندا قازىر بەس جاس انا تۇرىپ جاتىر. ۇيلەستىرۋشى پەرزەنتحانالارمەن بايلانىس جاساپ تۇرادى, ەگەر قاجەتتىلىك تۋىپ جاتسا پەريناتالدىق ورتالىققا بارىپ, جاس انالاردى سابيلەرىن تاستاپ كەتپەۋگە ۇگىتتەيدى, «انالار ۇيىندە» تۇرۋدى ۇسىنادى. جاس انالارمەن بىرگە تاۋلىك بويى مەدبيكە بولادى. – قازىر ەلىمىزدە 12 مىڭ جەتىم بالا بار ەكەن. جاڭا ورتالىقتا ءار ءتار­­بيەلەنۋشىگە 120 مىڭ تەڭگە قاراس­تىرىلعان. ەڭ باس­تىسى دا, بۇل ەمەس. وسىنداي انالار ءۇيىن اشۋ ارقىلى جىلىنا 600 بالانى جەتىمدىك تاقسىرەتىنەن قۇتقارۋ ماڭىزدى بولماق. ءبىز بالا­لاردىڭ بالالار ۇيىنە جىبەرىلۋىنە جول بەرمەۋىمىز كەرەك. ولار بولاشاقتا ءتۇرلى سالانىڭ ماماندارى, ەل ازاماتتارى. مۇنداي ماڭىزدى الەۋمەتتىك جوبانى قولداۋىمىز كەرەك. سونىمەن بىرگە, تەك جەتىمدىك ماسەلەسىن شەشىپ قانا قويماي, ناقتى پروبلەمانىڭ سەبەپتەرىنىڭ الدىن الۋىمىز قاجەت, – دەيدى يسلامبەك سالجانوۆ. كەزدەسۋگە قاتىسۋشىلار الەۋمەتتىك جوبانى ءجۇ­زەگە اسىرۋدى قولدايتىندىقتارىن ءبىلدىردى, اقتوبەدە تاعى ءبىر «انالار ءۇيىن» اشۋدى ۇسىندى. جاقىن كۇندەردە مۇنداي الەۋمەتتىك وڭالتۋ ورتالىقتارى اقتاۋ, اتىراۋ جانە ورال قالالارىندا دا جۇمىس ىستەيتىن بولادى. ساتىبالدى ءساۋىرباي, «ەگەمەن قازاقستان». اقتوبە وبلىسى.