Facebook پەن Instagram-دا يمانعالي تاسماعامبەتوۆتىڭ اتىنان اشىلعان پاراقشالاردى كورۋگە بولادى. ال بۇعان مەملەكەت قايراتكەرىنىڭ قاتىسى جوق, دەپ حابارلادى Egemen.kz stopfake.kz-كە سىلتەمە جاساپ.
مىسالى, Instagram-داعى وسىنداي اككاۋنتتاردىڭ ءبىرى tasmagambetov_official پاراقشاسىنا 45 مىڭنان استام ادام جازىلعان, ەكىنشىسى – imangali_tasmagambetov. جازىلۋشىلار سانى مىڭنان اسادى. Facebook-تە دە ونىڭ اتىنان پاراقشالار اشىلعان.
يمانعالي تاسماعامبەتوۆ بۇل اككاۋنتتارعا قاتىسى جوعىن ايتتى.
«سوڭعى ۋاقىتتا الەۋمەتتىك جەلىدە مەنىڭ اتىمنان ءتۇرلى تاقىرىپتا ارانداتۋشىلىق اقپارات جۇكتەلگەن جالعان اككاۋنتتار مەن پاراقشالار پايدا بولىپ جاتىر. ءسوز جوق, بۇل جەكە مەنىڭ ابىروي-بەدەلىمنەن بولەك, ءاربىر ازاماتتىڭ عالامتورداعى قاۋىپسىزدىگىنە تونەتىن ۇلكەن قاتەردى كورسەتەدى. رەسمي تۇردە مالىمدەيمىن, مەنىڭ الەۋمەتتىك جەلىدە ەشقانداي پاراقشام جوق. بارشاڭىزدان مۇنداي ارانداتۋعا قارسى تۇرىپ, جالعان اقپارات تاراتپاۋلارىڭىزدى سۇرايمىن», دەدى يمانعالي تاسماعامبەتوۆ.