مەملەكەت باسشىسى نۇرسۇلتان نازارباەۆ قازۇۋ-ءدىڭ رەكتورى عالىم مۇتانوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى. كەزدەسۋ بارىسىندا ەلىمىزدىڭ جوعارى ءبىلىم بەرۋ جۇيەسىن دامىتۋ جانە ونىڭ باسەكەگە قابىلەتتىلىگىن ارتتىرۋ ماسەلەلەرى تالقىلاندى.
مەملەكەت باسشىسى قازۇۋ رەسپۋبليكانىڭ ءىرى جوعارى وقۋ ورىندارىنىڭ ءبىرى بولىپ سانالاتىنىن, ال ونىڭ تۇلەكتەرى ەكونوميكانىڭ بارلىق سەكتورىندا جۇمىس ىستەيتىنىن اتاپ ءوتتى.
– بۇگىندە جوعارى وقۋ ورىندارىنىڭ ستۋدەنتتەرىنە قويىلاتىن تالاپ وتە جوعارى. بيىل قۇرىلعانىنا 80 جىل تولاتىن ۋنيۆەرسيتەت ءوزىنىڭ باسەكەگە قابىلەتتىلىگىن ۇدايى ارتتىرا وتىرىپ, جوعارى بىلىكتى كادرلار دايارلاۋدا ۇلگى بولۋعا ءتيىس. تەك وسى جاعدايدا عانا وقۋ ورنىنىڭ مارتەبەسى ارتا تۇسەتىن بولادى, – دەدى نۇرسۇلتان نازارباەۆ.
ع.مۇتانوۆ جوعارى وقۋ ورنىنىڭ قازىرگى قىزمەتى جانە الەمدەگى ەڭ ۇزدىك 200 ۋنيۆەرسيتەتتىڭ قاتارىنا قوسىلۋ جونىندەگى نەگىزگى مىندەتتەر تۋرالى ايتتى.
رەكتور قازۇۋ-ءدىڭ الدىندا بىلىمگە نەگىزدەلگەن يننوۆاتسيالىق ەكونوميكا سۋبەكتىسىنە اينالۋ مىندەتى تۇرعانىنا توقتالدى. بۇل ورايدا ۋنيۆەرسيتەت عىلىمي-تەحنولوگيالىق مىندەتتەردى شەشۋدە, ءبىلىم بەرۋ ساپاسىن جانە ەلىمىزدىڭ وقۋ ورىندارىنىڭ باسەكەگە قابىلەتتىلىگىن ارتتىرۋدا ۇلگى بولۋدى كوزدەپ وتىر.
سۋرەتتى تۇسىرگەندەر
س.بوندارەنكو, ب.وتارباەۆ.